ရည်မှန်းချက်ပန်းတိုင်

Thet Ko Oo
အောက်တိုဘာလ 10, 2012 တွင် 10:06pm မှာ ချစ်စနိုးငယ် မှ တင်သွင်းခဲ့သည်။

 ... လူတွေသည် မှန်ရေကန်ထဲက ရွှေငါးများနှင့် တူလှသည်ဟု ပြောလေ့ရှိကြသည်။
ငါးတွေသည် မပြတ် ကူးခပ်နေကြသော်လည်း ဘယ်ခရီးမျှ မရောက်။ မှန်ရေကန်ထဲမှာပတ်ချာလည်၍သာနေသည်။
လူတွေမှာလည်း အများစုတို့သည် ဘေးကကြည့်လျှင် အလုပ်များနေသယောင် ထင်ရသော်လည်း တကယ်တမ်း၌ ဘ၀အတွက် အစီအစဉ်တကျ ရည်မှန်းချက်ရှိရှိ လှုပ်ရှားနေခြင်း မဟုတ်။ မရေမရာ မျောပါနေကြခြင်းသာ ဖြစ်၏။
စင်စစ် ဘ၀ ဟူသည် ကံစမ်းပွဲ မဟုတ်။ ကံအကောင်း၊အဆိုးကို မျှော်ကာ ကြုံရကျရာ မျောပါနေဖို့ မဟုတ်။ မိမိဘ၀ကို ဖန်တီးနိုင်သောအရာသည် ကံကြမ္မာသာ မဟုတ်။ မိမိသာလျှင်ဖြစ်ကြောင်း သိထားဖို့ လိုသည်။ ကိုယ့်ကံကြမ္မာ ကိုယ်ဖန်တီးနိုင်ကြောင်း ယုံကြည်လျှင် ဒီဘ၀မှာ ငါဘာဖြစ်ရမည် ဟူ၍ ဆုံးဖြတ်ချက်ချနိုင်ပေပြီ။
ဒီဘ၀မှာ သင် ဘာဖြစ်ချင်သလဲ? သင်ကိုယ်တိုင်ပဲ ရွေးချယ်ရလိမ့်မည်။ တခြားသူ ဆုံးဖြတ် ရွေးချယ်ပေး၍ မရ။
အသက် (၆၀) မှာ သင် ဘာဖြစ်ချင်သလဲ???
အသက် (၇၀) မှာ ဘယ်အနေအထားမျိုးနှင့် ရှိချင်သလဲ။
အသက် (၈၀) မှာကော...???
ဘယ်လိုဂုဏ်သရေမျိုးနှင့်ပုဂ္ဂိုလ် ဖြစ်ချင်သလဲ။ ပိုင်ဆိုင်မှုတွေ ဘယ်လောက်ရှိချင်သလဲ။ ဆွေမျိုးအသိုင်းအ၀ိုင်းက၊ ရပ်ရွာက၊ နိုင်ငံက သင့အပေါ် ဘယ်လိုသဘောမျိုး ထားရှိစေချင်သလဲ။ စဉ်းစားကြည့်ပါ။ ပီပီသသ မြင်ယောင်ကြည့်ပါ။ ငါ အဲဒီလိုဖြစ်ရမည်၊ ငါ အဲဒီလောက်ဖြစ်ရမည်ဟု စိတ်ထဲမှာ ယုံကြည်လာလျှင် အဲဒါသည် သင့်အတွက် ရေရှည်ရည်မှန်းချက်ဖြစ်ပြီ။
ဒီရည်မှန်းချက် သင့်ခေါင်းထဲမှာ စွဲမြဲနေမည်၊ အခြားအလိုဆန္ဒများ၏အထက်က လွှမ်းမိုး၍နေမည်ဆိုလျှင် ဒီနှစ်ကာလများတွင်း သင် လှုပ်ရှားလုပ်ကိုင်သမျှသည် သင့်အား ပန်းတိုင်ဆီသို့ မသိမသာဖြစ်စေ၊ သိသိသာသာဖြစ်စေ တွန်းပို့ပေးသောအရာများချည်း ဖြစ်လာလိမ့်မည်။
လောက၌ မည်သူမျှ လျှပ်ပြက်သလို ရုတ်တရက် ချမ်းသာကြွယ်ဝမသွားနိုင်။ အနုညာတမှ နေ့ချင်းညချင်း အထင်ကရ ဖြစ်သွားသည်ဟူ၍လည်း မရှိ။ ဘေးလူတွေက အကြောင်းမသိသဖြင့် ဘယ်သူဘယ်ဝါ၏ဘ၀ ရုတ်ခြည်း ပြောင်းလဲသွားသည် ထင်ကြသော်လည်း အနိမ့်မှ အမြင့်သို့ တိုးတက်ပြောင်လဲဖို့ရာ သူ ဘာတွေ ဘယ်မျှ လုပ်ခဲ့ရသည်ဆိုတာ သူ့ဘာသာသိသည်။
မည်သည့်နယ်ပယ်၌ဖြစ်စေ အောက်ခြေမှ ထိပ်ဆုံးသို့ တစ်ချက်တည်း ခုန်တက်၍ ရောက်ရိုးထုံးစံ မရှိပါ။ အဆင့်ဆင့်တွေ ဖြတ်သန်းရသည်။ လှေကားထစ်ပေါင်းများစွာကို နင်းတက်ရသည်။ ထို့ကြောင့် ရေရှည်ရည်မှန်းချက်ဆီသို့ ချီတက်ရာတွင် မျက်စိမလည်စေဖို့နှင့် တစ်ဆင့်ပြီးတစ်ဆင့် အားဖြည့်မြှင့်တင်ပေးနိုင်ဖို့ ရည်မှန်းချက်အငယ်စား၊ ရည်မှန်းချက်အလတ်စားတွေ ချမှတ်ပေးရသည်။ မည်သည့်လုပ်ငန်းတာဝန်မဆို တစ်ပိုင်းစီ တစ်ကန့်စီ ဆောင်ရွက်၍ရသည့် လုပ်ငန်းငယ်ကလေးများအဖြစ် ခွဲခြမ်းစိတ်ဖြာ၍လုပ်ကိုင်လျှင် သက်သာလွယ်ကူပြီး အောင်မြင်ရန်လည်း ပိုသေချာသည်။ ဘ၀တစ်ခုလုံးအတွက် ရည်မှန်းချက်ကြီးကိုလည်း တစ်နှစ်အတွက် ရည်မှန်းချက်၊ တစ်လအတွက် လျာထားချက်၊ တစ်ပတ်စာအစီအစဉ်၊ တစ်နေ့တာအလုပ် စသဖြင့် စနစ်တကျ တစ်ဆင့်စီ၊ တစ်နိုင်စီ မှန်မှန်လုပ်သွားပါက ခရီးတစ်လျှောက် အောင်မြင်မှုကြီးငယ်များကို ခံစားရင်း အချိန်တန်သော် ပန်းတိုင်ရောက်မှာ မုချဖြစ်သည်။
ထို့ကြောင့် ဘ၀၌ လတ်တလောအနေအထားသည် အကြောင်းမဟုတ်ပါ။ အရေးကြီးသည်က ဦးတည်ရာလမ်းကြောင်းရှိဖို့ ဖြစ်သည်။ လမ်းကြောင်းပေါ်မှာ ရောက်နေပြီ၊ ပန်းတိုင်သို့ ဦးတည်လှုပ်ရှားနေပြီဆိုလျှင် ဘ၀အတွက် အလားအလာကောင်းပေပြီ။

ကျမ်းကိုး-
အားပြင်းတဲ့ မြားတစ်စင်း (ဖေမြင့်)