အခန်း(၈) သီချင်း ဂီတသည်သာ
ကွန်းခိုရာ
(၁)
Shore of Peace တီးဝိုင်းလေး ပုသိမ်ကောလိပ်မြေမှာ ပေါ်ပေါက်လာခဲ့ချိန်၌ ကိုသျှပ်သည်လည်း မြင့်မိုးအောင်တို့အိမ်မှ ဘိုကနောင် ကရင်တိုင်းရင်းသား ရပ်ကွက်ရှိ အောင်ကျော်ဦးတို့ အိမ်သို့ အသိုက်ပြောင်းရွှေ့သွားခဲ့ပြီ။
မြင့်မိုးအောင်တို့ အိမ်မှာ တစ်လခွဲလောက်ကြာခဲ့သည်။ ကိုသျှပ်တစ်ယောက် ဆွဲအားများရာ အောင်ကျော်ဦးတို့ အိမ်သို့ ပျော်ပျော်ကြီး ချီတက်သွားခဲ့သောအခါ မြင့်မိုးအောင်၏ မိဘများက အတော်လေးစိတ်မကောင်း ဖြစ်ကြသည်။ သူ့ကို သံယောဇဉ်တွယ်ခဲ့ကြသလို သူ့စားဝတ်နေရေးအတွက် တွေးပြီးပူပန်ခဲ့ကြသည်။
တကယ်ဆို မြင့်မိုးအောင်တို့အိမ်မှာက စားသောက်နေထိုင် အစစအရာရာ အားလုံးအဆင်ပြေသည်။ အောင်ကျော်ဦးတို့ အိမ်မှာ မိသားစုက မစုံလင်။ အထူးသဖြင့် အောင်ကျော်ဦးတို့ မိခင် ဒေါ်မာစီဆုံးထားတာက တစ်နှစ်ခန့်သာ ရှိဦးမည်။ စားရေးသောက်ရေး အစီအစဉ်များ ဘယ်လိုမျှ ထောင့်မစေ့နိုင်။
သို့သော် ကိုသျှပ်က ဒါတွေကိုထည့်မတွက်။ သူသည် ဘယ်တုန်းကမှ အိပ်ချိန် စားချိန်မှန်သူမဟုတ်။ အိပ်ဖို့ စားဖို့ နေရာလည်း အတိအကျမထား။ သီချင်းများ ရှိရာ၊ ဂီတအလုပ်ရှိရာကိုသာ အမြဲတမ်းလှည့်လည်သွားလာနေသည်။ သီချင်းနှင့် ဂီတတို့၏ ခေါ်ဆောင်ရာဆီသို့သာ ရမ္မက်ဆန္ဒ ပြင်းပြစွာ လိုက်ပါနေချင်သည်။ သီချင်းဂီတသာလျှင် ကိုသျှပ်၏ အိမ်အစစ်ဖြစ်ကြောင်း ပထမဆုံးအကြိမ် မြင့်မိုးအောင် သိနားလည်သွားခဲ့သည်။
(၂)
ကိုသျှပ်သည် ငုဝါ၊ ဖြူနီညိုပြာလို တီးဝိုင်းကြီးတွေမှာ ၀င်ရောက်ပြီး ဆိုခဲ့၊ တီးခဲ့ဖူးသည်။ သို့သော် ယခုတစ်ကြိမ်က သူ့အတွက်မတူ။ Shore of Peace က ကျောင်းတွင်း အပျော်တမ်း တီးဝိုင်းသေးသေးကလေး တစ်ခုဆိုသော်လည်း သူ၏ ကိုယ်ပိုင်၊ သူ၏ စေစားရာဖြစ်သည်။
Shore of Peace မှာ သူက ခေါင်းဆောင်ဖြစ်သည်။ သူ့စိတ်တိုင်းကျ ဂီတကို စီမံခန့်ခွဲရသည်။
သို့ဖြစ်၍ သူရင်ခုန်ခဲ့တာ မဆန်းဟု ဆိုရမည်။
(၃)
သူ ရောက်သွားသည့် အောင်ကျော်ဦးတို့ အိမ်က တကယ်ပဲ အနှောင်အဖွဲ့ကင်းသည်။ စိတ်လွတ်ကိုယ်လွတ် နေချင်သော ကိုသျှပ်အတွက် ကွက်တိကျသွားသည်။
အိမ်အောက်ထပ်မှာက အောင်ကျော်ဦး၏ ဖခင် ဦးသိမ်းတင်နေသည်။ သူတို့ ယောကျာ်းလေးတစ်သိုက် အပေါ်ထပ်မှာ စုပြီး ဂီတာတီး၊ သီချင်းတိုက် လွတ်လပ်နေကြသည်။ ထိုအခါ အရက်သောက်လည်း တားမြစ်ဆုံးမ ထိန်းကွပ်ပေးမည့်သူမရှိ။ ပြတင်း အပြင်ဘက် သွပ်မိုးပေါ်တွင် အရက်ပုလင်းလွတ်တွေက တန်းစီနေကြတော့သည်။ ခွေးသား (ဟောင်ကောင်)ဟင်းချက် စားတာမျိုးတွေ လုပ်ချင်ရာ လုပ်ကြသည်။ တစ်ခါက ငုံးဟင်းနှင့်အရက် မြည်းကြရာ အဆိပ်တောက်၍လား မသိ။ တုံးခနဲ ကိုသျှပ် လဲဖူးသည်။ ကံကောင်း ထောက်မစွာ ပြန်ကောင်းလာခဲ့သည်။
နဂိုကတည်းက ရေချိုးပျင်းသူ ကိုသျှပ်အတွက်တော့ဖြင့် ရေမိုးချိုးဖို့ တိုက်တွန်းမည့်သူလည်း မရှိတော့ပြီ။ မှတ်မှတ်ရရ အောင်ကျော်ဦးတို့ အိမ်မှာ တစ်လလောက် နေသွားစဉ် ကာလတစ်လျှောက်လုံး ရေတစ်ခါပဲ ချိုးသွားခဲ့သည်။
(၄)
အနေအထိုင်မှာ ဖြစ်ကတတ်ဆန်းနေချင်သလို နေခဲ့သော်လည်း ကိုသျှပ်သည် ဦးတည်ရာ ရည်ရွယ်ချက်တော့ မကင်းမဲ့။
ကိုအောင်ကျော်ဦးတို့အိမ်မှာ အခြေပြုပြီး လိဒ်သမား အောင်အောင်၊ ရစ်သမ် သာထူး၊ ရေချမ်းတို့ကို ကိုသျှပ် စနစ်တကျမောင်းခဲ့သည်။
လိဒ် အောင်အောင်ကား ခေသူမဟုတ်။ ပုသိမ်မြို့နယ် ဘင်ခရာ တီးဝိုင်းတွင်လည်း နည်းပြဆရာလုပ်ခဲ့သည်။ အောင်အောင့်လက်ထဲမှာ ဘင်ခရာနည်းပြသင်တန်း၌ ဆရာတွေအတွက် ပြဠာန်းသော "မျက်စိအကြား နားအမြင်" စာအုပ်ကို ကိုသျှပ်တွေ့သွားသည်။
ရွာစား စိန်ဝေလျှံ၏ သားဦးဟန်ဝင်း ရေးသားပြုစုထားခဲ့သည့် အဆိုပါ စာအုပ်ကြောင့် ကိုသျှပ်၏ မျက်လုံးများ ပွင့်ကျယ်သွားခဲ့သည် ဆိုရမည်။ စာအုပ်ကို လက်က မချနိုင်အောင် ကိုးကွယ်ထားခဲ့သည်။ သူ့အပေါ်မှာ ကြီးစွာသော သြဇာလွှမ်းမိုးမှု ရှိသွားခဲ့သည့် စာအုပ်ဖြစ်လေသည်။
(၅)
"မျက်စိ အကြား၊ နား အမြင်" စာအုပ်ထဲက ပဲပင်ပေါက်ကလေးများသဖွယ် နိုင်ငံတကာ Pukka နုတ်စ်တွေကို ကိုသျှပ်ဖတ်နိုင်သည်။
မနက်မိုးလင်းချိန်မှ ညမိုးချုပ် အိပ်ချိန်အထိ စာအုပ်ထဲက နုတ်စ်တွေ၊ စကေးလ်တွေအတိုင်း တစ်သဝေမတိမ်း ရအောင် တစ်ဖွဲ့လုံးကို ကောင်းကောင်းမောင်းတော့သည်။ ဂီတာ တစ်လက်ချင်း တီးခတ်ရာမှ အထက်အောက် လက်ခတ်ဆွဲပုံ Up and down stroke တွေကအစ သေသေချာချာ အသေးစိတ် သင်ပြပေးခဲ့သည်။
ထိုအချိန်မှာ သူတို့ တစ်ဖွဲ့လုံး ကိုသျှပ်ကို မော်ကြည့်ဝံ့သူ မရှိခဲ့ကြချေ။ တစ်ဖွဲ့လုံးအပေါ် သူ၏ သြဇာညောင်းသည်။ ကိုသျှပ်ကို သူတို့လေးစား ခန့်ညားကြသည်။ ကိုသျှပ်သည် သူတို့၏ သူရဲကောင်း။ သူတို့၏ နေရာသစ်ရှာပေးသူ။ ဦးဆောင်သူ ဖြစ်၍ လာခဲ့သည်။
ကိုသျှပ်ကား အချင်းချင်းကြားမှာ ဆဲဖို့ ဝေးစွ။ စကားပင်အပိုမပြော။ စည်းကမ်းရှိသည်။ အရက်သောက်လည်း ဘယ်လောက်သောက်သောက် မူးသည်မထင်ရ။ အကြောင်းမှာ ရေချိန်တက်ချိန်၌ စကားတွေ ဖောင်လာတာမျိုး၊ ရစ်တာမျိုး မရှိ။ အရက်သောက်ရင်း ဂီတာ တီးကြတိုင်း အားလုံးမှောက်ကုန်ကြသည့်တိုင် သူကတော့ တစ်ယောက်တည်း။ မျက်မှန်ထူထူအောက်မှ တောက်ပသော မျက်လုံးများနှင့် နုတ်စ်စာရွက်တွေ တစ်ရွက်ချင်းလှန်၊ ဂီတာဆက်တီးပြီး ကျန်နေခဲ့စမြဲ။
(၆)
ဒူပေနာပေခံနိုင်တာတော့ တကယ် အောချရလောက်သည်။
အိပ်တော့လည်း ဖြစ်သလို။ ခေါင်းအုံးမရှိလည်း အုတ်နီခဲကို သတင်းစာပတ်ပြီး အိပ်နိုင်သည်။ မနက်ကျလျှင်ဖြင့် နေမြင့်သည့်တိုင် မနိုးတတ်။
"ကိုသျှပ် … ကိုသျှပ် … ထ … ထ" ဆိုလျှင် အင်းအဲနှင့် "င့ါမျက်လုံးတွေကော ……….." ဟု အောက်ချထားသော မျက်မှန်ကို မေးရင်းစမ်းသည်။
ပြီးလျှင် နံနက်စာကို မတောင့်တ။ မနက်ခင်း ပတ်လောက်တော့ အရင်တစ်ခွက် တစ်ဖလား နည်းနည်းလေး သောက်လိုက်သေးသည်။
ပြီးသည်နှင့် "ဟေ့ကောင် ပထန်။ မနေ့ဟာ ပြန်တီးစမ်း" ဆိုပြီး စကေးများ ပြန်မောင်းတော့သည်။ ပွဲတစ်ပွဲဆိုပြီး ပြန်လာလည်း သူတို့အဖွဲ့သားတွေ မနားရ။ နုတ်စ်တွေ အတိုင်းဆက်ပြီး လေ့ကျင့်သည်။
"သီချင်းက အဓိကမဟုတ်ဘူး။ တကယ့်အခြေခံက နုတ်စ်ပဲ။ ဂီတပညာတတ်မှပဲ သီချင်းကို လုပ်သင့်တယ်" ဟု ကိုသျှပ်အလေးအနက်ထားပြောတတ်သည်။
(၇)
ထိုအချိန်မှာ ကိုသျှပ်စကားနည်းခြင်း၏ အကြောင်းရင်းတွင် အာရုံစူးစိုက်စရာ ဂီတရှိနေ၍ဖြစ်သည်။ သူ့စိတ်က တီးဖို့ စဉ်ထားသမျှ သီချင်းများအတွက် ကော့ဒ်ရှာမည်။ နုတ်စ် ထုတ်မည်။ အရိန့်ခ်ျ လုပ်မည်။ ဂီတကိုပဲ စူးနစ်ထားခဲ့သည်။ သီချင်းအတွက် နုတ်စ်ရေးရာတွင် နိုင်ငံတကာနုတ်စ်နှင့်သာရေးသည်။ ဘယ်သူ့ကိုမျှ အယုံအကြည်မရှိ။ တစ်ယောက်တည်းဒိုင်ခံ တာဝန်ယူခဲ့သည်။
ကိုသျှပ်က ဂီတပိုင်းနှင့်ပက်သက်ပြီး အားလုံး စီမံခန့်ခွဲခဲ့စဉ် မြင့်သန်းက သူတို့ Shore of Peace တီးဝိုင်း၏ မန်နေဂျာ။ ကျောင်းက စီစဉ်ထားရှိပြီး သူတို့ကို အပ်လာသမျှ ဖဲဝဲလ်၊ ၀ဲလ်ကမ်း၊ ဒင်နာပွဲတွေကို အကုန်လက်ခံစီစဉ်သည်။ အောင်ကျော်ဦးက တီးဝိုင်းပစ္စည်းကိစ္စတွေကို တာဝန်ယူဖြေရှင်းပေးခဲ့လေသည်။
မေဂျာတီးဝိုင်း၏ တာဝန်ခံ ဆရာမက ဒေါ်စန်းစန်းကြူ။
ဆရာမ၏ အကျင့်က စကားပြောရင်း မထိတ်သာ မလန့်သာ တစ်ခုခုဆိုလျှင် သူ့ရင်ညွန့်ကို လက်ကလေးနှင့် ထောက်ပြီး "အမလေးရှင်၊ အမလေးဟယ်" လုပ်တတ်သည်။ တပည့်တွေအပေါ် နားလည်သလောက် သူတို့ တီးဝိုင်းအဖွဲ့ကိုလည်း သည်းခံခဲ့သူဖြစ်သည်။
(၈)
ကျောင်းပွဲ တစ်ခုခုရှိ၍ သီချင်းဆိုမည့်ကျောင်းသူ ကျောင်းသားများကို အသံစစ်ပြီဆိုလျှင် ဆရာမ ဒေါ်စန်းစန်းကြူနှင့် ကိုသျှပ်တို့ အတူတူ ထိုင်ရွေးရသည်။
ဆရာမက ကိုသျှပ်ကိုပဲ အဆုံးအဖြတ်တာဝန်ပေးသည်။ စင်ပေါ်တက်ခွင့်ရဖို့ မရဖို့က ကိုသျှပ်၏ အဆုံးအဖြတ်သာလျှင် အဓိကဖြစ်သည်။ အစမ်းဆိုပြပြီးလျှင် ဆရာမက -
"သျှပ်ရေ ၊ ဘယ်လိုလဲ ၊ ကြိုက်လား" ဟုလှမ်းမေးသည်။
သူက မျက်မှန်ထူထူလေးကို အပေါ်သို့ အသာတွန်းတင်ပြီး တစ်ချက်မော့ကြည့်လိုက်လျှင်ပြီးပြီ။
ကျောင်းသူတွေက ထိုအချိန်မှာ ခေတ်စားနေသော ဖြူသီသီချင်းတွေပဲ ရွေးဆိုကြတာများသည်။ တစ်ယောက်လာလည်း -
"လွမ်းငွေ့ဝေေ၀၊ ချစ်သူခင်သူ တစ်ဦးမှာ ရုပ်သွင်မူရာ ခံ့ညားနေ"
နောက်တစ်ယောက်လာလည်း "လွမ်းငွေ့ဝေေ၀၊ ချစ်သူခင်သူ တစ်ဦးမှာ …" ဖြစ်နေကြ၍ ကိုသျှပ်က "ဆရာမ၊ ပထမနှစ်ကနေ ဖိုင်နယ်အထိဆိုမယ့် ကျောင်းသူအားလုံး ဒီသီချင်း တစ်ပုဒ်နဲ့ စင်ပေါ်တစ်ပြုံတည်း တင်ပေးလိုက်ရင် ကောင်းမယ်။ ဒီသီချင်းတစ်ပုဒ်ကိုပဲ သူတို့ဝိုင်းဆိုကြ။ ကျွန်တော်တို့လည်း တစ်ခါတည်းတီးပေးရတာပေါ့" ဟု မှတ်ချက်ချ၍ ဆရာမလန့်ပြီး "အမလေးဟယ်" ဖြစ်ရသည်။
သာထူးက ထိုအကြောင်း..မသိ။ ကိုသျှပ် စိတ်တိုင်းကျမည့် ကီးနှင့် နုတ်စ်ဝင်အောင် ယောကျာ်းလေးတွေကို တစ်ဖက်လှည့်နှင့် ကြိုတင်စီစဉ်၊ဇာတ်တိုက်ပေးပြီးမှ ကိုသျှပ်တို့ အသံစစ်ဆေးရာဆီသို့ ပို့ပို့ပေးသည်။
တစ်ယောက်လာလည်း "မိန်းကလေး။ လာပါကွာ၊ ဒီကောင်မလေး၊ နင်ဒီလို ငိုမနေပါနဲ့"
နောက်တစ်ယောက်လည်း "လာပါကွာ၊ ဒီကောင်မလေး"
သို့ဖြင့် ကိုသျှပ်၏ လေအေးအေးနှင့် ဆူပူကြိမ်းမောင်းတာ ခံကြရပြန်သည်။
(၉)
တကယ်တော့ ဇူလိုင်၊ သြဂုတ်၏ ဟိုမှာဘက်တွင် စာမေးပွဲက လက်တစ်ကမ်းမျှသာ ဝေးတော့သည်။ အောင်ကျော်ဦးတို့ တီးဝိုင်းသမား တစ်သိုက်ကား တစ်နှစ်လုံးလည်း အတန်းတက်မမှန်။ စာတွေက ခေါင်းထဲမှာ ကောင်းကောင်းမရှိ။ ဆရာ၊ ဆရာမတွေက စာမတတ်၍ ဆူ။ သို့သော် သူတို့ စိတ်မပူ။ သူတို့ စိတ်ကူးအာရုံအထဲမှာ တစ်ခုပဲရှိသည်။ အားသွန်ခွန်စိုက် လုပ်နေကြတာ ရည်ရွယ်ချက် တစ်ခုပဲရှိမည်။ သူတို့၏ အိပ်မက်က တီးဝိုင်းလေး တစ်ဝိုင်းသာဖြစ်သည်။ စနစ်တကျ၊ လှလှပပ၊ သပ်သပ်ရပ်ရပ် တီးခတ်နေသော တီးဝိုင်းလေး။
သူတို့အထဲမှာမှ ကိုသျှပ်က အန္တရာယ်အများဆုံး။ အပြင်ဖြေ External ကျောင်းသား။ စာမေးပွဲနှစ်ခါ ကျထားပြီးသားဖြစ်၍ နောက်ထပ်တစ်ခါများ စာမေးပွဲမအောင်လျှင် ကောလိပ်ပရိဝုဏ်ကို အပြီးအပိုင် စွန့်ခွာရတော့မည်။ သို့သော် သူ့ခေါင်းထဲမှာ စာမေးပွဲမရှိ။ ဌာနက ခဏထုတ်ပေးထားသော only ကက်ဆက်အစုတ်ကလေးတစ်လုံး၊ ဂီတာတစ်လက်တို့ကို ပွေ့ပိုက်လျက် ကြွက်နီတို့အိမ်၊ သာထူးတို့ အဆောင်၊ ဦးမြင့်တို့ လှမိုးတို့ အဆောင်တွေမှာ ကြုံသလို လိုက်နေနေရင်း သီချင်းဂီတနှင့်သာ လုံးလုံးလျားလျား မွေ့လျော်နေတတ်သည်။
(၁၀)
ကိုသျှပ်က မနက်မိုးလင်းသည်နှင့် သီချင်းနားထောင်၊ နုတ်စ်ထုတ်။
သူ့ရည်ရွယ်ချက်က ကိုယ်ပိုင်တီးဝိုင်းလေး တစ်ခုဖြစ်ဖြစ်မြောက်မြောက် ပေါ်လာစေချင်သည်။ ဒါကိုပဲ တစ်ချိန်လုံး စိတ်ကူးအိပ်မက်မက်နေခဲ့သည်။
"၁၉၈၇ ခုနှစ်ကျရင် ငါတို့ Band တစ်ခု ပီပီပြင်ပြင်ဖြစ်ရမယ်။ အဲဒီနှစ်ကျ ရွှေတိဂုံဘုရားတပေါင်းပွဲတော်မှာ ငါတို့ တက်တီးနိုင်ဖို့ လုပ်ကြမယ်" ဟု ကိုသျှပ်က သူ့ရည်မှန်းချက်ကို ဖွင့်ဟ ကြွေးကြော်နှိုးဆော်ထားခဲ့သည်။
ထိုအချိန်မှာ နိုင်ငံသိအဆိုတော် မောင်ဂဠုန်က ဟင်္သာတမှ လာတက်သော ပုသိမ်ကောလိပ်ကျောင်းသား။ LPJ တီးဝိုငးနှင့် အခွေထွက်ထားပြီးပြီ။ မောင်ဂဠုန်တို့ ဟင်္သာတသားတွေ၏ တီးဝိုင်းက မဉ္ဇူဆောင်မှာ တီးကြသည်။ Shore of Peace က ယုဇနဟောလ် ဒင်နာမှာ တီးကြမည်။ သူတို့ ကျောင်းတွင်းဝိုင်းလေးတွေက လူငယ်ပီပီ အပြိုင်အဆိုင်။
"မင်းတို့ မှတ်ထား။ အနုပညာမှာ များများကြီး လေ့ကျင့်ထားဖို့ လိုတယ်။ ချွေးထွက်များမှ သေးထွက် နည်းမယ်" ဟု ကိုသျှပ်က ပြောတတ်သည်။
"ဟာဗျာ၊ ကိုသျှပ်ကလည်း တောက်တီးတောက်တဲ့။ ချွေးထွက် များမှ သွေးထွက် နည်းမယ်ပဲ ကြားဖူးပါတယ်" ဟု ဆိုလျှင် -
"မင်းတို့ နားမလည်သေးဘူး။ ဘာပဲပြောပြော အပြိုင်အဆိုင်ကတော့ ရှိတာပဲ။ သူတို့က စင်အောက်မှာ လာကြည့်ရင်း ဝေဖန်ကြမှာပဲ။ ငါတို့ အသားကျအောင် လေ့ကျင့် ထားတော့ စင်ပေါ်ကျရင် ငြိမ်နေမယ်။ ထူးပြီး စိတ်တုန်လှုပ်စရာ မရှိဘူး။ တစ်မျိုး ပြောရင် ကြောက်သေး ပါစရာ မရှိတော့ဘူး။ အဲဒါကြောင့် ချွေးထွက် များရင် သေးထွက်နည်းမယ် ပြောတာ၊ သဘောပေါက်လား" ဟု ဆိုသည်။
နောက်ပိုင်းတော့ သူတို့တစ်တွေ မောင်ဂဠုန်နှင့်လည်း ခင်မင် သွားကြသည်။ LPJ နှင့် မတီးရသေးသော သီချင်းသစ်လေးတွေ သူတို့ အဖွဲ့ကို တီးပေးဖို့ပင် လာပြောသည်။
(၁၁)
ထိုစဉ်တုန်းက ကိုသျှပ်သည် သီချင်းစီးရီး ထုတ်ဖို့ စိတ်ကူး စိတ်သန်း ရှိသည်ဟူ၍ တစ်ကြိမ် တစ်ခါမျှ မပြောခဲ့စဖူး။ သီချင်းတွေတော့ သူ ရေးသည်။ သူ၏ အပြင်းပြဆုံး အာသီသက လက်ငှားဖို့သာ ဖြစ်သည်။ တီးဝိုင်း၏ ဂီတပိုင်းကို အကောင်းဆုံး အရိန့်ခ်ျ လုပ်ဖို့သာ ဖြစ်သည်။
"မသပ်မရပ်တာတွေ လုပ်ဖို့အတွက် သပ်သပ်ရပ်ရပ် ကြိုတင် ပြင်ဆင် ထားရတယ်" ဟု ကိုသျှပ် အစဉ်တစိုက် ပြောခဲ့တာကို အောင်ကျော်ဦးတို့တစ်တွေ လက်ခံခဲ့ရသည်။
(၁၂)
ကိုသျှပ်၏ စိတ်ကူးအိပ်မက် ရည်မှန်းချက်က ရောင်းတမ်း တီးဝိုင်း၊ အငှားလိုက် တီးဝိုင်း ဆိုသော်လည်း "ငုဝါ"၊ "ဖြူနီညိုပြာ" တို့လို ပုသိမ်ဒေသန္တရ တီးဝိုင်း အဆင့် မဟုတ်။ နိုင်ငံအနှံ့ လက်သင့်ခံနိုင်သည့် တီးဝိုင်းကြီးမျိုး ဖြစ်သည်။
အသက် ၁၉-၂၀ အရွယ် လူငယ်လေး ကိုသျှပ်၏ စိတ်က ဘုံဖျား ရောက်နေသော်လည်း သူတို့ လူတွေကတော့ ချုံကြားမှာပဲ ရှိသေးသည်။ လူ၊ ပစ္စည်း၊ အတတ်ပညာ အစစအရာရာ ချို့တဲ့နေသေးသည်။
"ငုဝါ"၊ "ဖြူနီညိုပြာ" တို့လို ရောင်းတမ်း တီးဝိုင်းကြီးတွေမှာ သူတို့ကိုယ်ပိုင် တူရိယာ၊ စက်ပစ္စည်းတွေ ကိုယ်စီကိုယ်င အစုံအလင် ရှိကြသော်လည်း ကိုသျှပ်တို့လို ကျောင်းတွင်း အပျော်တမ်း တီးဝိုင်း လေးတွေမှာတော့ဖြင့် စက်နှင့် ပစ္စည်း အားလုံး ငှားရမ်းပြီး တီးခတ်ရသည်။
ထိုအချိန်တုန်းက ပုသိမ်မြို့မှာ တီးဝိုင်းစက်တွေ ငှားရမ်းသော ဌာန တစ်ခု ရှိသည်။ ဦးမြသွင် စက်နှင့် ဦးကြီးမြင့် စက် ဖြစ်၏။
ဒီတစ်ခါ ဦးမြသွင်နှင့် အဆင်မပြေ ဦးကြီးမြင့်။ နောက်တစ်ခါ ဦးကြီးမြင့်နှင့် ထစ်ငေါ့ခဲ့သော် ဦးမြသွင်။ ပြောင်းပြောင်းပြီး ငှားကြသည်။ နေရာ ပြောင်း၍သာ ငှားရသည်။ ဦးကြီးမြင့်နှင့် ဦးမြသွင်တို့ နေရာတွေက ဘေးချင်း ကပ်ရက်သား။ ပိုင်ရှင်တွေကတော့ ဘယ်လို နေကြမည်။ မသိ။ သူတို့တစ်တွေကတော့ ရူးချင် ယောင်ဆောင်ပြီး မျက်နှာပြောင်တိုက် ကိုယ် ငှားချင်ရာဘက် ၀င်ငှားတတ်ကြသည်။ မျက်လုံးချင်း တည့်တည့် ဆုံမိကြတော့လည်း ပြုံးဖြဲဖြဲ လုပ်နေလိုက်ကြသည်သာ။
(၁၃)
ထိုနှစ် ဖဲဝဲလ်ပွဲတွင် ဦးမြသွင်၏ စက်များကို ငှားဖို့ ပစ္စည်း တာဝန်ခံ အောင်ကျော်ဦး ဆုံးဖြတ်လိုက်သည်။ ကိုသျှပ်ကတော့ ချက်ဆို နားခွက်က မီးတောက်ပြီးသား။ "ဒီကရင်၊ ဦးမြသွင်စက် ဘာလို့ ငှားလဲ ဆိုတာ ငါ သိတယ်" ဟု ဆိုသည်။
အောင်ကျော်ဦး (ကြွက်နီ) ကတော့ ထိုစကားကို မကြားချင် ဟန်ဆောင်ပြီး မျက်လုံးကလေး ပေကလပ် ပေကလပ် လုပ်နေလိုက်သည်။ ဦးမြသွင်၏ ဂီတာတွေက သိပ်ကြီး မကောင်းလှ။ ရမ်ဆက်ကတော့ ကောင်းသည်။ အောင်ကျော်ဦးက ဒရမ်မာဆိုတော့ ဒရမ်ဆက် ပိုကောင်းသည့်ဘက် အသာလေး ပါအောင် ယက်လိုက်ခြင်း ဖြစ်သည်။ ဒါတင်မက သည်တစ်ချီမှာတော့ ဒရမ်ဆက် ကောင်းကောင်းတစ်စုံ မြောင်းမြကနေ ရအောင် ဆွဲပေးမည်ဟု ဦးမြသွင်က အောင်ကျော်ဦးအား တိုးတိုးတိတ်တိတ် လက်တို့ သတင်း ပေးထားပြီးနေပြီ။ အဲသည်တော့ ဦးမြသွင်တို့ စက်ကို ငှားဖို့ ကြွက်နီ ဆုံးဖြတ်လိုက်တာ ဘာမျှ မဆန်း။
ဦးမြသွင် အသစ် ၀ယ်လိုက်သော Revert စက်က အဆိုအတွက်ကော၊ ဂီတာတွေအတွက်ပါ အသုံးတည့်တာကလည်း အကြောင်းပြချက်ကောင်း တစ်ခု ဖြစ်နေတော့သည်။
(၁၄)
ဘာပဲပြောပြော ဦးမြသွင်၏ ဂီတာတွေက ပြဿနာ ရှိသည်။ အဖွဲ့သားတွေ စိတ်တိုင်းမကျလျှင် ပူညံပွက်ညံ ဖြစ်လာနိုင်သည်။ စောဒကတွေ တက်ကြတော့မည်။ အောင်ကျော်ဦး (ကြွက်နီ) ဥာဏ်တွေ ထုတ်ရပြီ။ အဆက်အသွယ် အပေါင်းအသင်းတွေကို လှည့်ပတ် စဉ်းစားသည်။ ဟုတ်ပြီ။ လိဒ်ဂီတာကို မျိုးအောင်ဆီက ဆွဲလိုက်မည်။ မျိုးအောင်က ပုသိမ်နှင့် ၁၆ မိုင်ခန့် ဝေးသော ကန်ကြီးထောင့်မှာ နေသည့် သူဌေး။ ဂီတာ အတီး ကျင့်ချင်၍ ကိုယ်ပိုင် ဆောလစ် ဂီတာ တစ်လက် ၀ယ်ထားသူ။ သူ့ဂီတာက စင်ကာပူလုပ် ဂစ်ဘဆင်ပုံ အသစ်ကျပ်ချွတ်။ ဟုတ်ပြီ။ ပထန်အတွက် ရအောင် ဆွဲပေးမည်။
ကိုသျှပ်အတွက် ဘေ့စ်ဂီတာပဲ ကျန်သည်။ စဉ်းစား၊ စဉ်းစားစမ်း။ ဘယ်က ရမလဲ။ ဘေ့စ်ဂီတာ ကောင်းကောင်း တစ်လက် ဘယ်က ရမလဲ။ ဟုတ်ပြီ။ စောဆင်မြူရယ် (စမ်းမြယ်) မှာ ကိုယ်ပိုင် ဘေ့စ်ဂီတာ တစ်လက် ရှိသည်ပဲ။ ပေါ်ပြူလာ ဦးမန်းချစ်ရွှေ၏ လက်ထွက်။ Pick up နှင့် ကြိုးတွေက Fender။
ပုသိမ်မြို့ပေါ်မှာတော့ဖြင့် အကောင်းဆုံးသော ဘေ့စ်ဂီတာဟုပင် ဆိုရမည်။ ကိုသျှပ် လက်နှင့် စမ်းမြယ်၏ ဘေ့စ် ဂီတာ။ မတွေ့တွေ့အောင် စက်ပစ္စည်း တာဝန်ခံ အောင်ကျော်ဦး စီစဉ်ရတော့မည်။
(၁၅)
ပွဲ နီးကပ်လာသည့် တစ်နေ့မှာ ဌာနမှူးက တီးဝိုင်းတာဝန်ခံ ဆရာမဒေါ်စန်းစန်းကြူ အပါအ၀င် သူတို့ အဖွဲ့ကို ခေါ်တွေ့သည်။
"ကဲ ဆရာတို့ မေဂျာ ဖဲဝဲလ်အတွက် မင်းတို့ တီးဝိုင်းက ကုန်ကျမယ့် စက်ငှားခကို တင်ပြကြ။ ဆရာတို့ ဌာနက ခွင့်ပြုနိုင်တဲ့ ပိုက်ဆံနဲ့ လောက်သလား ကြည့်ရမယ်" ဟု ဆိုသည်။
အပြင် ရောက်တော့ ဆရာမ မေးရပြီ။
"ဟေ့. . . သျှပ်၊ မင်းအတွက် ဘေ့စ်ဂီတာ သပ်သပ်ငှားပေးဖို့ ကြွက်နီကို ပြောထားတယ်ဆို၊ အဲဒါ ဘယ်လောက် ကျမလဲ"
"ဒီကောင် ပြောတာ သုံးရာလောက် ကျမယ်တဲ့၊ ဆရာမ"
"အမလေး . . .သျှပ်ရယ်"
ဆရာမက သူ့ရင်ဘတ် သူလက်နှင့် ထောက်နေရပြီ။ ထိုခေတ် ထိုအခါက ကျပ်သုံးရာ ဆိုတာ မနည်းမနောကြီး။
"ဟယ် . . . သျှပ်ရယ်၊ ဦးမြသွင် ဂီတာနဲ့ပဲ တီးလို့ကော မရဘူးလား"
"ရတော့ ရပါတယ် ဆရာမ။ ကျွန်တော်တို့က ပိုကောင်းချင်လို့ ဂီတာ ကောင်းကောင်းနဲ့ စီစဉ် ရတာပါ"
ကိုသျှပ်က လေအေးအေးနှင့် ပြောသည်။ သို့သော် တစ်စက်မျှ လျှော့မည့်ပုံ မရှိသဖြင့် ဆရာမက အောင်ကျော်ဦးဘက် လှည့်လာသည်။
"မောင်ကြွက်နီ၊ ဆရာမ ပြောမယ်၊ ဂီတာဖိုးကို နည်းနည်း လျှော့ရင် ကောင်းမယ် "
ဟုတ်ကဲ့။ အောင်ကျော်ဦးကလည်း အစွမ်းကုန် ညှိနှိုင်းပေးဖို့ ဆုံးဖြတ် ပြီးပါပြီ။ ဌာနက ခွင့်ပြုနိုင်သော ငွေပမာဏလည်း အကန့်အသတ် ရှိနေသည်။ ကိုသျှပ်ကလည်း ဒီဂီတာ မှ ဒီဂီတာ။ မရလျှင် လုံးဝ မဖြစ်သည့် အချိုး။
အောင်ကျော်ဦးကတော့ ဗျာများပြီ။
ဘာပဲဖြစ်ဖြစ် စမ်းမြယ်ဆီသို့ အပြေးသွားကာ ရင်ဘတ်စည်တီး အမျိုးမျိုး လှည့်ပတ်ဖွဲ့နွဲ့ ပြောရဦးတော့မည်။ တစ်ကြိမ်နှင့် မရလျှင် အကြိမ်ကြိမ် သွားမည်။ တွေ့တိုင်း အပူကပ်ပြီး ပြောမည်။နောက်တော့မှာ အသနား လွန်သွားပြီး အလကားပဲ ဖြစ်ဖြစ် မရရအောင် တောင်းပန်ရတော့မည်။
(၁၆)
နောက်ဆုံးတော့ စမ်းမြယ်နှင့် ညှိနှိုင်းပြောဆို အဆင်ပြေ သွားသည်။
အဲသည်လို သဘောတူညီမှုရထားပြီးသော်ငြားလည်း တစ်ဘက်မှ ကိုသျှပ်က တပူပူတစာစာ။ အင်မတန်စကားနည်းခဲ့ရာမှ ယခုတော့ဖြင့် ဘေ့စ်ဂီတာအတွက် စကားလုံးတွေ သွန်ချသည်။
တကယ်ဆိုမျိုးအောင်၏ လိဒ်ဂီတာလည်း ပွဲနေ့ကျမှပဲယူရမည်။ ဒရမ်ဆက်လည်း ထိုနေ့မနက်ကျမှ မြောင်းမြက ရောက်လာမည်ဖြစ်သည်။ ဒီကြားထဲမှာ ရီဟာဇယ်ကိုတော့ ရှိတာတွေနဲ့ပဲထိန်းပြီး တီးထားရမည်။ သို့သော် ကိုသျှပ်က တားမနိုင်၊ ဆီးမရ။ စက်တွေပြင်ဆင်ပြီး သီချင်းစတိုက်မည်အပြုမှာ ဂြိုလ်ကျပြီ။
"ဟေ့ကောင် ကြွက်။ မင်းပြောထားတဲ့ စမ်းမြယ် ဂီတာကော"
"ပွဲနေ့ကျ ရမယ်လေဗျာ"
"ဟာကွာ၊ မဟုတ်သေးဘူးလေ။ ငါအခုကတည်းက အဲဒီဂီတာနဲ့ တီးကြည့်ထားချင်တာကွ။ ဒါမှ သူ့ဂီတာရဲ့ အထာကို သိရမှာပေါ့"
ထိုသို့ ဂျီတိုက်တော့သည်။
"ကိုသျှပ်"
အောင်ကျော်ဦးက မေတ္တာရပ်ခံဖို့ ကြိုးစားသည်။ ချစ်ရိုသေရသော ကိုသျှပ်ကို သူလွန်ဆန်ဖို့ အခက်တွေ့နေဆဲ။ ဆရာမ ဒေါ်စန်းစန်းကြူကလည်း ၀င့်တဲ့၍ -
"အေးလေ၊ မောင်ကြွက်နီရယ်။သျှပ်ပြောတာဟုတ်တာပဲ။ မင်းပဲ ယူပေးမယ်ဆို"
ထိုအချိန်မှာတော့ အောင်ကျော်ဦး ဘာမျှမတတ်နိုင်တော့ပြီ။ အားလုံးကို လက်မြှောက်အရှုံးပေးရပြီ။ ရေချမ်းကို လက်တို့ပြီး နှစ်ယောက်သား စက်ဘီးနှင့် ထပြေးရတော့သည်။
(၁၇)
စမ်းမြယ်ကို မတွေ့တွေ့အောင်ရှာ။ မရရအောင် ရှင်းပြ တောင်းပန်ပြောဆိုလိုက်တော့ ဘေ့စ်ဂီတာရလာသည်။
ဝါဆို ၀ါခေါင်ကာလ။ မိုးက စိတ်မချရ။ အပွန်းအရှလည်း ခံ၍မဖြစ်။ သို့ဖြစ်၍ ဘေ့စ်ဂီတာကြီးကို ကရင်ပုဆိုး တစ်ထည်နှင့်ပက်ပြီး သယ်လာခဲ့ရတော့သည်။
"ရော့ ဗျာ၊ ကိုသျှပ်"
ဘေ့စ်ဂီတာကို လက်ထဲအပ်လိုက်သောအခါကျမှ တီးဝိုင်းတိုက်ဖို့ကိစ္စ၊ ဘာဆိုဘာမျှ မလုပ်သေးဘဲ ငုတ်တုတ်ကလေး ထိုင်စောင့်နေခဲ့သည့် ကိုသျှပ်က သူ၏ မျက်မှန်ထူထူလေးကို တစ်ချက်ပင့်ကာ -
"ဆရာမ၊ ကျွန်တော်တို့ စလို့ရပါပြီ" ဟု လုပ်တော့သည်။
(၁၈)
ဇူလိုင်လ၏ နေ့တစ်နေ့။
ဓာတုဗေဒဌာန၊ မေဂျာဖဲဝဲလ်အတွက် တစ်နေကုန်သီချင်းတိုက်အပြီး။ သူတို့သူငယ်ချင်းတစ်စု ဦးပြုံး(မိုးပြာ)ဆိုင်တွင် စကားဝိုင်းဖွဲ့ပြောဆိုနေကြရာမှ အောင်ကျော်ဦး (ကြွက်နီ)က -
"သာထူးရေ၊ တို့ဒီည Serenade လုပ်ရအောင်ကွာ" ဟု မသိမသာ စကားစလိုက်သည်။
"ခွေးသား၊ သီတဂူမှာ ဆိုချင်တာ မဟုတ်လား"
အကြောင်းသိ သာထူးက အတပ်ပြောလိုက်သည်။ သီတဂူသည် အဆောင်မရသောနယ်က ကျောင်းသူတွေကို လက်ခံပေးထားသည့် အပြင်ဆောင်ကလေး။ အောင်ကျော်ဦး စိတ်ဝင်စားသော ကောလိပ်ကျောင်းသူကလေးက သီတဂူဆောင်မှာနေသည်။
"အေးပါကွာ၊ ညနေကတည်းက မင်းနေရာဦးထားပေး"
အောင်ကျော်ဦးက ဘာဆိုဘာမျှ မသိသလိုမျိုး မျက်တောင်ကလေး တစ်ချက်နှစ်ချက် ပုတ်ခတ် ပုတ်ခတ်နှင့် နေရာဦးထားဖို့ ပြောရင်း အတည်ပြုပေးလိုက်သည်။
ထိုစဉ်တုန်းက ကိုသျှပ်သည် သီတဂူဆောင်နံဘေးနားက သီတာဦးဆောင်မှာ တစ်လှည့်။ ခေတ္တရာဆောင်မှာ တစ်လှည့်။ သူ့မိတ်ဆွေ အပေါင်းအသင်းများနှင့် ကြုံသလို နေနေခဲ့သည်။ ကိုသျှပ်က -
"ဟေ့ကောင် ကရင်။ မင်းရယ်။ ပထန်ရယ်။ ရေချမ်းရယ် လာမယ်ပေါ့"
"ဟုတ်တယ်၊ ကိုသျှပ်။ မြင့်သန်းက ပုန်းညက်မြိုင်မှာ တင်နေတာ"ဟု အောင်ကျော်ဦးက အားတက်သရော ဖြေလိုက်သည်။ ကိုသျှပ်ပါလာလျှင်တော့ ပွဲမြိုင်ပြီဖြစ်သည်။
"အေး ဟုတ်ပြီလေ။ ပထန်၊ မင်းနုတ်စ်တွေ အားလုံးယူခဲ့။ ဘုတ်ထောင်ဖို့ ကတ်ပါယူခဲ့။ ဖယောင်းတိုင်လည်း မမေ့စေနဲ့"
(၁၉)
ဤသို့ဖြင့် သူတို့တစ်တွေ ညချမ်းချိန်ခါ တေးသံသာဖို့ သီတဂူဆောင်ကို တပျော်တပါးကြီး ချီတက်ခဲ့ကြသည်။
သူတို့ရောက်သွားတော့ သာထူးရောက်နှင့်နေပြီ။ သီတဂူဆောင်ရှေ့နားလေးမှာ ဖျာစုတ်တစ်ချပ်နှင့် နေရာဦးထားပြီးခဲ့ပြီ။ သူတို့အုပ်စုထဲက တစ်လုံးတည်းသာ ဂစ်တာအသစ်ဖြစ်သည့် "ဂစ်တာ မြို့တော်"နှင့် သီချင်းဟဲနေပြီ။
"ထာဝစဉ်သာ …ချစ်တဲ့သူရဲ့အနားမှာနေလိုက်ချင်…။လည်တိုင်မှာ….၀တ်ဆင်လာတဲ့ဆွဲကြိုးလေး…ဖြစ်ချင်….။ ချစ်တဲ့သူ…မင်းကြည်ဖြူရင်…ပြောပြမယ်နားဆင်….။ မင်းရင်ထဲအသည်းထဲက …နှလုံးသားလေး…ဖြစ်ချင်…"
"သံသာသာတေးလေးတွေကို …မင်းနားဆင်ရင်အမြဲပင်…ကော်ရစ်ဒါခန်းမ….အလယ်က ပြတင်းပေါက်လေး…ဖြစ်ချင်။ ချစ်တဲ့သူ … မင်းကြည်ဖြူရင် …ပြောပြပါမယ်…နားဆင်။ မင်းငုံထားတဲ့ (…)လေး…ဖြစ်ချင်…"
ထိုနေရာအရောက်မှာ သကြားလုံးလေးဟု ဆိုရမည့်အစား ချေးတုံးလေးဟု သာထူးက ဆိုထည့်လိုက်ရာ သီတဂူ တစ်ဆောင်လုံးဝါးခနဲ ပွဲကျသွားတော့သည်။
(၂၀)
ထိုအချိန်မှာပင် ကိုသျှပ် ဆိုက်ဆိုက်မြိုက်မြိုက် ရောက်လာသည်။
"ဟေ့ကောင် သာထူး။ အဲဒီသီချင်းပြန်ဆိုမယ်"
သာထူးက ရုတ်တရက် ဘာပြောရမှန်းမသိ။ ကြောင်အမ်းအမ်းဖြစ်သွားရသည်။
"ဗျာ … ကိုသျှပ်"
"အေး…ဟုတ်တယ်။ ပြန်ဆိုကြမယ်။ မင်းက soprano ဆို။ ကရင်က tenor နဲ့ ငါက Alto ဆိုမယ်။ ပထန် မင်းက Bass နော်။ အေး … ဒီက နုတ်စ်တွေအတိုင်း မလွဲစေနဲ့" ဆိုပြီး ဆိုရမည့် နုတ်စ်များကို ချပေးလိုက်ပါတော့သည်။
(၂၁)
ဟာမိုနီတွေ စီစဉ်နေဆဲ ကြားကာလမှာ အတန်ကြာမျှ အသံတိတ်နေသောကြောင့် သီတဂူတစ်ဆောင်လုံးက ကျောင်းသူတွေ နားတစွင့်စွင့်။ ပြတင်းပေါက်က ပြူတစ်ပြူတစ်။ ဘာတွေများဖြစ်နေကြသလဲဟု စူးစမ်းစပ်စုကြသည်။
ကိုသျှပ်ကတော့ ဘာဆိုဘာမျှ ဂရုမစိုက်။ သီတဂူဆောင်ကို ယခုညမှာ သူလာတာက သီချင်းဆိုဖို့မဟုတ်။ ပထန်ကို နေ့လည်း နေ့အလျောက်၊ ညလည်း ညအလိုက်၊ ဂီတာ ဆက်သင်ပေးပြီး တစ်ဖွဲ့လုံးကို မောင်းဖို့သာဖြစ်သည်။
တကယ်တော့ဖြင့် သူတို့အဖွဲ့သားတွေ တစ်နေကုန် တစ်နေခန်း သီချင်းတိုက်ခဲ့ပြီးပြီ။ သီချင်းတိုက်တာမှ ရိုးရိုးမဟုတ်။ ကိုသျှပ်က အတိအကျမရလျှင် လက်သင့်မခံသူပီပီ နုတ်စ်တွေ အတိုင်း အတူတူအောင် တီးခဲ့ရသည်။
သို့သော် ကိုသျှပ်နှင့်ကဖြင့် ယခုလို မိန်းကလေးအဆောင်ရှေ့မှာ ညချမ်းချိန်ခါ တေးသံသာဖို့ကိုပင် လွတ်လပ်ခွင့်မရ။
"ကိုင်း …. ပြန်စမယ်"
ကိုသျှပ်၏ အမိန့်သံအောက်မှာ လေးယောက်သံပြိုင်တီးဝိုင်းစတော့သည်။ ဟာမိုနီအသံလေးသံကို နုတ်စ်အတိုင်း ထပ်တူမကျမချင်း ပြန်ဆိုရသည်။
"ချစ်တဲ့သူ မင်း…ကြည်ဖြူရင် ပြောပြပါမယ်၊ နားဆင်"
(၂၂)
သာထူး သီချင်းဆိုပြီးသွားသောအခါ
"ဟေ့ကောင် မြင့်သန်း။ ကိုင်ဇာ ဟိုသီချင်း ဆိုစမ်း" ဟု လုပ်ပြန်သည်။
သီချင်းက တေးရေးစာဆို စောဘွဲ့မှူးရေးဖွဲ့သည့် "အိမ်အပြန် ကျောင်းအဆင်းမှာ သီချင်းလေး..ဆို"
Banana Boats song ဖြစ်သည်။ ထိုသီချင်း အဆိုပိုဒ်ကိုလည်း ဟာမိုနီ မကျမချင်း အကြိမ်ကြိမ် ဆိုစေပြန်သည်။
"ကရင် မင်းက ငါ့အသံဘက် လာမရောနဲ့ကွ။ ဟိုကောင် ပထန်၊ မင်းက ဘေ့စ်ဆိုရမှာ။ တန်နာသံ မပါစေနဲ့။ ကဲဟုတ်ပြီ။ တစ်ခေါက်ပြန်စကြမယ်"
(၂၃)
ဆိုရလျှင် ယခုလို ကွိုင်ယာ Choir ဆိုတာ အောင်ကျော်ဦးအတွက် ဘာမျှမထူးဆန်း။ သူ၏ မိခင် ဒေါ်မာစီက ခရစ်ယာန်ဘာသာဝင်ဖြစ်သည်။ ငယ်စဉ်ကလေးဘ၀ကတည်းက ဘုရားရှိခိုးကျောင်း ဓမ္မတေးသီချင်း သီဆိုရာမှာ နားယဉ်ပါးပြီးသား။ အထိအတွေ့ရှိပြီးသား။
ထို့အပြင် သူကိုယ်တိုင်က ဘိုကနောင်ရပ်ကွက်သား။ ကရင် တိုင်းရင်းသားတွေနှင့်ချည်း ဖွဲ့စည်းထားခဲ့သည့် "မဟူရာ" အပျော်တမ်းတီးဝိုင်းမှာ ဒရမ်တီးခတ်နေသူ။ သူတို့ "မဟူရာ" အတွက် ဟာမိုနီက အခက်အခဲမရှိ။ အထူးအဆန်းမဟုတ်။ အမိုး၊ ဒေါ်ချယ်ရီ၊ မနိုး၊ ကိုပိုက်၊ ကိုဖရယ်ဒီ၊ ပိုးပိုး၊ အားကိုးတို့က ဟာမိုနီ လိုက်ပေးနေကျ။
ထို့သို့ လက်ပွန်းတသီး နီးစပ်နေသော်လည်း ဟာမိုနီ ဘာသာရပ်ကို သူမတတ်ကျွမ်း။ သီးခြားလေ့လာလိုက်စား ထားရကောင်းမှန်း သတိမပြုမိ။
ဒီညတော့ဖြင့် သူခံရပြီ။
မွန် ဗမာကပြား ကိုသျှပ်က ဟာမိုနီမှာ သူ့ဆရာ လုပ်နေခဲ့ချေပြီ။ သည်လိုနှင့် ကိုသျှပ်တစ်ယောက် ဟာမိုနီကို ကျကျနန ဆည်းပူးနေပြီဆိုတာကိုလည်း သိလိုက်ရသည်။ အောင်ကျော်ဦးစိတ်ထဲ နည်းနည်း မခံချင်သော်လည်း မနာလိုရုံမှအပ ဘာမျှမတတ်နိုင်။
(၂၄)
သီတဂူ အဆောင်သူတွေလည်း ထိုညတုန်းက အကြီးအကျယ် သည်းခံနားဆင်ခဲ့ရသည်။ အမျိုးသမီးအဆောင်ရှေ့ကို ကောင်လေးတစ်သိုက်လာပြီး ဂီတာတွေနှင့် တေးချင်းဖွဲ့ဆိုကြမှာကို တိတ်တခိုး အသာလေး နားအရသာ ခံချင်ကြတာ။ အခုတော့ဖြင့် လုပ်လိုက်ပုံက တစ်ခြားစီ။ ၀ါဆိုဖယောင်းတိုင်တွေ ထွန်းပြီး နုတ်စ်စတင်းတွေ ထောင်ကာ နုတ်စ်မကိုက် ကိုက်အောင်အကြိမ်ကြိမ် အထပ်ထပ် သီချင်းတိုက်နေကြသည့် အဖွဲ့နှင့်မှ လာတိုးရချေသည်။
ကိုသျှပ် အစီအစဉ်ဖြင့် သီချင်းလေ့ကျင့်နေကြရင်း ကြားဖြတ်ထဲမှာ ရေချမ်းတို့၊ ပထန်ကြီးတို့က ဆိုလိုသီချင်းလေးတွေ တစ်ပုဒ်စီလောက် ၀င်ဖျော်ဖြေပေးလိုက်၍သာ တော်တော့သည်။ ဘာပဲဖြစ်ဖြစ် အဆောင်နေ သူငယ်ချင်း မိန်းကလေးတွေ အတွက်က အတင်းအဖျင်းပြောစရာ၊ မချင့်မရဲနှင့် ရယ်စရာဖြစ်ကြသလို အံ့သြဘနန်း ဖြစ်ကြသည်။ ပြောစမှတ်ကြီး တွင်ကျန်ရစ်ခဲ့သည်။
အချို့ကတော့ဖြင့် စားစရာလေးတွေ ခိုးပေးပို့ရင်း အားပေးကြပါသေးသည်။
(၂၅)
သီတဂူအဆောင်ရှေ့မှာ သူတို့၏ ဆင်ဖိုနီဝိုင်းလေး ခေတ္တအားလပ်ချိန် ပေးထားသော အခိုက်အတန့် တစ်ချက်မှာ အောင်ကျော်ဦးက ကိုသျှပ် အနီးနားအသာကပ်ပြီး -
"ကိုသျှပ်၊ ယုဇနဆောင် ဒင်နာကျရင် အဖွင့်ကို အဆောင်သူတွေရဲ့ ကွိုင်ယာနဲ့ ဖွင့်ချင်တယ်လို့ ဆရာမ ဒေါ်နော်မာအေးက ပြောနေတယ်။ ဟို… ရေဒီယို သီချင်းတစ်ပုဒ် ရှိတယ်လေ။ သာယာသော ညနေခင်းချိန်ခါ… သာယာသောညနေခင်းချိန်မှာ …. ညှင်းလေပြေ ဆော့မြူကာ …။ အဲဒီမယ်လိုဒီကို အဆောင်နဲ့ လိုက်မယ့် စာသားသွင်းပေးပါတဲ့"
ကိုသျှပ်အတန်ငယ် တွေသွားသည်။ နည်းနည်းစဉ်းစားပြီး ခဏနေတော့မှ -
"အဲဒီလိုတော့ ရှိပြီးသားကြီး အပေါ်မှာ ငါမရေးချင်ဘူးကွာ။ ရေးမယ်ဆိုလည်း အသစ်တစ်ပုဒ်ရေးပေးမယ်" ဟုဆိုသည်။ အောင်ကျော်ဦး ထခုန်ချင်မတတ် ၀မ်းသာသွားသည်။ သူလိုချင်တာကလည်း ဒါပဲလေ။
(၂၆)
ထိုညက သူတို့၏ သီတဂူဆောင် ညချမ်းချိန်ခါ တေးသံသာဝိုင်းကို သိမ်းအပြီး အားလုံး လူစုခွဲ၍ အသီးသီး အသကပြန်ကုန်ကြပြီ။
ကိုသျှပ်၊ အောင်ကျော်ဦးနှင့် သာထူးတို့ သုံးယောက်သာ သီဟဆောင်လမ်းကွေ့က ကံ့ကော်တောအုပ်ထဲမှာ ထိုင်ရင်း ကျန်နေခဲ့ကြသည်။ တစ္ဆေခြောက်သည်ဟု နာမည်ကြီးလှသော ကံ့ကော်တောအုပ်။
သာထူးက မဟန်နိုင်တော့သည့်အဆုံး ခင်းထားသည့် ဖျာပေါ်တွင် အိပ်ပျော်သွားခဲ့သည်။ အောင်ကျော်ဦးနှင့် ကိုသျှပ်တို့သာ ညကိုအဖော်ပြုရင်း ကျန်ရစ်ကြတော့သည်။
"ကိုသျှပ်"
အောင်ကျော်ဦးက ထိုသို့ စကားအစ။ တစ်ခုခု ပူဆာတော့မည်ဆိုတာကြိုတင် သိနှင့်နေသလိုမျိုး ကိုသျှပ်က ငဲ့စောင်းကြည့်သည်။
"ကျွန်တော့်ကို “Dust in the wind” တီးတာလေး သင်ပေးပါလားဗျာ"ဟု မရဲတရဲ ဆိုမိသည်။
"မင်းက ဒရမ်သမားပဲကွ"
"မဟုတ်ဘူးဗျာ။ အဲဒီသီချင်းကို ကျွန်တော် ဆိုတတ်ချင်တယ်။ ကျော်ဟိန်း ဆိုထားတာလည်း ရှိတယ်လေ။ အမေ့ရင်မှာ ကြီးပြင်းခဲ့ဖို့ သားလေးတစ်ယောက်ကို ဖန်ဆင်းထား…"
ထိုစာသားကို ရွတ်ပြရင်း အောင်ကျော်ဦး၏ အသံက မသိမသာလေး တုန်ရီလှုပ်ခါသွားခဲ့သည်။
(၂၇)
ကိုသျှပ်က အောင်ကျော်ဦး၏ စိတ်ကို ချက်ချင်းဖတ်၍ ရသွားသည်။ ခံစားချက်ချင်း ကူးစက်ကြည့်၍ ရခဲ့သည်။
အောင်ကျော်ဦးမှာ အမေဆုံးထားတာ တစ်နှစ်ပင်မပြည့်သေး။ သူကိုယ်တိုင်ကကော။ အမေ့ရင်ခွင်က ရေခြားမြေခြား မော်လမြိုင်မှာ။ သူကသာ ခြေကန်ပြီး ခေါင်းမာစွာနှင့် ပုသိမ်မှာ ကျန်နေခဲ့တာ။ အမေဝေးသည့် သားတစ်ယောက်ပါပဲ။
"အေး၊ ငါပြပေးမယ်"
ထိုသို့လှိုက်လှိုက်လှဲလှဲဆိုပြီး ဆရာစား မထား။ မခြွင်းမချန် ကော့ဒ်ကွန်စထရပ်ရှင်းဆိုတာ ဘယ်လို၊ Tonic, Major 3rd, Perfect 5th အစရှိသဖြင့် စနစ်တကျ ပီပီပြင်ပြင် သင်ပေးခဲ့သည်။
ထိုတစ်ည၏ သင်ခန်းစာနှင့်ပင် အောင်ကျော်ဦးလည်း “Dust in the wind” သီချင်းကို ယနေ့အထိ အလွတ်တီးတတ်သွားခဲ့ပါတော့သည်။
(၂၈)
၁၉၈၃ ခုနှစ်။ ဇူလိုင်လ ၂၇ရက်။
ယုဇနဟောလ် ဒင်နာ။ ကန်သာယာခန်းမကြီးထဲမှာ သူတို့ တီးဝိုင်းက စင်မြင့်ပေါ်တွင် အဆင်သင့်ဖြစ်နေကြပြီ။ အဖွင့်တီးလုံး သွေးပူလည်း တီးပြ ပြီးကြပြီ။ ငြိမ်သက်နေသည့် တဒင်္ဂအပြီးတွင် အဆောင်ကျောင်သူများ ကိုယ်စား စတုတ္တနှစ်ကျောင်းသူ၊ အစ်မကြီး မမြတ်မွန်(နောင် ဓာတုဗေဒဌာန၊ ရန်ကုန်တက္ကသိုလ်) က အခမ်းအနားမှူးအဖြစ်နှင့်-
"ကျွန်မတို့ ယုဇနဆောင်ရဲ့ နှုတ်ဆက်ညစာစားပွဲမှာ တက်ရောက်ချီးမြှင့်ကြတဲ့ ဆရာကြီး၊ ဆရာမကြီးများနှင့်တကွ ဖိတ်ကြားထားတဲ့ အထူးဧသည့်သည်တော်ကြီးများ သူငယ်ချင်းများကို ယုဇနအဆောင်သူလေးများက နှုတ်ဆက်သီချင်းနဲ့ ပထမဆုံးစတင်သီဆို ဖွင့်လှစ်ပါ့မယ်ရှင်။ အဲဒီ "နှုတ်ဆက်ပါတယ်" ဆိုတဲ့ သီချင်းလေးကို Shore of Peace တီးဝိုင်းမှာ ဘေ့စ်ဂစ်တာ တီးပြီး၊ အရိန်းခ်ျမင့် လုပ်ပေးတဲ့ ဒုတိယနှစ် သိပ္ပံဇီဝကျောင်းသား သျှပ်မှူးကျော်က ရေးဖွဲ့ပေးထားတာ ဖြစ်ပါတယ်ရှင်" ဟု ကြေညာပေးလိုက်သည်။
(၂၉)
အစွမ်းကုန် ဖြီးလိမ်းခြယ်သထားသော ယုဇနအဆောင်သူလေးများ စင်ပေါ်မှာ စီစီရီရီနေရာယူခဲ့ကြပြီ။ မီးရောင်အောက်မှာ အားလုံးပဲ လှပနေကြသည်။ ဂီတနှင့်အတူ ချိုလွင်နုပျိုသော အသံလေးများနှင့် -
"နှုတ်ဆက်ပါတယ် မိတ်ဆွေတို့ …ခေါင်းလောင်းသံလည်း …တိတ်ပြီမို့။
နှုတ်ဆက်ပါတယ် ချစ်ဆွေတို့… ယုဇနရင်ခွင်ချစ်တဲ့သူတွေမို့။
ကန်ရေပြာလည်း မျက်ရည်စို့…။ မာစေသာစေတောင်းဆုချွေပါစို့" ဟု စတင်လိုက်ကြသည်။
"ပြန်ဆုံနိုင်ဖို့ရာ ရင်မှာတောင်းဆုပြုလျက်သာ။
ရေကြည်ချမ်းမြကြည်လင်လန်းစေဖို့ရာ…
နောင်တစ်ချိန်ပြန်တွေ့ရင်ခေါ်ပါပြောဦး …နှုတ်ဆက်ဦးမလား။
ပျော်ရွှင်စရာအချိန်တွေကို…ကိုယ်မမေ့ပါ"
အဆိုပါ ဇူလိုင် အနှောင်းပိုင်း ညတုန်းက မိုးတွေသည်းလှသည်။
သြော်….။
"ပျော်ရွှင်စရာ အချိန်တွေကို ကိုယ်မမေ့ပါ"
ပုသိမ်ကောလိပ်၊ ယုဇနအဆောင်နှင့် ပက်သက်ခဲ့သည့် ထိုသီချင်းသည် ယခုအချိန်ထိ ကောင်းနေဆဲ။ ယခုအချိန်ထိ သက်ဆိုင်သူတို့ ရင်ထဲမှာ ရှိနေဆဲ။ တေးဂီတနှင့် ထုံမွှန်းထားခဲ့သည့် မမေ့နိုင်စရာ ကောလိပ်ညတစ်ည၏ သီချင်းတစ်ပုဒ်။
(၃၀)
တီးဝိုင်းစင်ပေါ် စတက်ချိန်မှာ အဖွင့်မိတ်ဆက် သွေးပူ သဘောမျိုး တီးခတ်ဖို့အတွက် Instrumental တစ်ပုဒ်လည်း ကိုသျှပ် လုပ်ထားခဲ့သည်။ အဆိုပါ Roman Guitar တီးလုံးကို ယခုအချိန်ထိ ပုသိမ်မြို့မှာ တီးနေကြဆဲ ဖြစ်သည်။ ဒါကို မတီးလိုက်ရလျှင် ၀ိုင်းက လမိုင်းမကပ်ဟု ယူဆကြသည်။
အခန်း(၉) ရေမျောကမ်းတင် ခြေဦးတည့်ရာ
(၁)
၁၉၈၃ ခုနှစ်အကုန်။
စာမေးပွဲလည်း ဖြေပြီးပြီ။ အမေ့ရင်ခွင်နှင့်ဝေးနေခဲ့တာလည်း အတော်ကြာသွားပြီ။ သို့ဖြင့်နောက်ဆုံးတော့ မော်လမြိုင်ကို လိုက်သွားဖို့ ကိုသျှပ်ဆုံးဖြတ်လိုက်သည်။
ပုသိမ်မြေမှာ ကုတ်ကတ်ဖက်တွယ်ပြီး ကိုသျှပ်သောင်တင်နေခဲ့တာ။ အခုတော့ အချိန်တန်ပြီ။ အမေ့အိမ်သို့ သူပြန်သွားတော့မည်။
ဂီတအပေါင်းအသင်း သူငယ်ချင်းတွေအားလုံးကတော့ ကိုသျှပ်ကို မသွားစေချင်။ ကိုသျှပ်ထွက်ခွာသွားလျှင် သူတို့မှာ အစားထိုး၍ မရနိုင်သော ကွက်လပ်ကြီး တစ်ခုကျန်ရစ်လိမ့်မည်ဆိုတာ သိကြသည်။ သို့သော် တားမြစ်၍လည်း မဖြစ်စကောင်းသောအရာ။
မော်လမြိုင်အိမ်ပြန်ခရီးမှာ အောင်ကျော်ဦး (ကြွက်နီ)လိုက်ပါသွားသေးသည်။ သူတို့နှစ်ယောက်၏ သံယောဇဉ်အနှောင်အဖွဲ့က ကြီးမားလှချေသည်။ အောင်ကျော်ဦးကို ကိုသျှပ်က ညီအရင်းတစ်ယောက်လိုချစ်သည်။ အောင်ကျော်ဦးကို သူအမြဲထိန်းသိမ်းပေးခဲ့သည်။
"ကြွက်နီဟာ အင်မတန်အတဲ့ နုံတဲ့ကောင်။ ဒီကောင်နဲ့ ဆက်ဆံဖူးတဲ့လူတိုင်း သူ့အကြောင်းသိတယ်။ မင်းလည်း သိတာပဲ။ သူနုံလို့ အလို့သာ မင်းတို့ လှည့်တိုင်း ခံခဲ့ရတာပဲ" ဟု သူငယ်ချင်းတစ်ယောက်ကို ကိုသျှပ်ပြောဖူးသည်။
(၂)
ပုသိမ်ကို အောင်ကျော်ဦးပြန်မည်ဆိုတော့ ကိုသျှပ်ကစိတ်မချ။ ချစ်ခင်လှစွာ ကတိတွေအမျိုးမျိုးတောင်းသည်။ တီးဝိုင်းကို ဖျက်မပစ်ဖို့။ နုတ်စ်နှင့် ဂီတာတီးတာ
မှန်မှန်လေ့ကျင့်ကြဖို့ အထပ်ထပ်အခါခါမှာသည်။
"ဟေ့ကောင် ကရင်။ ပုသိမ်ပြန်ရောက်ရင် မင်းလည်းစာရေး။ ဟိုကောင်တွေကိုလည်း ရေးခိုင်း။ ငါလည်းဒီကနေ စာရေးမယ်။ သီချင်းအသစ်တွေ ရေးဖြစ်ရင်လည်း လှမ်းပို့ပေးလိုက်မယ်" ဟုဆိုသည်။
"ပုသိမ်ကို ငါလာခဲ့ဦးမှာပါကွာ" ဆိုသော စကားသံမှာတော့ဖြင့် တုန်ခါ လှိုက်မောနေခဲ့သည်။
(၃)
အချိန်တန်၍ အောင်ကျော်ဦး ပုသိမ်ပြန်သွားသောအခါ ကိုသျှပ်တစ်ယောက် မော်လမြိုင်မှာ ငေါင်တောင်တောင်နှင့် ကျန်ရစ်ခဲ့ရချေတော့သည်။
အောင်ကျော်ဦးကို ကိုသျှပ်သံယောဇဉ်တွယ်ခဲ့သလို ကိုသျှပ်တို့ တစ်အိမ်လုံးကလည်း မိသားစုအရင်းအချာ တစ်ယောက်သဖွယ်ချစ်ခင်ခဲ့ကြသည်။ ကိုသျှပ်၏ ညီငယ်တွေနှင့်ဆိုလျှင်လည်း တစ်သားတည်းကျအောင်ပင် လုံးထွေးနေခဲ့ကြသည်။
ယခုတော့ဖြင့် အောင်ကျော်ဦးလည်း ငြိမ်းချမ်းရေးကမ်းခြေ Shore of Peace တီးဝိုင်းလေးရှိရာ ပုသိမ်မြေသို့ ပြန်သွားခဲ့ချေပြီ။ အောင်အောင်၊ ရေချမ်း၊ သာထူး၊ သူတို့ ဂီတညီအစ်ကိုတွေနှင့် ကိုသျှပ် ဘယ်အချိန် ဘယ်အခါ ပြန်ဆုံနိုင်မည် ဆိုတာ ဘာမျှမရေရာ။
မော်လမြိုင်မှာ မိသားစုနှင့်အတူတူ နေသာ နေနေရသော်လည်း ကိုသျှပ်စိတ်ထဲမှာ အာသာမပြေ။ ဟာတာတာကြီး ဖြစ်နေသည်။
(၄)
မော်လမြိုင်ကို သူပြန်ရောက်လာသည့်အတွက် ၀မ်းအသာဆုံးကတော့ အမေပဲဖြစ်လိမ့်မည်။ အဖေလည်း စိတ်ထဲ ပျော်ရွှင်ကျေနပ်လိမ့်မည်သာဖြစ်သည်။ ယခင်တုန်းက ပုသိမ်မှာ စာမေးပွဲကျ၊ အိမ်ကို ချက်ချင်းပြန်မလာ၊ သောင်မတင် ရေမကျ ဖြစ်နေခဲ့တာတွေအတွက် အဖေ စိတ်ဆိုးခဲ့ဖူးသော်လည်း ယခု ဘာဆိုဘာမျှ မပြော။ သားကြီးတစ်ယောက် အိမ်ပေါ် ဆိုက်ဆိုက်မြိုက်မြိုက် ပြန်ရောက်လာသည့် အချက် တစ်ခုတည်း အတွက်နှင့်ပင် အဖေ ကျေနပ်နေပုံ ရသည်။
ပုသိမ်မြို့မှ မော်လမြိုင် ဒီဂရီကောလိပ်သို့ Marine Biology အဏ္ဏ၀ါ ဇီဝဗေဒ မေဂျာ လာတက်ကြသည့် ကိုကျင်အောင်၊ ကိုအောင်သူတို့က ကျောင်းပိတ်ရက်တွေ ကျလျှင် ကိုသျှပ်တို့ အိမ်သို့ လာလာလည်ကြသည်။ ထိုအခါမျိုးကျလျှင် ပုသိမ်ကို အလွမ်း ပြေရသည်လား၊ ပုသိမ်ကို အလွမ်း ပိုရသည်လား ဆိုသည်ကိုပင် ခွဲခြား ပြောပြ မတတ်နိုင်တော့ပြီ။
သူ့စိတ်တွေက ပုသိမ်မှာပဲ သူငယ်ချင်းတွေဆီမှာပဲ ကျန်နေသည့်နှယ်။
(၅)
မော်လမြိုင်မှာ မပျော်ပိုက်သလို နေဖြစ်တာလည်း ရက်ပိုင်း၊ လပိုင်း စွန်းရုံလေးပဲ ကြာလိုက်သည်။
ထိုအတောအတွင်းမှာ အမေ့ လုပ်သက် ၂၄ နှစ်စာအတွက် လုပ်သက် ပင်စင် ထုတ်ယူဖို့ ရန်ကုန် သွားစရာ ကိစ္စ ပေါ်ပေါက်လာသည်။ ကိုသျှပ်က အမေ့ကို အဖော် ပြုပေးဖို့ ရန်ကုန်သို့ လိုက်လာခဲ့သည်။ အဖေ့ ဦးကြီး၏ ရန်ကင်း အိမ်မှာ သားအမိ နှစ်ယောက် တည်းခို။ အမေ့ ပင်စင်ကိစ္စအတွက် ရုံးတွေသွား။ စာရွက်စာတမ်းတွေ ဆောင်ရွက်။
တစ်ဘက်မှာ ရန်ကုန်ရောက် ပုသိမ်သားတွေဆီ ကိုသျှပ် သွားသွား လည်သည်။ တည်းအိမ်သို့ ပန်းချီ ကိုအောင်မင်းက ကိုသျှပ်နှင့် လိုက်လိုက်လာသည်။
တစ်ပတ် ဆယ်ရက်ခန့် အကြာတွင် အမေ့ ပင်စင် ကိစ္စ၀ိစ္စတွေလည်း လက်စသတ်ပြီ။ မော်လမြိုင် ပြန်ရတော့မည်။ ကိုသျှပ် ရန်ကုန်မှာ အဖော်သစ်တွေ တွေ့တော့ အိမ်ကို ပြန်မလိုက်ချင်။ အစကတည်းက လမ်းတရှာတည်း ရှာနေခဲ့သည်။
သို့ဖြင့် ပြန်ခါနီးမှာ အမေ့ကို ကပ်၍
"အမေရယ်၊ သား သူငယ်ချင်းတွေနဲ့ ဒီမှာ ခဏ နေခဲ့ဦးမယ်" ဟု အသာ ချွဲကာ ပူဆာသည်။
"အဖေ . . .ပြောနေဦးမယ်" ဆိုလည်း မရ။
"အမေပဲ ကြည့်ရှင်းပြလိုက်ပါ" ဟု ဆိုသည်။
ဤသားကြီးက ပူဆာပြီးဆို အမေ အလို မလိုက်ဘဲ မနေနိုင်။ အမေသည် အမေပဲလေ။ သည်လိုနှင့် မော်လမြိုင်ကို အမေ တစ်ယောက်တည်း ပြန်လာခဲ့ရသည်။
(၆)
ကိုယ့်မှာ ရှိထားသမျှ အခံနှင့် ရန်ကုန်ဆိုသော ထုကို ၀င်တိုးဖို့ ဆိုတာ နယ်မှ လူငယ် တစ်ယောက် အနေနှင့် ရင်ခုန်စရာ ကောင်းလှသည်။
ကျော်မြင့်လွင်မှာက ဂီတနှင့် စာပေ အနုပညာ ပါရမီအပြင် ကြံ့ခိုင်သော စိတ်ဓာတ်တော့ ရှိသည်။ သို့သော် သူ့ အသက်အရွယ်နှင့် အတွေ့အကြုံတွေက အတန်အသင့် နုငယ်သေးသည် ဆိုရမည်။ သူ့ လက်ချောင်းများမှာ အားမပြည့်သေး၍ တံခါးတွေကို သူမဖွင့်နိုင်။ ရေခင်းမြေခင်း အခွင့်သာသည့် အခြေအနေမျိုးကို သူ မဖန်တီးနိုင်။
စံရိပ်ငြိမ် အဆောင်ဘက်မှာကလည်း လူဟောင်းတွေ တစ်ယောက်မျှ မရှိကြတော့သည့်အတွက် အလွမ်း မပြေချင် စရာ။ တစ်ခေါက်တော့ သူ လျှောက်သွား ကြည့်ခဲ့သေးသည်။ အားလုံးက မျက်နှာစိမ်းတွေ။ ဤနေရာနှင့် တစ်ချိန် တစ်ခါတုန်းက ရင်းနှီး ကျွမ်းဝင် နေထိုင်ခဲ့ဖူးသည် ဆိုတာပင် မယုံချင်စရာ။ ပန်းပွင့်တွေ မြေပေါ်မှာ ဖွေးဖွေး လှုပ်အောင် ကြွေကျနေသည့် တရုတ် စကားပင်ကြီးသည်ပင် တစ်ချိန် တစ်ခါတုန်းက ပန်းကြွေတွေ ကောက်ခဲ့ဖူးသော သူ့ကို မမှတ်မိချင်ယောင်ဆောင် နေခဲ့သည်။
ရန်ကုန်က သူ့ကို လက်ကမ်း မကြိုဆို။ ကျောချစရာ တစ်နေရာ မဖြစ်ဖြစ်အောင် လုပ်၍ ရသော်လည်း သိုင်းဝိုင်းစရာ မရှိ။ သိုဖြင့် ခြေဦးတည့်ရာ သူ ထွက်လာခဲ့သည်။
(၇)
ပြည်မြို့ အရှေ့ဘက် ၀က်ထီးကန် ဒေသ။
စံရိပ်ငြိမ် ၆ လမ်း အဆောင်တုန်းက အစ်ကိုကြီး တစ်ယောက်သဖွယ် သူ ခင်တွယ်ခဲ့ဖူးသော ကိုသီဟန်သွင်က ၀က်ထီးကန်သို့ သိုက်မြုံ ပြောင်း၍ တွဲဖက် ကျောင်းဆရာ သွားလုပ်နေသည်။ သည်လိုနှင့် သူ့အပေါ် နွေးထွေးသော ကိုသီဟန်သွင် ဆီမှာ ယာယီ ကွန်းခို ဖြစ်ခဲ့သည်။
ဘာပဲပြောပြော ၀က်ထီးကန်မှာ သူ့ အမောတွေ ခေတ္တ ဖြေခွင့် ရခဲ့သည်။
သူ့မှာ လူငယ်တစ်ယောက်၏ အလျံတညီးညီး ဖြစ်ပြီး မပြည့်ဝနိုင်သော လိုအင်ဆန္ဒ ကွက်လပ်တွေက တင်းကြမ်း ထနေသည်။ ဒီအချိန်မှာ သူ ဖြစ်ချင်တာတွေက ရိုးရိုးစင်းစင်း နည်းနည်းကျဉ်းကျဉ်းလေးပဲ ဖြစ်စေ၊ မြင့်မား များပြားလွန်းသည် ဖြစ်စေ၊ သူ လုပ်နိုင်စွမ်းကတော့ သိပ်ကို နည်းလွန်းနေသည်။ အဘက်ဘက်မှ တုပ်နှောင် ထားခြင်း ခံရသလိုမျိုး ဖြစ်နေသည့် အပေါ် အပြစ် တင်စရာက သူ့ကိုယ်သူပဲမြင်သည်။ အဲသလို ဖြစ်နေတာကို သူ့ဘာသာပဲ အာသာ မပြေနိုင် ဖြစ်ရပြန်သည်။
တွဲဖက် ကျောင်းဆရာ ကိုသီဟန်သွင်က ကျောင်းသို့ စာသင်ဖို့ ထွက်သွားချိန်များတွင် သူက အိမ်ရှိ တပည့်အကူလေး တစ်ယောက်နှင့်အတူ ချက်ပြုတ်ပြီး ကျန်နေရစ်ခဲ့သည်။ စံရိပ်ငြိမ် ၆ လမ်း မှာတုန်းကလည်း အစ်ကိုကြီးတွေ အသီးသီး ထွက်သွားကြလျှင် သူတစ်ယောက်တည်း ချက်ပြုတ်ဖို့ ကျန်ရစ် နေတတ်သည်။ တစ်ခါတလေ ညစာ ဟင်းအတွက် ချက်စရာ မရှိလျှင် အဆောင်ရှေ့မှ တရုတ်စကားပွင့်တွေ ကောက်ပြီး စကားပွင့်ပြုတ်သုပ် တစ်ခွက်ကိုတော့ သူ ဖန်တီးတတ်သည် မှန်သော်လည်း အခုကျတော့ အခြေအနေက မတူ။
ရှေ့ကို လှမ်းမျှော်လိုက်လျှင် မှိန်မှိန်ရေးရေး မှုန်ပျပျလေးပဲ မြင်နေရပုံမှာ ဘာဆိုဘာမျှ မခန့်မှန်းနိုင်စရာ။ ဆောင်းနားသော ၀င်ရိုးစွန်း ၀က်ဝံ၊ နွေတွင်းခိုသော ဖား၊ ဂူအောင်း ကျင့်နေသည့် သိုင်းသမား အဖြစ် စိတ်ဖြေသိမ့်စရာ မရှိ။
(၈)
တီးခတ်စရာ ဂီတာ တစ်လက် ရှာဖို့။ သူ ရေးစပ်ထားသော သီချင်းတွေ အကြောင်း ပြောဆိုဖို့ ဤနေရာမှာ မဖြစ်။ သူများတွေ ဂီတာ တီးနေကြတာ တွေ့လျှင် သူ့ သွေးထဲမှာ မချိုမြိန်။ သူ့စိတ်ထဲမှာခံစားရသမျှ အရှိအတိုင်း ပြောလိုက်ရလျှင်လည်း ရှိစုမဲ့စု အမြစ်တွေပဲ ပြတ်ထွက်ကုန်လိမ့်မည်။ ပုသိမ် ကောလိပ်မြေက ငြိမ်းချမ်းသော ကမ်းခြေပေါ်ရှိ အောင်ကျော်ဦး၊ အောင်အောင်၊ ရေချမ်း၊ သာထူးတို့ကိုတော့ လွန်လွန်မင်မင်ကိုပဲ လွမ်းဆွတ် တမ်းတမိသည်။ သို့သော်လည်း သူတို့ကို လွမ်းလေလေ၊ ဂီတာကို ကောက်မကိုင်ချင်လေလေဟုပင် ဆိုရမလား မသိ။
(၉)
ဂီတနှင့် သူ့အကြားမှာ သံယောဇဉ်တော့ မပြတ်။
ထိုရစ်ပတ် နှောင်ဖွဲ့မှုမှာ ဘာကြားခံ တူရိယာပစ္စည်းမျှ မလို။
(၁၀)
ကိုသီဟန်သွင် နေ့ခင်း ကျောင်းသွားချိန်၌ အားလပ်တိုင်း ဗလာစာအုပ် တစ်အုပ်နှင့် ကျော်မြင့်လွင် သီချင်း ရေးသည်။
ညတိုင်း စာသင် ပြီးချိန်များတွင် အားနေသော ကျောက်သင်ပုန်း အပေါ်၌ ဂီတသင်္ကေတတွေ ချရေးသည်။
ဤနည်းဖြင့် သူရေးထားသော သီချင်းတွေကို သူ့ဘာသာ မျက်စိဖြင့် ကြားခွင့် ရ၍ နားဖြင့် မြင်ခွင့် ရလာသည်။
ဒို-ရေ-မီ-ဖာကို သူ့စိတ်တိုင်းကျ အော်ဟစ် ရွတ်ဆိုနေ၍ ရသည်။ ဤလေ့ကျင့်ခန်းများ လုပ်ဖြစ်လေလေ၊ သူ၏ ဂီတကြွက်သားများ သန်မာလာလေလေ ဖြစ်သည်။ အသံထွက်ပြီး ဂီတာတီးနေတာ မဟုတ်၍ အခြား သူများနှင့် ညှိနှိုင်းစရာ မလို။ သီချင်း ဆိုနေတာ မဟုတ်၍ သူတစ်ပါး၏ ဝေဖန်ခြင်းကို မခံရ။
သူကစားနေတာက အဆင့်မြင့် ဂီတသင်္ကေတများ ဖြစ်၍ တော်တန်ရုံ ဘယ်သူမျှ နားမလည်။ သူ လုပ်နေသမျှ အရူးတစ်ယောက်လိုသာ ထင်ကြလိမ့်မည်။ ဤသို့ဖြင့် သူ့ကိုယ်ပိုင် လွတ်လပ်သော အကန့်လေး တစ်ခုကို ကိုယ့်ဘာသာ တည်ဆောက်ထား လိုက်နိုင်ခဲ့သည်။
တစ်ခါတစ်လေ ညကြီး တအား နက်ရှိုင်းသွားသည်အထိ ဂီတသင်္ကေတတို့၏ စိတ်ကူး အသံများထဲမှာ စူးစူးနစ်နစ် အာရုံ ၀င်စားပြီး သူတစ်ယောက်တည်း ရွတ်ဖတ်သရဇ္ဈယ်ရင်း အချိန်ကုန်မှန်း မသိ ကုန်သွားတတ်သည်။ သူ့ဘာသာ ခြေကုန် လက်ပန်းကျပြီး အပျော်မော မောနေတတ်သည်။ မိုးလင်းကာနီးကျမှ ကစား၍ ၀သည့် ကလေးလေး တစ်ယောက်လို နှစ်ခြိုက် အိပ်မောကျ သွားတတ်သည်။
(၁၁)
ပွဲတော်ကာလ၊ စတိတ်ရှိုးချိန်နှင့် ကြုံလျှင်တော့ဖြင့် ကိုသီဟန်သွင်နှင့် အတူ သူ အဖော် လိုက်သွားပြီး နားထောင်ဖြစ်သည်။ သို့သော် သာမန် နားဆင်သူ ပရိသတ် တစ်ယောက်နှင့်သာ ဖြစ်သည်။
ပုသိမ်တုန်းက စတိတ်ရှိုး စင်မြင့်တွေပေါ်မှာ သူ အသက် ငယ်ငယ်အရွယ်နှင့်ပင် တီးခတ် သီဆို ဖျော်ဖြေခဲ့ဖူးတာတွေ၊ ပုသိမ် ကောလိပ်မြေမှာ တီးဝိုင်းကလေးတစ်ခုကို သူကိုယ်ပိုင် ဦးစီး ဦးဆောင် ဖွဲ့စည်းခဲ့ဖူးတာတွေ ဘယ်သူ့မျှမပြောပြ၍ ဘယ်သူမျှလည်း မသိကြ။
လူတိုင်းမှာ ကိုယ့်အတ္တ၊ ကိုယ့်မာန ကိုယ်စီနဲ့ပဲ ဖြစ်သည်။ သို့သော် ကျော်မြင့်လွင်က သူ့အတ္တမာနကို အချိန်အခါနှင့် နေရာ မှားယွင်းစွာ ဖော်ထုတ်ပြမည့် လူစားမျိုး မဟုတ်ချေ။ သူ့အကြာင်းကို သူ ပွင့်ပွင့်လင်းလင်း အိတ်သွန်ဖာမှောက် မပြောပြရုံသာမက ဖျော်ဖြေနေကြသည့် စတိတ်ရှိုးတို့၏ သီချင်း ဂီတနှင့် တီးဝိုင်း အကြောင်း အကောင်းအဆိုး ဘာမျှဝေဖန် မှတ်ချက်ချခြင်း မရှိ။ တိတ်တိတ်ကလေးကြည့်ပြီး တိတ်တိတ်ကလေး ပြန်လာတတ်သည်။ ပြောစရာဆို တစ်ခြား စကားပဲ ဆိုမည်။ ဂီတနှင့် ပတ်သက်လျှင် အစွမ်းကုန်အောင် နှုတ်ပိတ် ရေငုံနေခဲ့သည်။
(၁၂)
ရေမျောကမ်းတင် သစ်ကိုင်းသစ်ခက် တစ်ခုသဖွယ် ၀က်ထီးကန်မှာ သောင်တင်နေခဲ့တာ အချိန် အတော်ကြာသွားသည်။ သို့သော် ဤနေရာတွင် သူ့အတွက် အမြစ်တွယ်စရာ မရှိတာ သူ သိသည်။ အချိန် အကန့်အသတ်မဲ့ နေသွားဖို့ ဆိုတာ မဖြစ်နိုင်။ ကာလ အတိုင်းအတာ တစ်ခု ကျော်လွန် သွားသောအခါမှတော့ နှုတ်ဆက် ခွဲခွာဖို့ ဆုံ့းဖြတ်ရသည်။
ကိုသီဟန်သွင်၏ အရိပ်ကလေးကို ကျောခိုင်းပြီး သူထွက်ခွာ လာခဲ့ပြန်ပြီ။ သည်တစ်ခါ သူဦးတည် သွားတာက ပုသိမ်။
(၁၃)
ပုသိမ်ကို မရောက် ရောက်အောင် ပြန်သွားဖို့ သူ့ ကိုယ်ထဲက သွေးတောင်း နေခဲ့ရခြင်း အကြောင်းအရင်း တစ်ရပ်မှာ ပုသိမ်ကောလိပ်၏ စတိတ်ရှိုး ရာသီ တစ်ဖန် ပြန်လည် ကျရောက်လာသောကြောင့် ဖြစ်သည်။
ဤအချိန် ဤအခါ ရောက်လာလျှင် သူ့စိတ်က အပေါက် တစ်ပေါက်ကို ထိုးထွင်း သိနေပြီ။ မနှစ်တုန်းကဆိုလျှင် သူတို့တစ်တွေ၏ " ငြိမ်းချမ်းကမ်းခြေ " Shore of Peace အဖွဲ့ဝိုင်းက ပုသိမ်ကောလိပ်မှ ဂီတ လှုပ်ရှားမှု စင်မြင့် အားလုံးလိုလိုကို အပိုင် သိမ်းပိုက်ခဲ့သည်ပဲ။ ဒီနှစ် ဒီချိန် ရောက်ပြီိဆို သူတို့ အဖွဲ့သားတွေ တီးဝိုင်း တိုက်နေကြတော့မည်။ သူ ရောက်လာမှာကိုလည်း မျှော်လင့်နေကြလိမ့်မည် ဆိုတာ သူတပ်အပ် ပြောနိုင်သည်။
(၁၄)
တကယ်လည်း Shore of Peace အဖွဲ့သားများသည် ပုသိမ်ကောလိပ် အခန်း ၁၀၇ မှာသီချင်းကျင့် နေခဲ့ကြသည်။
Shore of Peace မှာ ကိုသျှပ် ထွက်သွားကတည်းက လူအများကြီး လျော့သွားခဲ့ သည်။
ကိုသျှပ်က " မင်းတို့ ကြိုက်တဲ့လူ ရှိရင် ခေါ်တီး " ဟု မှာထားခဲ့သည်။
ထိုအချိန်မှာ ကိုတူးက (၀င်းမြင့်ဦး) က ရန်ကုန် တက္ကသိုလ်မှ အင်္ဂလိပ်မေဂျာနှင့် ကျောင်းပြီး၍ ပုသိမ် ပြန်ရောက်နေသည်။ ကိုတူးနှင့် ကိုသျှပ်က အကြောင်းသိတွေ။ ဘိုတင်ယုတို့ ငုဝါ တီးဝိုင်းမှာကတည်းက အတူ တွဲလာခဲ့ဖူးသည်။ နောက်ပိုင်း နှင်းဆီဖြူမှာ တီးသည်။ နုတ်စ်နှင့် ကလပ်စီကယ် ဂီတာ ကျွမ်းကျင်သည်။ အောင်ကျော်ဦးတို့ တစ်တွေ ကိုတူးကို မေတ္တာရပ်ခံပြီး သူတို့အဖွဲ့ကို အားပြန်ဖြည့် ထားခဲ့ကြသည်။
ပုသိမ် သင်္ဘော ဆိုက်သည်နှင့် "ကိုသျှပ် ပါလာတယ်ဟေ့ " ဆိုသော သတင်းက လျှပ်စစ်စီးကြောင်း တစ်ခုသဖွယ် ဖျတ်ကနဲ အပြေးအလွှား ရောက်လာသည်။ သူတို့ တစ်ဖွဲ့လုံး ထခုန်မိမတတ် ၀မ်းသာအားရ ဖြစ်ကုန်ကြတော့သည်။
ကိုသျှပ်ကလည်း ဟိုဟိုဒီဒီ လမ်းများမနေ။ သူတို့သီချင်းလေ့ကျင့်နေသည့် ၁၀၇ အခန်းသို့ တန်းဆင်းချလာသည်။ ကိုသျှပ်ကို တွေ့တော့ သူတို့အားလုံး အူလှိုက်သည်းလှိုက် ပြေးဖက်ကြိုဆိုခဲ့ကြသည်။ ခွဲခွာချိန် ကြာမြင့်လှသည့် ချစ်သောညီအစ်ကိုများ ပြန်ဆုံကြသည့်နှယ်။ တကယ့်ကို ဆူဆူညံညံ။
(၁၅)
"ကိုသျှပ်ကို မျှော်နေတာဗျ၊ ကိုသျှပ်က ပုသိမ်ကို ပြန်လာဖို့တော့ သတိရသားပဲ" ဟု အောင်ကျော်ဦး (ကြွက်နီ) ကစကားနာထိုးသည်။
" ငါ့အိတ်ကပ်ထဲမှာ ဆယ့်ရှစ်ကျပ်ရှိရင် ပုသိမ်ကို ပြန်လာလို့ရတယ်ကွ၊ ငါက အိတ်ကပ်ထဲမှာ ဆယ့်ရှစ်ကျပ် ပြည့်ဖို့ စောင့်နေတာ" ဟုဆိုသည်။
ဂီတာကိုင်ထားသော ကိုတူးကိုလည်း အားနာရကောင်းမှန်းမသိ။ ပြောမနာ ဆိုမနာ အပေါင်းအသင်းတွေပီပီ စိတ်ထဲရှိသည့်အတိုင်း -
" ခဏဖယ်ပေးကွာ၊ ငါဝင်တီးလိုက်ဦးမယ်" ဆိုပြီး မဆိုင်းမတွ ၀င်တီးသည်။ ကိုတူးကလည်း စိတ်မကွက်၊ သူ့အပေါ် ဘဲဥဘယ်လို သဘောထားတာ သူသိသည်။
(၁၆)
ကိုသျှပ်ရောက်လာသည်နှင့် Shore of Peace အဖွဲ့၏ နဂိုပုံမှန် အနေအထားများ အားလုံးပြောင်းလဲသွားပြီး အရှိန်သွက်လက်မြန်ဆန်လာခဲ့သည်။ ထုံးစံအတိုင်း ကိုသျှပ်၏ ကိုယ်ပိုင်မူ၊ ကိုယ်ပိုင်ဟန်လေးတွေလည်း ပြန်ပေါ်လာကြသည်။ ကိုင်ဇာ၏ "အိမ်အပြန်ကျောင်းအဆင်းမှာ သီချင်းလေးဆို" ကို ဟာမိုနီခွဲပြီး -
"ကရင်၊ မင်းက Alton၊ ပထန်က ဘေ့စ်၊ ငါ tenor ဆိုမယ်၊ ဟုတ်ပြီလား" လုပ်သည်။
ကိုသျှပ်အကျင့်အတိုင်း ဟာမိုနီအ၀င်အထွက် မမှန်မချင်း ဤသီချင်းတစ်ပုဒ်ကိုပဲ ထပ်ကာတလဲလဲ အကျော့ကျော့အပြန်ပြန် လေ့ကျင့်နေ၍ အချိန်ကုန်လှပြီ။ သီချင်းဆိုမည့် ကျောင်းသူတွေက ဆူဆောင့်စ ပြုလာကြသည်။ သို့သော် ကိုသျှပ်ကို ဘယ်သူမျှ မပြောရဲ။
နောက်ဆုံးတော့ ဆရာမ ဒေါ်စန်းစန်းကြူရောက်လာပြီး သူ့ရင်ဘတ်သူ လက်ညှိုးနှင့်ထောက်ကာ -
"အောင်မယ်လေး …. ဟဲ့၊ သျှပ်ရယ်၊ တခြားသီချင်းတွေလည်း အများကြီး တိုက်စရာရှိသေးတယ်။ ရှေ့မဆက်သေးဘူးလား" ဟုပြောယူရသည်။
ဒါတောင်မှ ကိုသျှပ်ကဖြင့် "ခဏလေးပါ ဆရာမ၊ ကျွန်တော်တို့ဒီတစ်ပုဒ်ပုစံ ၀င်သွားချင်လို့ပါ"
ဆိုပြီး သူ့စိတ်တိုင်းကျ မရရအောင် အဖွဲ့သားတွေကို တွန်းတိုက်လိုက်သေးသည်။
(၁၇)
သူငယ်ချင်း အပေါင်းအသင်းတွေနှင့် ပြန်ဆုံရပြီး ဂီတနှင့် ဆုံတွေ့ရ၍ ကိုသျှပ်သည် ရေထိပန်းသဖွယ် လန်းဆန်းလာသည်။
တစ်နေကုန် သီချင်းတိုက်သည်။ မိုးလင်းပေါက်ဆိုင်များဖြစ်သော ရွှေလသာ၊ ကျော်ကြားတို့မှာ အဖွဲ့တွေနှင့် ထိုင်သည်။ ပုသိမ်မြေကို နင်းရတာ ခိုင်ခိုင်မြဲမြဲ ရဲရဲတင်းတင်းရှိလှသည်။ ဘယ်နေရာနှင့်မျှ မတူ။
ညဘက်ကြီး ဆိုင်မှာ ထိုင်နေရင်းက ၁၀နာရီခန့်ရှိပြီ။ ကိုသျှပ် ရုတ်တရက်ထသည်။
အောင်ကျော်ဦးက "ကိုသျှပ် ဘယ်သွားမလို့လဲ" ဟု မေးရာ -
"ကိုတူးဆီ သွားမလို့ကွ၊ သီချင်းတစ်ပုဒ် အရိန်းခ်ျမင့် လုပ်စရာရှိတာ သူ့ကို အပ်ချင်လို့"
ရာသီက အအေးမိချင်စရာစိမ့်နေသည်။ ကိုသျှပ်လက်ထဲမှာ ကိုတူးအတွက် ချွဲသလိပ်ပျော်ဆေးနှင့် အိပ်ချင်ပြေ ရှူးရှဲထုပ်ပါသည်။
အောင်ကျော်ဦးက စိတ်ထဲမှာ မကြည်လင်။ သီချင်း အရိန်းခ်ျမင့်များ၊ ကိုယ့်ဘာသာ ကိုယ်လုပ်လည်း ရရက်သားနှင့်။ ကိုတူးထံ အလုပ်ရှုပ်ခံ သွားသည်ဟု ယူဆသည်။ သို့သော် ကိုသျှပ်၏စိတ်နှင့် ဆုံးဖြတ်ချက် အကြောင်းသိထားပြီး ဖြစ်၍ ညည်းညည်းညူညူ တဖျစ်တောက်တောက်နှင့်ပင်လိုက်သွားခဲ့သည်။
ပုသိမ်ကမ်းနားကွင်းတန်းအိမ် ရောက်သွားတော့ ကိုတူးမအိပ်သေး။
ကိုသျှပ်က "ငါ့ကိုဒီသီချင်းလေး အရိန်းခ်ျမင့် လုပ်ပေးစမ်းပါကွာ" ဟုဆိုတော့ ကိုတူးက သူ့အမူအရာအတိုင်း သူ့ကိုပဲ ပြောမနေသလို အေးအေးလူလူ ဆေးလိပ်ကလေး တဖွာဖွာနှင့် -
"အေး၊ အေး၊ ထားခဲ့လေ ဘဲဥ" ဟုဆိုသည်။
"ဒီမှာ နွေ
နွေရောက်ပြီလေ
ပင်အိုထိပ်ဖျားမှာ
ဥသြငှက်ကလေး
ကြင်နာသူရှာ
သူငိုကြွေး" ဆိုသည့် "အဆုံးမဲ့နွေ" သီချင်း အရိန်းခ်ျမင့်ကို ကိုတူး လုပ်ပေးခဲ့သည်။
ထိုသီချင်းကို နောက်တော့ အောင်ရင် သီဆိုခဲ့သည်။
"အိပ်ပျော်နေချိန်လည်း၊ ကိုယ့်စိတ်ထဲမှာ၊ မှုန်ရီပြာဝေ၊ မင်းအကြောင်းတွေများ မြင်ယောင်နေဆဲ၊ လွမ်းတဲ့ည" ဆိုသည့် ရင်မှာ ပြာသောည သီချင်းကိုလည်း စာသားရေးပြီး ကိုတူးနှင့် တိုင်ပင်သည်။ ထိုသီချင်း၏ Chorus အပိုဒ်ကို ကိုတူးပဲ မယ်လိုဒီ ရှာပေးခဲ့သည်။
ထိုသီချင်းကို နောင်သောအခါ "ပြာသော ည" အမည်နှင့် ပင်းက သီဆိုခဲ့လေသည်။
(၁၈)
ကိုသျှပ်သည် ပုသိမ် ပြန်ရောက်တုန်း ရောက်ခိုက် ကျောင်းထဲမှာတင် အားမရ။
အောင်ကျော်ဦးတို့ ဘိုကနောင် ကရင် ရပ်ကွက်ဝိုင်း ဖြစ်သော "မဟူရာ" ဖျော်ဖြေပွဲမှာလည်း ကြုံ၍ ၀င်နွှဲသည်။ ကမ်းနားလမ်း နံဘေးမှာ စတိတ်ရှိုး ရှိစဉ် တစ်ကြိမ်တွင် -
"ကြွက်နီ၊ မင်းနဲ့ ငါဒရမ် တစ်ယောက် တစ်ခြမ်း တီးမယ်" ဆိုပြီး ကတ်ကတ်သတ်သတ်နှင့် မဖြစ်ဖြစ်အောင်ကိုပဲ လုပ်ခဲ့သေးသည်။ ဒစ္စကို ဒန်စာ ပါကပ်ရှင်းကို သူ တီးသည်။
အောင်ကျော်ဦးနှင့် နှစ်ယောက် တွဲပြီး သီချင်းလည်း ဆိုခဲ့သေးသည်။
စောဘွဲ့မှူး၏ "အဆောင် သူရဲ" သီချင်းကို "ကြွက်နီ မင်းက ဆိုပရာနို၊ ငါက တန်နာ ဆိုမယ်" ဆိုပြီး ဟာမိုနီခွဲကာ-
"မာလာဆောင်နဲ့
ပတ်သက်လို့
ပုံပြင်လေး တစ်ပုဒ်
ကြားဖူးတယ်၊
ဒီပုံပြင်ထဲက
ဇာတ်လိုက်ကြီး
ဘယ်သူလဲလို့
မမေးပါနဲ့" ဟု ယောကျာ်း စုံတွဲ သီချင်း စလိုက်ကတည်းက ပရိသတ်ထဲမှ ဝေါခနဲ အသံ ကြားရသည်။
သူတို့ နှစ်ယောက်ကတော့ ဂရုမစိုက်ဘဲ "ထမင်းမှစားရဲ့လား၊ ရေတစ်ခွက်မှသောက်ရဲ့လား၊ ဘာကိုမှလည်း စိတ်မ၀င်စား၊ အဆောင်ရှေ့မှာ ကျင့်တဲ့တရား" ဟု ဆက်ဆိုကြရာ ပရိသတ်က ကောင်းကောင်းကြီး သြဘာပေးကြသည်။
ဘာပဲဖြစ်ဖြစ် "မနက် မနက်ကြည့်ကြည့်ပါ၊ နေ့ခင်းဘက်ကြည့်ကြည့်ပါ၊ ညညကြည့်ကြည့်ပါ တွေ့လိမ့်မယ်၊အမြဲတမ်း ရှိလိမ့်မယ်" ဆိုပြီး မဆုံး ဆုံးအောင် အားပါးတရ ကြဲဖြစ်ခဲ့ကြလေသည်။
အခန်း (၁၀) သိုက်မြုံ ရင်ခွင် ရှိရာဆီ
(၁)
လောက မိုးကောင်းကင်ထဲမှာ နေရာအနှံ့ပျံသန်းချင်ရာ ပျံသန်း သွားလာခဲ့သော ငှက်ကလေး တစ်ကောင်။ အချိန်တန် အတောင်ပံ ညောင်းတော့ သိုက်မြုံ ရှိရာဆီသို့ တစ်ဖန် ပျံ၍ နားရသည်။
ကျော်မြင့်လွင်လည်း မော်လမြိုင်က မိဘရင်ခွင်ထဲသို့ တိုးဝင် ရောက်ရှိလာခဲ့ပြန်သည်။ မိသားစု အသိုင်းအ၀ိုင်းကတော့ အစဉ်သဖြင့် နွေးထွေး လုံခြုံသည်။ သူ ပြန်လာပြီဆိုသည်နှင့် အိမ်မှာ အားလုံး ပြီးပြည့်စုံ သွားသလိုမျိုး ပိုက်ပွေ့ကမ်းလင့် ကြိုဆိုလိုက်ကြသည်။ အမေက အထူး ဆိုဖွယ်ရာ မရှိ။ ၀မ်းသာအယ်လဲ။ အဖေနှင့် သူ၏ ဆက်ဆံရေးမှာလည်း ထင်သလောက် မဆိုး နားလည်မှု ရရှိပြီး အဆင်ပြေနေသည်။
ကျော်မြင့်လွင် ကျွမ်းကျွမ်းကျင်ကျင် ဂီတာ တီးနေတာ တွေ့ရကြားရသည့်အတွက် ရပ်ကွက်ထဲမှ လူငယ်လေးတွေ စုဝေး လာကြသည်။ သူကလည်း ပညာ လိုချင်သူဆိုလျှင် သေသေချာချာ သင်ပြပေးသည်။
သူ့တွင်လုပ်စရာမည်မည်ရရ ဘာမျှ မရှိ။ ပျင်း၍ ဂီတာချည်းသာ တီးတီးနေတာ တွေ့ရသဖြင့် တစ်နေ့မှာ အဖေက-
"မင်းဂီတာ တီးချင်တယ် ဆိုရင် ငါ့တပည့်တွေ တီးဝိုင်း ထောင်ထားတာ ရှိတယ်၊ မင်း ၀င်တီး ကြည့်ပါလား" ဟု ဆိုသည်။
ကျော်မြင့်လွင်က အဖေ့ စကား ကြားတော့ သူ့နားကိုပင် သူ မယုံချင်။
(၂)
အဖေတို့ မော်လမြိုင် ကျောင်းကျန်းမာရေး ဌာနတွင် ကိုစိုးညွန့်က ကုသမှုအကူ (Clinical Attendant) ဖြစ်သည်။
ကိုစိုးညွှန့်နှင့် ကိုဂျီကေတို့ ညီအစ်ကိုက The Excellent ဆိုပြီး တီးဝိုင်း တစ်ဝိုင်း ထောင်ထားသည်။ ကိုစိုးညွှန့်တို့ အမှတ် (၁) အ.ထ.က မှ ဓာတ်ခွဲလက်ထောက် ဖြစ်၍ အမှတ် (၁) အ.ထ.က ကျောင်းဝင်းထဲတွင် နေအိမ် ရရှိထားသည်။ ထိုအိမ်မှာပဲ သူတို့ တီးဝိုင်း လေ့ကျင့်လေ့ ရှိသည်။ လောလောဆယ် သူတို့မှာ ဂီတာသမား တစ်ယောက် လိုအပ်နေသည်ဟု ဆိုသည်။
ကျော်မြင့်လွင်က တီးဝိုင်းထဲ ၀င်ဖို့ သဘောတူလိုက်၍ အဖေက သူ့ တပည့်များအား "ငါ့သားကြီး ဂီတာ တီးတတ်တာ ရှိတယ်၊ မင်းတို့ ၀ိုင်းမှာ စမ်းသုံးကြည့်ပါလား" ဟု ပြောပြ အပ်နှံသည်။
သည်လိုနှင့် ကိုစိုးညွှန့်တို့ အိမ်ရောက် လာကြပြီ။
ကျော်မြင့်လွင်က ဂီတာ တီးပြရသည်။
ပလေးဘွိုင် သန်းနိုင်၏ "ဆု" ဆိုသော သီချင်းကို ဆိုလို တီးဆို ပြလိုက်သည်နှင့်ပင် ကိစ္စ ပြီးပြတ်လေတော့သည်။ The Excellent မှာ လူလိုနေသလို ဘာမျှ လုပ်စရာ မရှိသော ကျော်မြင့်လွင် အတွက်လည်း အာသာ ပြေသွားသည့် အတွက် ရေကန်အသင့်၊ ကြာအသင့်ပင် နှစ်ဦးနှစ်ဘက် အဆင်ပြေ သွားခဲ့ကြသည်။
မော်လမြိုင်မှာ ဂီတ မျိုးစေ့ မြေပေါ် ကျပြီး သစ်ပင် တစ်ပင် ဖြစ်ထွန်းပေဦးမည်။
(၃)
အသစ် ပြန်လည် ဖွဲ့စည်းသော Excellent မှာ ကိုဂျီကေ လိဒ်ဂီတာ၊ ကိုစိုးညွှန့် ရစ်သမ်ဂီတာ၊ ကိုဂုလု ဘေ့စ်ဂီတာနှင့် ကျော်မြင့်လွင် ဒရမ် တီးကြသည်။
ကိုဂျီကေက သီချင်းလည်း ရေးသည်။ သူ ရေးဖွဲ့သော "မျက်ရည်" သီချင်းကို နောင်သောအခါ ကိုဗလ သီဆိုခဲ့သည်။
(၄)
ကျော်မြင့်လွင်၏ မော်လမြိုင် ပထမဆုံး စင်မြင့်ပွဲမှာ အမှတ် (၅) တံတားရှေ့ ရွှေတောင်ရပ် ဆွမ်းကြီးလောင်းပွဲ ဖြစ်သည်။
The Excellent က အနောက်တိုင်း ၀တ်စုံ အပြည့်အစုံနှင့် တီးဝိုင်း ထွက်သည်။ ထိုညမှာ ကျော်မြင့်လွင်က L-O-V-E love နှင့် Give Me Your Heart အင်္ဂလိပ် သီချင်း နှစ်ပုဒ် သီဆိုခဲ့သည်။
The Excellent အဖွဲ့တွင် ကျော်မြင့်လွင် တီးခတ်နေဆဲ အချိန်။
တစ်ခါတော့ သူတို့အဖွဲ့ မြန်မာ့အသံ အင်္ဂလိပ်ပိုင်း အသံလွှင့် အစီအစဉ် Local talent ကဏ္ဍတွင် အသံ သွားသွင်းကြသည်။ ကိုဂျီကေနှင့် ကိုစိုးညွှန့်တို့ ညီအစ်ကိုက သီချင်း ဆိုကြသည်။ မြန်မာ့အသံမှ ထုတ်လွှင့် ပေးခဲ့သော The Excellent ၏ ထိုအစီအစဉ်တွင် မှတ်မှတ်ရရ Devil Woman သီချင်း ပါဝင်ခဲ့သည်။
(၅)
The Excellent မှာ အချိန်အတန်ကြာ တီးခတ်နေခဲ့ပြီးသည့် နောက်ပိုင်းတွင် သူတို့ တီးဝိုင်းမှာ အပြောင်းအလဲ အချို့ ဖြစ်သွားခဲ့သည်။
အဓိက အကြောင်း အရင်း အခြေခံက မော်လမြိုင် မြို့လယ်နှင့် ယမင်း ပုံနှိပ်တိုက်များမှ ကိုညီညီ၊ ကိုဇော်ဇော်တို့က စတင်ခဲ့သည် ဆိုရမည်။ သူ့တို့ဆီမှာ တီးဝိုင်း တိုက်ကြ၊ သီချင်း ဆိုကြရင်း ကျော်မြင့်လွင်ကို သူတို့ မျက်စိကျ လာကြသည်။
သည်လိုနှင့် ကျော်မြင့်လွင်ကို မဏ္ဍိုင် ထား၍ တီးဝိုင်းသစ် တစ်ခု ဖွဲ့ဖို့ ဖြစ်လာသည်။
The Excellent မှာ ကိုဂျီကေတို့ ကျန်ရစ်ခဲ့ပြီး မော်လမြိုင်မှာ Sharp အမည် ရှိသည့် တီးဝိုင်းသစ် တစ်ဝိုင်း ပေါ်ပေါက် လာခဲ့လေတော့သည်။
Sharp မှာ ကျော်မြင့်လွင်က လိဒ်ဂီတာ တီးသည်။ ပဲခူးသား ကိုနိုင်ဝင်းက ဘေ့စ်။
ညနေတိုင်း အိမ်ရှေ့မှာ ဂီတာ သင်ပေးနေကျ ရပ်ကွက်ထဲမှ သူ့ လက်ရင်း တပည့် စိုးငယ်ကို စိတ်ချ ရလောက်ပြီး ဖြစ်၍ ရစ်သမ်ဂီတာ ခေါ်တီးခိုင်းသည်။
(၆)
The Excellent မှာတုန်းက ကျော်မြင့်လွင်သည် ဧည့်သည်ဝိုင်းသား တစ်ယောက်သဖွယ် စီစဉ်သမျှ အတိအကျ နာခံကာ အပိုစကား ဘာတစ်ခွန်းမျှ ၀င်မပြောခဲ့။
Sharp တီးဝိုင်းမှာကျတော့ သူ့လက်သူ့ခြေ။ သူ့စကားသာ သူ့အာဏာ တည်သည်။ သို့ဖြစ်၍ ပြောစရာ၊ ဆိုစရာ ရှိလျှင် ဘယ်သူ့ကိုမျှ အားမနာ။ သူက သီချင်း တီးရာ ဆိုရာမှာ ကောင်းဖို့သာ ပဓါန ထားသူ ဖြစ်သည်။ မျက်နှာကို ကြည့်မည် မဟုတ်ချေ။ ထို့ကြောင့် ပြောစရာရှိ ပြော၊ ဆူပူစရာ ရှိလျှင် ဆူပူသည်။ သီချင်း သီဆိုသည့် မိန်းကလေး၊ ယောကျာ်းလေး မရှောင်။ အကြီးအငယ် အရွယ်မရွေး။ မှားလျှင် ဆူပူ ပြောဆို ခံရသည်။
ပုသိမ်မှာတုန်းကလိုပင် သီချင်း တစ်ပုဒ်ချင်းကို အပင်ပန်းခံ နုတ်စ် ခွဲ၊ တီးဝိုင်းသမား တစ်ယောက်လျှင် တစ်ရွက် ပေးပြီး စနစ်တကျ မောင်းသည်။
ဤသို့ဖြင့် Sharp တီးဝိုင်းသစ်မှာ အချို့အတွက် ကျော်မြင့်လွင်နှင့် နည်းနည်းလေးတော့ ထောင့်မတည့်သလို ဖြစ်ရသည်။ သူက သိပ်ကို တိကျလွန်း အားကြီးသည်။ အတီးသမား တီးတာ မဟုတ်လျှင် အတီး မှားပြန်ပြီ။ အဆိုသမားဆိုတာ မဟုတ်လျှင် အဆို မှားပြန်ပြီနှင့် ဘာဆိုဘာမျှ သည်းမခံ။ ကီးမကိုက်လျှင် မကိုက်၊ တိုင်ပင် မှားလျှင် အမှား။
တစ်ချိန်လုံးလိုလို မောင်းမဲနေ၍ "တော်ရိရော်ရိနှင့်လည်း ဖြစ်နိုင်တာပဲ" ဟု သဘောထားသူတွေ အားလုံး ဒုက္ခရောက်ကြသည်။ ဒါပေမဲ့ သူ့ဘက်က သီအိုရီ အခြေခံမှအစ ခိုင်မာနေ၍ ဘယ်သူမျှ သူ့ကို မလှန်နိုင်။ တီးဝိုင်း ပိုင်ရှင်အထိ တက်ပြီး ပြောဆိုကြသော်လည်း မဖြေရှင်းနိုင်။ ကျော်မြင့်လွင်က ခိုင်လွန်းနေသည်။ သူ့ကို ယိုင်သွားစေဖို့ ဆိုလျှင် တော်တန်ရုံ မဖြစ်နိုင်။
သို့ဖြင့် စဉ်းစားရင်း စဉ်းစားရင်း နောက်ဆုံးတော့ ကိုဝင်းဦးကို ပြေးပြီး သတိရလိုက်ကြတော့သည်။
(၇)
ကိုဝင်းဦးက ပဲခူးသား။ ပဲခူး ဒေသကောလိပ်မှ မော်လမြိုင် ဒီဂရီကောလိပ်သို့ သင်္ချာ မေဂျာ အဓိကဖြင့် ကျောင်းလာတက်ခဲ့သူ။
ပဲခူးမှာတုန်းက အသက်ငယ်ငယ်နှင့်ပင် "နုငယ်" တေးဂီတ၀ိုင်း ဦးထွေးမောင်မောင် (အဲလက်စ်ဖခင်)၊ ဦးဝင်းမောင်မောင်တို့က ဂီတာ သင်ပေးခဲ့သည်။ ၁၈ နှစ်သားတွင် ပဲခူး Paradise တီးဝိုင်း၌ တီးခဲ့ပြီး မော်လမြိုင် ရောက်တော့ ဖက်တန်း ရွက်စိမ်း တီးဝိုင်းမှာ တီးခတ်ခဲ့သည်။
ကိုဝင်းဦးက ဂီတမှာ ခြေခြေမြစ်မြစ် ခိုင်ခိုင်မာမာ ရှိသူဖြစ်၍ ကျော်မြင့်လွင်ကို ချိုးဖို့၊ ဟန့်ဖို့ ဆိုလျှင် သူမှပဲ တတ်နိုင်လိမ့်မည် ဆိုပြီး ပဲခူးအထိ လိုက်သွားကာ ဇာတ်ကြောင်းစုံ ခင်းပြ၍ ခေါ်ချလာကြသည်။
ကိုဝင်းဦးလည်း Sharp မှာ ဘေ့စ်ဂီတာ တီးဖို့ ဆိုပြီး မော်လမြိုင်သို့ ရောက်ရှိ လာခဲ့လေသည်။
(၈)
ဝင်းဦးနှင့် ကျော်မြင့်လွင်တို့ တွေ့ကြပြီ။
သီချင်းတိုက်ရင်း တစ်ယောက် အရိပ် တစ်ယောက် အကဲ ခတ်၍ နေကြသည်။ သီချင်း နားချိန်ကျတော့ တီးဝိုင်း တိုက်နေသည့် ယမင်း ပုံနှိပ်တိုက် အပြင်ဘက် နန်းတော် ရုပ်ရှင်ရုံ ရှေ့က မြက်ခင်းကလေးမှာ နှစ်ယောက်သား ထိုင်ပြီး ဟော်လို ဂီတာ တစ်လုံးစီနှင့် ရောက်တတ်ရာရာ ဟိုသီချင်း သည်သီချင်းကလေးတွေ တီးနေရင်း စကားစမြည်း ပြောနေလိုက်သည်။
တီးဝိုင်း တိုက်စဉ်ကပင် တစ်ယောက် အစွမ်း တစ်ယောက် သိသင့်သလောက် သိမြင်ခွင့်ရခဲ့ကြပြီ။ စကားတွေ ပြောရင်းဆိုရင်း တစ်ခဏချင်းအတွင်း တစ်ယောက် ဗီဇ တစ်ယောက် သိသွားကြ၍ ချက်ချင်း တည့်သွားကြသည်။
အတန်ငယ် ရေချိန် မှန်လာသောအခါ ကျော်မြင့်လွင်က-
"ကိုဝင်းဦး၊ ကျွန်တော့်မှာ သီချင်းလေးတွေ ရေးထားတာ ရှိတယ်ဗျ" ဟု ပွင့်အန်ကျလာသည်။ "ဆိုမယ့်သူ ရှိရင် ရောင်းချင်တာ" ဟုလည်း ဆိုသည်။
ကိုဝင်းဦးက ရက်ကောဒင်း လောကနှင့် မစိမ်း။ ၁၉၇၉-၈၀ တုန်းက ပဲခူးမှ သူငယ်ချင်း သုံးယောက် စုပြီး "လွမ်းတဲ့ လမ်း" အမည်နှင့် လင်းစတူဒီယို၌ အသံ သွင်းခဲ့ဖူးသည်။ Paradise တီးဝိုင်းမှာ ဦးတင်ဦးသောင်း ဖြည့်ထားသည့် သူတို့ အခွေ သွင်းခဲ့ချိန်မှာ ခိုင်ထူး၊ ရီဇော်တို့၏ "တေးမြုံငှက်" စီးရီး ထွက်ချိန်နှင့် မရှေးမနှောင်း။ သို့သော် "လွမ်းတဲ့လမ်း" သည် အခွေအဖြစ် ပီပီပြင်ပြင် မထွက်လိုက်။ လမ်းခုလတ်မှာပဲ နစ်မြုပ် သွားခဲ့ရသည်။
ဘာပဲဖြစ်ဖြစ် ထိုအတွေ့အကြုံထဲမှ သင်ကြား ရရှိလိုက်သမျှတွေက အဖိုးတန်လှသည်ဟုသာ ကိုဝင်ဦး မှတ်ယူထားသည်။ ဂီတ မှော်ရုံတောကို တိုးဝင်ဖို့ ဆိုတာ ပါရမီ အခြေခံနှင့် မလုံလောက်။ စန်း နက္ခတ်တွေ အစုံအလင် ယှဉ်ရမည်။ သို့မှသာ ထွန်းလင်း တောက်ပ လိုရာ ရောက်ရမည်။ ပါရမီနှင့် စန်းဆိုတာ ကြိုတင်မြင်နိုင်သည် မဟုတ်။ ကျော်မြင့်လွင်မှာလည်း ရှိနေနိုင်သည်သာ။
ထို့ကြောင့် ကျော်မြင့်လွင် ရေးထားသည်ဆိုသော သီချင်းတွေကို မကြားဖူးသေးသော်လည်း- "မင်းသီချင်းတွေ ကြိုက်တဲ့လူတွေ့ရင် ရောင်းလို့ ရမှာပေါ့ကွာ" ဟု ကိုဝင်းဦးက အားပေး လိုက်သည်။
ကျော်မြင့်လွင်က ဂီတာကို အသာ တီးခတ်ရင်း-
"နှုတ်ဆက်လိုက်ဖို့အားတင်းထားရင်းပါး ပြင်ပေါ်မှာမျက်ရည်တွေဟာ အချိန်နာရီတွေပေါ်ကို ကျော်လွန်ရေလိုဖြတ်ပြီး စီးဆင်းနေဆဲ ချစ်သူရေ . . " ဟု ဆိုပြသည်။
"နာရီပေါ်မှ မျက်ရည်စက်များ" သီချင်းကို နားထောင်ရင်း နားထောင်ရင်း ကျော်မြင့်လွင်၏ ပါရမီ၊ ကျော်မြင့်လွင်၏ အရည်အချင်းကို ကိုဝင်းဦး တန်းသိ သွားသည်။ ကိုယ်ပိုင်သံစဉ် လောကမှာ သူ့ သီချင်း ပုံစံက လုံးဝကြီးကို အသစ်အဆန်း ဖြစ်နေသည်။ သီးခြား ခွဲထွက်ထား၍ လမ်းကြောင်း မတူ။
အံ့အားသင့်ပြီး-
"ဟ၊ မင်းသီချင်းကောင်းလှ ချည်လား" ဟု မှတ်ချက်ချမိသည်။
"ဟကောင်၊ မင်း ဖြစ်တယ်။ မဖြစ်စရာ ဘာမှ မရှိဘူး။ အခွင့်ကြုံဖို့ပဲ လိုမှာ။ အဲသည့်အခါကျရင် သူ့ အလိုလို ဖြစ်သွားမှာပဲ" ဟု သူ့စိတ်ထဲက ပေါ်လာသည့် အရင်းခံအတိုင်းပဲ အားပါးတရ ပြောမိသည်။
(၉)
"မင်း ရေးထားတဲ့ သီချင်းတွေ ဘယ်နှပုဒ် ရှိသေးလဲ" ဆိုပြီး မေးကြည့်လိုက်တော့ ပို၍ပင် အံ့အားသင့်စရာ။ လယ်ဂျာစာအုပ်နှင့် နှစ်အုပ်။ အပုဒ် (၈၀) ခန့် ရှိကြောင်း ကိုဝင်းဦး သိလိုက်ရသည်။
ထိုအချိန်ကတည်းက နာရီပေါ်မှ မျက်ရည်စက်များ၊ မှော်ဆရာ အိပ်မက်၊ သက်ငြိမ် အစရှိသည့် အခွေများတွင် ပါဝင်မည့် သီချင်း အတော်များများကို ရေးသား ပြီးနေပြီ။ သို့သော် ထိုအချိန်ကတုန်းက ကျော်မြင့်လွင်၏ စိတ်ဆန္ဒမှာ အဆိုတော် လုပ်ဖို့ မဟုတ်။ သီချင်းလေးတွေ ရေးဖွဲ့ပြီး သူ့ သီချင်းတွေကို သီဆိုမည့်သူ ရှာတွေ့ဖို့သာ ဖြစ်သည်။ သီချင်း ဆိုမည့် အဆိုတော်ကို သူ ရောင်းမည်။ လူတွေ ကြားထဲ သူ့သီချင်းလေးတွေ ပျံ့နှံ့သွားလျှင် ကျေနပ်ပြီး ဆိုတာမျိုးသာ ဖြစ်သည်။
(၁၀)
ညတွင်းချင်းပင် သူတို့ နှစ်ယောက် အကြားမှာ ဘာအကာအကွယ်မျှ မရှိတော့ဘဲ ပွင့်လင်း ရင်းနှီး သွားကြသည်။ ညီရင်းအစ်ကိုတမျှ ဖြစ်သွားကြသည်။
ကျော်မြင့်လွင်ကို ချိုးပေး လှန်ပေးဖို့ ဆိုပြီး ကိုဝင်းဦးကို ပဲခူးအထိ တကူးတကန့် ပြေးခေါ် ခဲ့ကြသည်။ ယခုတော့ဖြင့် သူတို့ နှစ်ယောက်က ပလဲနံပ သင့်သွားခဲ့ကြပြီ။ ဘယ်သူတွေ ဘာများ တတ်နိုင်ကြဦးတော့မည်လဲ။
ကျော်မြင့်လွင်မှာ ပုသိမ်ကတည်းက သျှပ်ကလေး အမည် တွင်ပြီးသား။
ယခု မော်လမြိုင် တီးဝိုင်းကလည်း Sharp။
ဤသို့ဖြင့် ကိုဝင်းဦးက သျှပ်ကြီး ဖြစ်လာသည်။
Sharpတီးဝိုင်းမှ သျှပ်ကြီး၊ သျှပ်ကလေးတို့ နှစ်ယောက် သွားလေရာမှာ တတွဲတွဲ။ စင်ပေါ်မှာလည်း အပေးအယူမျှမျှ။ ကိုဝင်းဦးက ကျော်မြင့်လွင်တို့ အိမ်အထိ လိုက်လာပြီး တစ်ခါတလေ အိမ်မှာပဲ အိပ်တတ်သည်။
(၁၁)
မှောင်ခိုခေတ်လည်း မှောင်ခိုခေတ်မို့ လမ်းကြောင်းပေါ်မှာ ရှိသည့် မော်လမြိုင်မြို့က အရောင်းအ၀ယ်နှင့် စီးပွားရေး ကောင်းသည်။ အလှူအတန်း ပေါများ၍ တီးဝိုင်းတွေလည်း ဦးစားပေးခြင်း ခံရသည်။ အထူးသဖြင့် မော်လမြိုင်၏ ဆွမ်းကြီးလောင်းပွဲတွေက ထူးခြားသည်။ တော်သလင်းလဆန်းမှစပြီး မော်လမြိုင် ဖက်တန်း၊
ဒိုင်းဝန်းကွင်း၊ မောင်ငန် အစရှိသဖြင့် တစ်ရပ်ကွက်မှ ပြောင်းကာပြောင်းကာ မော်လမြိုင်-ရေး အထွက် ဘူတာရုံ ဈေးချိုရပ်ကွက်အထိ နှစ်ရက်စီ လုပ်သွားသည်။
ဤဆွမ်းကြီးလောင်းပွဲတွေက တစ်ရပ်ကွက်နှင့် တစ်ရပ်ကွက် အပြိုင်အဆိုင်။ တတ်နိုင်လျှင် တတ်နိုင်သလို ထည့်ဝင်ကြပြီး စည်စည်ကားကား ဖြစ်အောင် စီမံကြ၍ တီးဝိုင်းက အမြဲ ပါသည်။ အချို့ရပ်ကွက်ဆိုလျှင် ဇတ်သဘင် အဖွဲ့ကြီးတွေ အထိ ထည့်သွင်း တတ်ကြသည်။
သို့ဖြစ်၍ မော်လမြ်ိုင်မှာ တီးဝိုင်း အလုပ်က ရာသီချိန်ကျလျှင် တစ်လမှာ ဆယ်ပွဲလောက်ပင် ဖြစ်နေတော့သည်။ မင်္ဂလာဆောင်နှင့် အလှူအတန်းတွေကလည်း ငှားရမ်း တတ်ကြသေးသည်။
မောရ၀တီပန်းခြံမှာ တီးဝိုင်းတွေ အလှည့်ကျ ဖျော်ဖြေကြသလို တီးဝိုင်းတွေကလည်း အပြိုင်းအရိုင်း ပေါများသည်။ သီဆို တီးခတ်သူ များပြား၍ တီးဝိုင်း အပြောင်းအလဲလည်း များသည်။ တီးဝိုင်း တစ်ခုပြိုကွဲလျှင် တီးဝိုင်းအသစ် တစ်ခု ချက်ခြင်း ပေါ်လာသည်။
(၁၂)
မော်လမြိုင်မှာ ဟိုးအရင်ကတည်းက ကောက်ပဲသီးနှံ ၀န်ထမ်းများနှင့် စုဖွဲ့ ထားကြသော S-A-M-B တီးဝိုင်း ရှိသည်။ စည်ပင်မှ ကိုကြည်ချွန်းတို့ကလည်း စည်ပင်ဝိုင်း။ ကိုဇော်ဝင့်တို့ တီးဝိုင်းက စတား။ ဗိုလ်လှဖေ အိမ်မှ မောင်မောင်တို့က ကွန်ပျူတာ ကွန်ထရိုး။ နောက်ပြီး ပန်းနုရောင်ဆိုတာ ရှိသည်။ The Excellent တီးဝိုင်းက Sharp ခွဲထွက် လာသလို ရွက်စိမ်းက နောက်တော့ ရွက်သစ် ဖြစ်လာသည်။
ဂျက်မြသောင်းတို့က စက်တွေပါ ကိုယ်ပိုင် ထောင်းထား၍ မော်လမြိုင်မှာ အကြီးဆုံး တီးဝိုင်းဟုပင် ဆိုရမည်။ သူတို့ ၇၄၇ တီးဝိုင်းက နောက်တော့ "ရွှေ" အဖြစ် အမည် ပြောင်းသည်။
The King, LPJ, Playboys, New Wave, The Aces, Success အစရှိသည့် ၀ိုင်းကြီးတွေ ရန်ကုန်မှဆင်းလာတတ်သလို အပျော်တမ်းဝိုင်း သေးသေးလေးတွေကလည်း ရပ်ကွက်ထဲမှာ များစွား ရှိနေကြပြန်သေးသည်။
(၁၃)
ဂျက်မြသောင်းက နော်လီဇာနှင့် တွဲပြီး အခွေ တစ်ခွေ ထွက်ထားဖူးပြီးပြီ။ မော်လမြိုင်မှာ အသံ အားကောင်းသူအဖြစ် နာမည်ကြီးနေပြီ။ သူတို့ကိုယ်ပိုင် "ရွှေ" တီးဝိုင်းမှာ ပင်တိုင် သီဆို ဖျော်ဖြေသလို ယမင်းနှင့် မြို့လယ်ပုံနှိပ်တိုက်များက ကိုညီညီ၊ ကိုဇော်ဇော်တို့နှင့်လည်း ရင်းနှီးသည့်အတွက် Sharp ပွဲတွေမှာလည်း သီချင်းလာ ဆိုတတ်သည်။
ကိုညီညီတို့ အိမ်မှာပဲ " ဒါ Sharp မှာ လိဒ်တီးမယ့် ကျော်မြင့်လွင် " ဟု ဂျက်မြသောင်းနှင့် မိတ်ဆက် ပေးခဲ့သည်။
ကျော်မြင့်လွင်က ပလေးဘွိုင်း သန်းနိုင်၏ " ဆု " သီချင်းကို အင်ထရို၊ ဆိုလို၊ အစအဆုံး သေသေချာချာ ကျွမ်းကျင် ပိရိစွာ တီးပြလိုက်ရာ၊ သီချင်းမဆုံးခင်မှာပင် ဂျက်မြသောင်းလည်း ပက်လက် ကုလားထိုင်မှ ထလာသည်။ သီချင်းဆုံးတော့ လက်ချင်း ဆုပ်ကိုင်မိကြသည်။ ထိုအချိန်မှစ၍ သူတို့ နှစ်ယောက် သိပ်ခင်သွားခဲ့ကြလေသည်။
(၁၄)
Sharp အဖွဲ့မှာ ကိုဝင်းဦးနှင့် ကျော်မြင့်လွင်၊ သျှပ်ကြီး၊ သျှပ်ကလေးတို့က လိဒ်နှင့် ဘေ့စ်ခွတီးကြရာ ဂျက်မြသောင်းက ၀ိုင်းကူပြီး သီချင်းလာဆိုလျှင် သူကိုယ်တိုင်ပဲ ဒရမ် ၀င်တီးသည်။ မော်လမြိုင် ပရိတ်သတ်က ဂျက်မြသောင်းကို ကိုယ့် နယ်ထွက် အဆိုတော်အဖြစ် တစ်ခဲနက်ကြီး အားပေးတတ်ကြသည်။
ဂျက်မြသောင်းက သီချင်းတွေလည်း သူ့ဘာသာ ရေးထားသည်။ သူ ရေးထားသမျှ ကျော်မြင့်လွင်ကို ပြလေ့ ရှိသည်။ တစ်ကြိမ်မှာ ရန်ကုန်မှ The Rays တီးဝိုင်း မော်လမြိုင်သို့ လာရောက် ဖျော်ဖြေဖို့ စီစဉ်ထားဆဲ။ ကန်ထရိုက်တာက မြို့ခံ အဆိုတော်အဖြစ် ဂျက်မြသောင်းကို တက်ပြီး သီဆိုပေးစေချင်သည်။ ဂျက်မြသောင်းက ပလေးဘွိုင်းသန်းနိုင်၏ " အချစ်လှေ " ဆိုမည်။ နောက်ပြီးတော့ သူကိုယ်တိုင် ရေးထားသော " ဟုတ်တယ် ဟုတ် " သီချင်းလည်း ဆိုချင်သည်။
ဂျက်မြသောင်း၏ အသံအနေအထား၊ အဆိုအားအရ ရန်ကုန်တီးဝိုင်းမှာ ၀င်ဆိုဖို့အတွက် ဘာမျှ အခက်အခဲ မရှိ။ သို့သော် ရန်ကုန်တီးဝိုင်းမှာ သီချင်းအသစ် ဆိုဖို့ကျတော့ နုတ်စ်နှင့် အရိန်းခ်ျမင့် လုပ်ထားဖို့ လိုသည်။ ကျော်မြင့်လွင်က အဆိုင်းမတွပင်-
" နေဦး၊ စင်ပေါ် တီးလို့ ရအောင် ကျွန်တော် လုပ်ပေးမယ် " ဆိုပြီး ရမ်တွေ၊ဘေ့စ်တွေအတွက် နုတ်စ်နှင့် အရိန်းခ်ျမင့် သေသေချာချာ လုပ်ပေးလိုက်သည်။ The Rays နှင့် တီးတော့ ဂျက်မြသောင်း၏ ထိုသီချင်းက မော်လမြိုင်တွင် အကြီးအကျယ်ပေါက်သွားသည်။
နောက်ပိုင်းမှာ တစ်နိုင်ငံလုံး အတိုင်းအတာ ရောက်အောင် ပျံနှံ့သွားခဲ့ပြန်သည်။
(၁၅)
ကျော်မြင့်လွင်က သူ ရေးထားသော သီချင်းတွေ ကိုဝင်းဦး တစ်ယာက်ကိုပဲ ပြခဲ့သည်။ အခြားသူတွေကို ပြလေ့မရှိ။
စတိတ်ရှိုးတွေကျလျှင် သူ အဆိုများတာက ဆလိုင်းသွှအောင်၏ မြိုင်နန်းစံ၊ ဝေးလွင့်ခြင်းရဲ့ နောက်ဆုံး ခြေရာတွေ အစရှိသည့် သီချင်းများဖြစ်သည်။ တစ်ခါတစ်လေကျတော့
သူ့ ကိုယ်ပိုင် သီချင်းလေးတွေကို ကြားညှပ်ပြီး ထည့်ဆိုတတ်သည်။
မော်လမြိုင်ဒီဂရီကောလိပ် ကျောင်းထဲမှာ ကိုဝင်းဦး၏ သူငယ်ချင်း ပဲခူးသားတွေ ရှိကြသည်။ ပုသိမ်မှာ ကျောင်းလာတတ်သော ကျော်မြင့်လွင်၏ အသိတွေလည်း ရှိသည်။ သို့ဖြစ်၍ တီးဝိုင်းနားချိန် ကြားရက်များကျလျှင် ပရ၀ုဏ်ထဲက အဆောင်တွေမှာ ညပိုင်း သီချင်း သွားဆို တီးတတ်သည်။ ထိုအခါမျိုးတွင် စိတ်ကူကြုံလျှင် သူ့ကိုယ်ပိုင် သီချင်းတွေထည့်ဆိုသည်။
" သူ ပန်ထားတဲ့ပန်းနီနီ…..နေရာခဏ လဲချင်သည်၊ ကြင်နာသူလေး လှဖို့အစွမ်းကုန် ကြိုးစားမည်။ ရင်မှာ ဒီလောက်ချစ်ပါသည်။ သူပျော်တာ အမြဲတွေ့ချင်သည်။ သူ့အရိပ်အဖြစ် အမြဲရှိနေတတ်ပြီ။ ကျောင်းသွား ကျောင်းပြန် အချိန်မှန် အမြဲစောင့်ကြည့်သည်။ သူ့မျက်ဝန်းနှင့်ဆုံရင် ရင်ခုန်သည်။ သူ့အပြုံးလေးများ မြင်ရင် အပျော်လွန်ပြီး အိပ်မရတော့ပြီ၊ သိပ်ချစ်တဲ့…အကြောင်းကို ကဗျာတွေ….ရေးမည် "
(တစ်နေ့နေ့တော့ ချစ်လာလိမ့်မည်)
" အိမ်မက်လေးထဲ လာမှာလားကွယ်၊ လာနိုင်ပါတယ်၊ ပြန်လည်ထွက်မသွားနဲ့၊ ဒီရင်မှာ အမြဲတမ်း နေပါတော့ကွယ်၊ ဒီရင်ဟာ မင်းအတွက် အလုံခြုံဆုံးပဲ၊ အိုး……အချစ်ရေ….နိုးနိုး…၊ မုန်းမသွားနဲ့…နိုးနိုး၊ ခွင့်မပြုနိုင်ဘူး၊ ကိုယ်မငိုချင်လို့ပါ။ ကိုယ် မငိုချင်ဘူးကွယ် "
(ခွင့်မပြု)
ထိုသီချင်းတွေ အားလုံး မော်လမြိုင် ပရ၀ုဏ် အဆောင်ညများ၌ အကြိမ်ကြိမ် ပွဲတောင်းခံခဲ့ ရသည်။
ပဲခူးသား သူငယ်ချင်းတွေက အသံ သွင်းထားချင်သည် ဆို၍ ကက်ဆက်နှင့် သွင်းပေးထားခဲ့တာ တစ်ခွေစာပင် ရှိခဲ့သည်။ အချို့သီချင်းတွေက ယခုအချိန်အထိ ဘယ်သူမျှကို ပြန်မဆိုဖြစ်ကြသေး။ ကက်ဆက်ခွေ အဟောင်းလေးတွေထဲမှာ အိပ်စက်ဆဲပင် ရှိနေကြဦးမည်။
(၁၆)
တစ်ဖက်တွင် အပျော်သဘော သီချင်း ဆိုတီးတာ ဖြစ်သလို တစ်ဖက်ကလည်း သီချင်းတွေ ရောင်းဖို့ ဖြစ်နိုင်မလား ကြိုးစားကြည့်သည်။ နှစ်သက် သဘောကျ၍ ၀ယ်ချင်သူလည်း ပေါ်လာသည်။
Sharp လို တီးဝိုင်းကြီးမှာ တီးနေရင်းကပင် အံအားသင့်စရာ ကျော်မြင့်လွင်သည် သူ့ကိုယ်ပိုင် တီးဝိုင်းလေး တစ်ခုလောက် သီးသန့် လုပ်ဖို့ စိတ်ကူးအိမ်မက် မက်နေဆဲ ဖြစ်သည်။
ရပ်ကွက်ထJမှ လူငယ်များ ဖြစ်ကြသည့် စိုးငယ်၊ စိုးနိုင်၊ အ၀င်း၊ ယဉ်သိန်း၊ ကျော်ဆွေ စသည်တို့နှင့် ဂီတကို အကြောင်းပြုကာ ရင်းနှီး ခင်မင်နေခဲ့သည်။ ညစဉ် ညတိုင်း အိမ်ရှေ့မှာ ဂီတာ သင်ပေးနေကျ လူငယ်တွေထဲမှာ စိုးငယ်ကို ရစ်သမ်၊ စိုးနိုင်ကို ဘေ့စ်၊ ညီငယ် အောင်အောင်ကို ဒရမ် တီးနိုင်အောင် သင်ကြား လေ့ကျင့် ပေးခဲ့သည်။
တစ်ခါကျတော့ မောင်ငံ ရပ်ကွက်၊ သုံးထပ်တိုက် ဆွမ်းကြီးလောင်းပွဲမှာ အရေးပေါ် တီးဝိုင်း လိုသည်ဆို ၍ Rainbow Colour Eyes အမည်ဖြင့် တီးဝိုင်းလေး တစ်ဝိုင်း ကောက်ကာငင်ကာ ဖွဲ့လိုက်ကြသည်။
ဆွမ်းကြီးလောင်းပွဲအတွက် ပန်းနုရောင်ကိုငှားထားသည်။ သို့သော် ပန်းနုရောင်က အချိန်ပြည့် မတီးပေးနိုင်။ အခြား ရပ်ကွက် ပွဲတစ်ပွဲနှင့် တိုက်ဆိုင်နေခဲ့သည်။ သို့ဖြစ်၍ ပန်းနုရောင်နှင့် ပွဲစ။ Rainbow Colour Eyes က ကြားဖြတ်။ ပြီးမှ ပန်းနုရောင် နှင့် ပြန်သိမ်းဖို့ စီစဉ်ကြသည်။
(၁၇)
Rainbow Colour Eyes ၀ိုင်းကလေးမှာ လိဒ်ဂီတာသမား သံချောင်း ဆိုတာက ကျော်မြင့်လွင်ပဲ ဖြစ်သည်။
ဘေ့စ် စိုးနိုင်၊ ရစ်သမ် စိုးငယ်နှင့် ဒရမ် အောင်အောင် (အောင်မျိုးဟိန်း) တို့ တီးကြမည်။
ကျော်မြင့်လွင်၏ ညီငယ် အောင်အောင့်ကို ကြွက်နီ (အောင်ကျော်ဦး) က ပုသိမ်မှ လာလည်စဉ် ဒရမ်တီး သင်ပေးထားခဲ့သည်။ ကိုလေး (ကျော်မြင့်လွင်) ကလည်း သင်ပေးသည်။ ဂီတာဆိုတာ ကိုယ်ပိုင် ရှိကြသော်လည်း ဒရမ်ဆက်က အိမ်မှာ မရှိနိုင်။ အဲသည်တော့ အောင်အောင် ဒရမ်တီး ကျင့်တာ အိမ်မှ အိုးဖုံး၊ ခေါင်းအုံး ဘာမျှမကျန်။ ညနေတိုင်း အိမ်မှာ ဂီတာဝိုင်းဖွဲ့တီးကြလျှင် ခုံစားပွဲနှင့်သာ တီးရသည်။
Rainbow Colour Eyes တီးဝိုင်းကလေး အောင်မြင်စွာ ထွက်နိုင်ဖို့အတွက် ကန်သုံးကန်က အိမ်တစ်အိမ်၏ ကားဂိုထောင်ထဲမှာ သွားကျင့်ကြသည်။ ပုသိမ်မှာတုန်းကတုန်းကလိုပင် သီချင်း တစ်ပုဒ်ချင်း နုတ်စ်ထုတ်၊ ဟာမိုနီခွဲ အရိန်းခ်ျမင့် လုပ်ပြီး လေ့ကျင့်ပေးသည်။ သီချင်းများကို ကျော်မြင့်လွင် စိတ်ကြိုက် အရိန်းခ်ျမင့် ပြောင်းသည်။
ကျော်မြင့်လွင်နှင့် တီးဝိုင်း လေ့ကျင့်ရတာ မလွယ်။ အားလုံးက သူ့ လက်ရင်း တပည့်။ သူ့ ညီငယ် အရွယ်တွေမို့ အားမလို အားမရနှင့် အရမ်း ဆူပူသည်။
ကြွက်နီ (အောင်ကျော်ဦး) ပင် မော်လမြိုင် လာစဉ် ကျော်မြင့်လွင် ဆူပူကြိမ်းမောင်း ဆဲဆိုတာ တွေ့တော့ "မင်းအစ်ကိုကွာ၊ ပုသိမ်မှာတုန်းက စကားတစ်လုံးတောင် မထွက်ခဲ့တာ အခုနဲ့တော့ တခြားစီပဲ " ဟု ဆိုသည်။
(၁၈)
ညပိုင်းကျလျှင် တီးဝိုင်းက ထွက်ရတော့မည်။ တကယ် စက်တွေ ယူလာပြီ။ အောင်အောင်က ဒရမ်ဆက် ပေါ်မှာ နှစ်ခါပဲ ထိုင်ပြီး တီးဖူးသေးသည်။ ဒါလည်း ကိုလေး (ကျော်မြင့်လွင်) တို့ Sharp တီးဝိုင်း တိုက်စဉ် ထမင်းစားချိန် ခဏနားခိုက် ၀င်တီးကြည့်ထား ခိုင်း၍ တီးဖူးခဲ့ခြင်း ဖြစ်သည်။
ယခု တီးဝိုင်း ပစ္စည်းတွေ ဆင်၊ နဖူးတွေ့ဒူးတွေ့ဒရမ်ဆက်ပေါ် ရောက်ပြီ။ သူတို့ လူငယ်တွေ အားလုံး လျှပ်စစ်ဂီတာ၊ စက်တွေ အပြည့်အစုံနှင့် ပထမဆုံး ထိတွေ့ခြင်း ဖြစ်၍ ပျော်လည်း ပျော်၊ စိတ်လည်း လှုပ်ရှားစရာ။
ကိုလေး (ကျော်မြင့်လွင်) က Santanna အဖွဲ့၏ သီချင်း တစ်ပုဒ် ဆိုမည်။
ထိုသီချင်းက အရမ်းခက်သည့် သီချင်း။ အရင်ကတည်းကတော့ စားပွဲခုံနှင့် အောင်အောင် ကျင့်ထားပြီးသား။ သို့သော် အခုဟာက ဒရမ်ဆက် ပေါ်မှာ ထိုင်ရတာ။ ဖင်ထိုင်ခုံနှင့်ပင် နေသား မကျသေး။ လက်ခြေ မထားတတ်သေး။
ကိုလေး (ကျော်မြင့်လွင်) က-
" မင်း ဘိရလား " ဟု မေးသည်။
"ဟုတ်ကဲ့ " ဆိုတော့ တီး။
တီး၍ မရ။
ဆဲသည်။
မရလေ ဆဲလေ။ ဆဲလေ မရလေ။
သည်လိုနှင့် လုံးလည်ပတ်ချာ ရိုက်တော့သည်။ ပြန်ပြန်တီးတာ အကြိမ် နှစ်ဆယ်လောက် အထိ ဖြစ်သွားသည်။ ဒရမ်ဘိက မမှန်သေး။ အောင်အောင်ကား ချွေးတွေထွက်၊ ဒူးတုန်၊ ငိုလည်း ငိုချင်။ လူကလည်း ရှစ်တန်းကျောင်းသား ဘ၀ပဲ ရှိသေးသည်။
နောက်ဆုံးတော့ ကိုလေး (ကျော်မြင့်လွင်)က-
"ကဲ….ငါတို့ လက်ဖက်ရည်ဆိုင် သွားမယ်၊ မင်းဒီကနေ တီးထား၊ ငါတို့ ဟိုက နားထောင်နေမယ်၊ မှန်ပြီဆို လှမ်းရပ်ခိုင်းလိုက်မယ် " ဆိုပြီး ထွက်သွားသည်။
(၁၉)
အောင်အောင်က တီးဖို့ အဖေါ်မရှိ။ ရပ်လည်းမရပ်ရဲ။ တစ်ယောက်တည်း တီးပြီး ကျန်နေခဲ့သည်။ အတော်ကြာအောင် တီးနေပြီးမှ စိတ်ကလွတ်လပ်သွားသည်။ အဖေါ်မရှိဆိုတာထက် ဖိစီးမှု မရှိတော့ခြင်း ဖြစ်သည်။ ကိုယ့်ဈာန်နှင့် ကိုယ်ဝင်စားပြီး တီးနေခဲ့ရာခဏနေတော့ လက်ဖက်ရည်ဆိုင်က လူတစ်ယောက် ရောက်လာသည်။
မှန်ပြီးလား၊ မမှန်သေး။ သူစားဖို့စမူဆာ နှစ်ခု ပေးခိုင်း လိုက်၍ လာပေးခြင်းသာ ဖြစ်သည်။ သို့သော် အောင်အောင့်ခမျာ စမူဆာကိုပင် ယူမစားရဲ။ ဆက်၍သာ တီးနေခဲ့ရသည်။
ကိုလေး (ကျော်မြင့်လွင်) ပြန်လာတော့ ဆက်ဆူ ဆက်ဆဲ ခံရသည်။ သို့သော် များစွာ တိုးတက် နီးစပ်သွားခဲ့ပြီ။ မှန်ကန် တည့်မတ် လာအောင် နည်းလမ်းလည်း ပြပေးသည်။ သင်ပြသည့်ကြားမှ မရလျှင်တော့ ဆဲဆူခံရတော့သည်။ စိုးနိုင်၊ စိုးငယ်တို့ ဂီတာသမားတွေ၏ မျက်နှာလည်း သွေးတစ်စက်မျှ မရှိကြတော့ပြီ။ ဒရမ် အလှည့် ပြီးလျှင် သူတို့ အလှည့် ရောက်တော့မည်။
တကယ်ပဲ သူတို့လည်းစရော ဆူဆဲခံရတော့သည်။ နေ့တစ်ဝက်လောက်က ကျော်မြင့်လွင် ဆူဆဲတာနှင့်ပင် ကုန်ဆုံး သွားခဲ့သည်။ သို့သော် နေ့လည်ပိုင်းကျ တဖြည်းဖြည်းချင်း လက်မှန် သွားသည်။
ဤသို့ဖြင့် ညပိုင်း တီးဝိုင်း ဖျော်ဖြေပွဲမှာ အထစ်အငေါ့ မရှိ အဆင်ပြေသွားခဲ့ရလေသည်။
တစ်ခါတစ်လေကျတော့ အပြင်းအထန် လေ့ကျင့် မောင်းနှင်လိုက်မှ အတွင်းအားတွေ ထွက်လာတတ်တာ သူတို့ တစ်ဖွဲ့လုံး သိလိုက်ရလေသည်။
(၂၀)
ကျော်မြင့်လွင်တို့ ၀ိုင်းကလေးမှာ မိန်းကလေး အဆိုရှင် မရှိသေး။
ညီမ ခင်မိုးရီကို "မိုး၊ နင်သီချင်းဆိုပါလား " ဟု ဆိုသည်။ ခင်မိုးရီက ဘာသီချင်းမျှ မဆိုခဲ့ဖူး။ သို့သော် " နင် ဆိုမယ်ဆို ဖြစ်တယ်။ " လုပ်သေးသည်။ သို့သော် တကယ်တမ်းကျ မဆိုဖြစ်။
တီးဝိုင်း အဖွဲ့သားတွေကို ကျော်မြင့်လွင်က ဆူဆဲတာ ကရုဏာဒေါသနှင့်မှန်း သူတို့ နားလည်ကြသည်။ သူတို့လေးတွေ တူရိယာ စက်ပစ္စည်း အစုံအလင်နှင့် အထိအတွေ့ နည်းတာကိုလည်း ကျော်မြင့်လွင် သိသည်။
" မဖြစ်သေးပါဘူးကွာ၊ စက်အစုံနဲ့ ကျင့်ထားမှ ဖြစ်မှာပါ " ဆိုပြီး တစ်လ တစ်ခါလောက်တော့ ပိုက်ဆံ စု၍ တီးဝိုင်း ရှိရှိ၊ မရှိရှိ ပစ္စည်း ငှားပြီး ကျင့်ကြသည်။
ဤသို့ဖြင့် ကျော်မြင့်လွင်၏ Rainbow Colour Eyes ရပ်ကွက် တီးဝိုင်းကလေး အောင်မြင်စွာဖြင့် မွေးဖွား လာခဲ့တော့သည်။
(၂၁)
သက်တမ်း နှစ်နှစ်ခန့် ကြာအောင် အဆို၊ အတီးတွေ လေ့ကျင့်ခဲ့ကြသည့် အဆိုပါ တီးဝိုင်းကလေးသည် နောက်ပိုင်းကျတော့ " ပန်းသီး " ဟု အမည်ပြောင်း ဖြစ်သည်။
သူတို့ တီးဝိုင်းကလေးက စင်ပေါ်တက် ဖျော်ဖြေတာထက် ကျင့်တာ၊ တိုက်တာ သိပ်များသည်။ " ပန်းသီး " ကို သူတို့ ရပ်ကွက်ထဲတင်မက အခြား ရပ်ကွက်တွေကလည်း လာငှားကြသည်။ တစ်ခေါက်ဆိုလျှင် မုဒုံအထိကို သွားတီးရသေးသည်။ တီးဝိုင်း သက်တမ်း အတန် ရလာသောအခါ တီးဝိုင်းမှာ ကိုယ်ပိုင် သီချင်းလေး တစ်ပုဒ် ရှိသင့်သည် ဟု ၀ိုင်တော်သားတွေက ပူဆာကြသည်။
ထိုအခါ ကျော်မြင့်လွင်က-
" လာပြီ၊
ဂီတာ လွယ်ကာ တီးပါ၊
လာပြီ၊ လာပြီ၊ လာပြီ၊
ပန်းသီး တီးဝိုင်းလေး
လာပြီ " ဆိုသည့် ရော့ခ်အန်ရိုးလ်ပုံစံ သီချင်းလေး တစ်ပုဒ် ရေးဖွဲ့ ပေးခဲ့သည်။
(၂၂)
ကျော်မြင့်လွင်သည် " ပန်းသီး" နှင့် Sharp မှာ တီးနေသလို မော်လမြိုင်မြို့ထဲက အခြားသော အပေါင်းအသင်းများ၏ တီးဝိုင်းတွေမှာလည်း လိုလျှင်လိုသလို လိဒ်၊ ဘေ့စ်၊ ဒရမ်များ သွားရောက်ကူညီ တီးပေးလေ့ရှိသည်။
Sharp တီးဝိုင်း၏ သျှပ်ကြီး၊ သျှပ်ကလေးအဖြစ် ၀င်းဦးနှင့် ကျော်မြင့်လွင် တတွဲတွဲဖြစ်ကြသလို ဂျက်မြသောင်းနှင့်လည်း ကျော်မြင့်လွင် တွဲမိသည်။
ဂျက်မြသောင်းက ညနေ ညနေဆို နေ့တိုင်း နီးပါး ကျော်မြင့်လွင်ဆီ လာဖြစ်သည်။ ဂျက်မြသောင်းက သီချင်းကြမ်းလေးတွေ ယူလာသဖြင့် နှစ်ယောက် ပေါင်းပြီး အချောကိုင်ကြသည်။ ပြီးတော့ သူတို့ နှစ်ယောက် တီးဝိုင်းစုံ သွားပြီး ဂျက်မြသောင်းက သီချင်း ဆို၊ ကျော်မြင့်လွင်က ဒရမ် တီးလေ့ ရှိသည်။
(၂၃)
တစ်ခါကျတော့ ဂျက်မြသောင်း၏ တစ်ကိုယ်တော် ဖျော်ဖြေပွဲ တစ်ခု ဘားအံဘက်မှာ ရုံပွဲလုပ်ဖို့ စီစဉ်ကြသည်။ ရန်ကုန်က စောဘွဲ့မှူးကို ခေါ်ပြီး လိဒ်ဂီတာ တီးခိုင်းမည်။ ၀င်းဦးက စက္ကင်းလိဒ်။ ကျော်မြင့်လွင်က ဘေ့စ်တီးဖို့ စဉ်းစား ထားကြသည်။ သို့သော် ထိုပွဲရုံမှာ အကြောင်း မညီညွှတ်၍ မလုပ်ဖြစ်ခဲ့ချေ။
စောဘွဲ့မှူးကတော့ မော်လမြိုင် အီဘန်နီဇာ ဘုရားရှိခိုးကျောင်းမှာ ဓမ္မသီချင်းများ တီးဖို့ ရောက်လာသည်။ သူတို့ တလေးတစား သွားတွေ့ကြသည်။ စောဘွဲ့မှူးက ဟိတ်ဟန် အပို အပေါ်ယံ ဟန်ပန် အမူအရာ မရှိ။ ဖော်ဖော်ရွေရွေ ခင်ခင်မင်မင်။
ကျော်မြင့်လွင်က သူသိချင်သမျှ ဂီတအကြောင်းတွေ မေးသည်။ သီအိုရီပိုင်းတွေ၊ တက်ခနိတွေ အကြောင်း။ စောဘွဲ့မှူးကလည်း သူသိသမျှ စိတ်ရှည်လက်ရှည် ရှင်းပြသည်။ အော်ခက်စထရေးရှင်း လုပ်ပုံတွေကအစ အသေးစိတ် မေးတော့ စောဘွဲ့မှူးက ကျော်မြင့်လွင်ကို သိပ်သဘောကျ သွားသည်။
သူနှင့်အတူ သုံးနှစ် လိုက်နေဖို့ ခေါ်သည်။ သူ သိသမျှ တတ်သမျှ ဂီတာပညာ အားလုံး ကျော်မြင့်လွင်ကို ပုံအောပြီး သင်ပေးမည်ဟု ဆိုလေသည်။ ကျော်မြင့်လွင်က မလိုက်ဖြစ်သော်လည်း စောဘွဲ့မှူး ရင်ထဲက တကယ့်ကိုလှိုက်လှိုက်လှဲလှဲ ပြောခြင်း ဖြစ်ကြောင်း နားလည်နေခဲ့သည်။
ဆက်ရန်....
(၁)
Shore of Peace တီးဝိုင်းလေး ပုသိမ်ကောလိပ်မြေမှာ ပေါ်ပေါက်လာခဲ့ချိန်၌ ကိုသျှပ်သည်လည်း မြင့်မိုးအောင်တို့အိမ်မှ ဘိုကနောင် ကရင်တိုင်းရင်းသား ရပ်ကွက်ရှိ အောင်ကျော်ဦးတို့ အိမ်သို့ အသိုက်ပြောင်းရွှေ့သွားခဲ့ပြီ။
မြင့်မိုးအောင်တို့ အိမ်မှာ တစ်လခွဲလောက်ကြာခဲ့သည်။ ကိုသျှပ်တစ်ယောက် ဆွဲအားများရာ အောင်ကျော်ဦးတို့ အိမ်သို့ ပျော်ပျော်ကြီး ချီတက်သွားခဲ့သောအခါ မြင့်မိုးအောင်၏ မိဘများက အတော်လေးစိတ်မကောင်း ဖြစ်ကြသည်။ သူ့ကို သံယောဇဉ်တွယ်ခဲ့ကြသလို သူ့စားဝတ်နေရေးအတွက် တွေးပြီးပူပန်ခဲ့ကြသည်။
တကယ်ဆို မြင့်မိုးအောင်တို့အိမ်မှာက စားသောက်နေထိုင် အစစအရာရာ အားလုံးအဆင်ပြေသည်။ အောင်ကျော်ဦးတို့ အိမ်မှာ မိသားစုက မစုံလင်။ အထူးသဖြင့် အောင်ကျော်ဦးတို့ မိခင် ဒေါ်မာစီဆုံးထားတာက တစ်နှစ်ခန့်သာ ရှိဦးမည်။ စားရေးသောက်ရေး အစီအစဉ်များ ဘယ်လိုမျှ ထောင့်မစေ့နိုင်။
သို့သော် ကိုသျှပ်က ဒါတွေကိုထည့်မတွက်။ သူသည် ဘယ်တုန်းကမှ အိပ်ချိန် စားချိန်မှန်သူမဟုတ်။ အိပ်ဖို့ စားဖို့ နေရာလည်း အတိအကျမထား။ သီချင်းများ ရှိရာ၊ ဂီတအလုပ်ရှိရာကိုသာ အမြဲတမ်းလှည့်လည်သွားလာနေသည်။ သီချင်းနှင့် ဂီတတို့၏ ခေါ်ဆောင်ရာဆီသို့သာ ရမ္မက်ဆန္ဒ ပြင်းပြစွာ လိုက်ပါနေချင်သည်။ သီချင်းဂီတသာလျှင် ကိုသျှပ်၏ အိမ်အစစ်ဖြစ်ကြောင်း ပထမဆုံးအကြိမ် မြင့်မိုးအောင် သိနားလည်သွားခဲ့သည်။
(၂)
ကိုသျှပ်သည် ငုဝါ၊ ဖြူနီညိုပြာလို တီးဝိုင်းကြီးတွေမှာ ၀င်ရောက်ပြီး ဆိုခဲ့၊ တီးခဲ့ဖူးသည်။ သို့သော် ယခုတစ်ကြိမ်က သူ့အတွက်မတူ။ Shore of Peace က ကျောင်းတွင်း အပျော်တမ်း တီးဝိုင်းသေးသေးကလေး တစ်ခုဆိုသော်လည်း သူ၏ ကိုယ်ပိုင်၊ သူ၏ စေစားရာဖြစ်သည်။
Shore of Peace မှာ သူက ခေါင်းဆောင်ဖြစ်သည်။ သူ့စိတ်တိုင်းကျ ဂီတကို စီမံခန့်ခွဲရသည်။
သို့ဖြစ်၍ သူရင်ခုန်ခဲ့တာ မဆန်းဟု ဆိုရမည်။
(၃)
သူ ရောက်သွားသည့် အောင်ကျော်ဦးတို့ အိမ်က တကယ်ပဲ အနှောင်အဖွဲ့ကင်းသည်။ စိတ်လွတ်ကိုယ်လွတ် နေချင်သော ကိုသျှပ်အတွက် ကွက်တိကျသွားသည်။
အိမ်အောက်ထပ်မှာက အောင်ကျော်ဦး၏ ဖခင် ဦးသိမ်းတင်နေသည်။ သူတို့ ယောကျာ်းလေးတစ်သိုက် အပေါ်ထပ်မှာ စုပြီး ဂီတာတီး၊ သီချင်းတိုက် လွတ်လပ်နေကြသည်။ ထိုအခါ အရက်သောက်လည်း တားမြစ်ဆုံးမ ထိန်းကွပ်ပေးမည့်သူမရှိ။ ပြတင်း အပြင်ဘက် သွပ်မိုးပေါ်တွင် အရက်ပုလင်းလွတ်တွေက တန်းစီနေကြတော့သည်။ ခွေးသား (ဟောင်ကောင်)ဟင်းချက် စားတာမျိုးတွေ လုပ်ချင်ရာ လုပ်ကြသည်။ တစ်ခါက ငုံးဟင်းနှင့်အရက် မြည်းကြရာ အဆိပ်တောက်၍လား မသိ။ တုံးခနဲ ကိုသျှပ် လဲဖူးသည်။ ကံကောင်း ထောက်မစွာ ပြန်ကောင်းလာခဲ့သည်။
နဂိုကတည်းက ရေချိုးပျင်းသူ ကိုသျှပ်အတွက်တော့ဖြင့် ရေမိုးချိုးဖို့ တိုက်တွန်းမည့်သူလည်း မရှိတော့ပြီ။ မှတ်မှတ်ရရ အောင်ကျော်ဦးတို့ အိမ်မှာ တစ်လလောက် နေသွားစဉ် ကာလတစ်လျှောက်လုံး ရေတစ်ခါပဲ ချိုးသွားခဲ့သည်။
(၄)
အနေအထိုင်မှာ ဖြစ်ကတတ်ဆန်းနေချင်သလို နေခဲ့သော်လည်း ကိုသျှပ်သည် ဦးတည်ရာ ရည်ရွယ်ချက်တော့ မကင်းမဲ့။
ကိုအောင်ကျော်ဦးတို့အိမ်မှာ အခြေပြုပြီး လိဒ်သမား အောင်အောင်၊ ရစ်သမ် သာထူး၊ ရေချမ်းတို့ကို ကိုသျှပ် စနစ်တကျမောင်းခဲ့သည်။
လိဒ် အောင်အောင်ကား ခေသူမဟုတ်။ ပုသိမ်မြို့နယ် ဘင်ခရာ တီးဝိုင်းတွင်လည်း နည်းပြဆရာလုပ်ခဲ့သည်။ အောင်အောင့်လက်ထဲမှာ ဘင်ခရာနည်းပြသင်တန်း၌ ဆရာတွေအတွက် ပြဠာန်းသော "မျက်စိအကြား နားအမြင်" စာအုပ်ကို ကိုသျှပ်တွေ့သွားသည်။
ရွာစား စိန်ဝေလျှံ၏ သားဦးဟန်ဝင်း ရေးသားပြုစုထားခဲ့သည့် အဆိုပါ စာအုပ်ကြောင့် ကိုသျှပ်၏ မျက်လုံးများ ပွင့်ကျယ်သွားခဲ့သည် ဆိုရမည်။ စာအုပ်ကို လက်က မချနိုင်အောင် ကိုးကွယ်ထားခဲ့သည်။ သူ့အပေါ်မှာ ကြီးစွာသော သြဇာလွှမ်းမိုးမှု ရှိသွားခဲ့သည့် စာအုပ်ဖြစ်လေသည်။
(၅)
"မျက်စိ အကြား၊ နား အမြင်" စာအုပ်ထဲက ပဲပင်ပေါက်ကလေးများသဖွယ် နိုင်ငံတကာ Pukka နုတ်စ်တွေကို ကိုသျှပ်ဖတ်နိုင်သည်။
မနက်မိုးလင်းချိန်မှ ညမိုးချုပ် အိပ်ချိန်အထိ စာအုပ်ထဲက နုတ်စ်တွေ၊ စကေးလ်တွေအတိုင်း တစ်သဝေမတိမ်း ရအောင် တစ်ဖွဲ့လုံးကို ကောင်းကောင်းမောင်းတော့သည်။ ဂီတာ တစ်လက်ချင်း တီးခတ်ရာမှ အထက်အောက် လက်ခတ်ဆွဲပုံ Up and down stroke တွေကအစ သေသေချာချာ အသေးစိတ် သင်ပြပေးခဲ့သည်။
ထိုအချိန်မှာ သူတို့ တစ်ဖွဲ့လုံး ကိုသျှပ်ကို မော်ကြည့်ဝံ့သူ မရှိခဲ့ကြချေ။ တစ်ဖွဲ့လုံးအပေါ် သူ၏ သြဇာညောင်းသည်။ ကိုသျှပ်ကို သူတို့လေးစား ခန့်ညားကြသည်။ ကိုသျှပ်သည် သူတို့၏ သူရဲကောင်း။ သူတို့၏ နေရာသစ်ရှာပေးသူ။ ဦးဆောင်သူ ဖြစ်၍ လာခဲ့သည်။
ကိုသျှပ်ကား အချင်းချင်းကြားမှာ ဆဲဖို့ ဝေးစွ။ စကားပင်အပိုမပြော။ စည်းကမ်းရှိသည်။ အရက်သောက်လည်း ဘယ်လောက်သောက်သောက် မူးသည်မထင်ရ။ အကြောင်းမှာ ရေချိန်တက်ချိန်၌ စကားတွေ ဖောင်လာတာမျိုး၊ ရစ်တာမျိုး မရှိ။ အရက်သောက်ရင်း ဂီတာ တီးကြတိုင်း အားလုံးမှောက်ကုန်ကြသည့်တိုင် သူကတော့ တစ်ယောက်တည်း။ မျက်မှန်ထူထူအောက်မှ တောက်ပသော မျက်လုံးများနှင့် နုတ်စ်စာရွက်တွေ တစ်ရွက်ချင်းလှန်၊ ဂီတာဆက်တီးပြီး ကျန်နေခဲ့စမြဲ။
(၆)
ဒူပေနာပေခံနိုင်တာတော့ တကယ် အောချရလောက်သည်။
အိပ်တော့လည်း ဖြစ်သလို။ ခေါင်းအုံးမရှိလည်း အုတ်နီခဲကို သတင်းစာပတ်ပြီး အိပ်နိုင်သည်။ မနက်ကျလျှင်ဖြင့် နေမြင့်သည့်တိုင် မနိုးတတ်။
"ကိုသျှပ် … ကိုသျှပ် … ထ … ထ" ဆိုလျှင် အင်းအဲနှင့် "င့ါမျက်လုံးတွေကော ……….." ဟု အောက်ချထားသော မျက်မှန်ကို မေးရင်းစမ်းသည်။
ပြီးလျှင် နံနက်စာကို မတောင့်တ။ မနက်ခင်း ပတ်လောက်တော့ အရင်တစ်ခွက် တစ်ဖလား နည်းနည်းလေး သောက်လိုက်သေးသည်။
ပြီးသည်နှင့် "ဟေ့ကောင် ပထန်။ မနေ့ဟာ ပြန်တီးစမ်း" ဆိုပြီး စကေးများ ပြန်မောင်းတော့သည်။ ပွဲတစ်ပွဲဆိုပြီး ပြန်လာလည်း သူတို့အဖွဲ့သားတွေ မနားရ။ နုတ်စ်တွေ အတိုင်းဆက်ပြီး လေ့ကျင့်သည်။
"သီချင်းက အဓိကမဟုတ်ဘူး။ တကယ့်အခြေခံက နုတ်စ်ပဲ။ ဂီတပညာတတ်မှပဲ သီချင်းကို လုပ်သင့်တယ်" ဟု ကိုသျှပ်အလေးအနက်ထားပြောတတ်သည်။
(၇)
ထိုအချိန်မှာ ကိုသျှပ်စကားနည်းခြင်း၏ အကြောင်းရင်းတွင် အာရုံစူးစိုက်စရာ ဂီတရှိနေ၍ဖြစ်သည်။ သူ့စိတ်က တီးဖို့ စဉ်ထားသမျှ သီချင်းများအတွက် ကော့ဒ်ရှာမည်။ နုတ်စ် ထုတ်မည်။ အရိန့်ခ်ျ လုပ်မည်။ ဂီတကိုပဲ စူးနစ်ထားခဲ့သည်။ သီချင်းအတွက် နုတ်စ်ရေးရာတွင် နိုင်ငံတကာနုတ်စ်နှင့်သာရေးသည်။ ဘယ်သူ့ကိုမျှ အယုံအကြည်မရှိ။ တစ်ယောက်တည်းဒိုင်ခံ တာဝန်ယူခဲ့သည်။
ကိုသျှပ်က ဂီတပိုင်းနှင့်ပက်သက်ပြီး အားလုံး စီမံခန့်ခွဲခဲ့စဉ် မြင့်သန်းက သူတို့ Shore of Peace တီးဝိုင်း၏ မန်နေဂျာ။ ကျောင်းက စီစဉ်ထားရှိပြီး သူတို့ကို အပ်လာသမျှ ဖဲဝဲလ်၊ ၀ဲလ်ကမ်း၊ ဒင်နာပွဲတွေကို အကုန်လက်ခံစီစဉ်သည်။ အောင်ကျော်ဦးက တီးဝိုင်းပစ္စည်းကိစ္စတွေကို တာဝန်ယူဖြေရှင်းပေးခဲ့လေသည်။
မေဂျာတီးဝိုင်း၏ တာဝန်ခံ ဆရာမက ဒေါ်စန်းစန်းကြူ။
ဆရာမ၏ အကျင့်က စကားပြောရင်း မထိတ်သာ မလန့်သာ တစ်ခုခုဆိုလျှင် သူ့ရင်ညွန့်ကို လက်ကလေးနှင့် ထောက်ပြီး "အမလေးရှင်၊ အမလေးဟယ်" လုပ်တတ်သည်။ တပည့်တွေအပေါ် နားလည်သလောက် သူတို့ တီးဝိုင်းအဖွဲ့ကိုလည်း သည်းခံခဲ့သူဖြစ်သည်။
(၈)
ကျောင်းပွဲ တစ်ခုခုရှိ၍ သီချင်းဆိုမည့်ကျောင်းသူ ကျောင်းသားများကို အသံစစ်ပြီဆိုလျှင် ဆရာမ ဒေါ်စန်းစန်းကြူနှင့် ကိုသျှပ်တို့ အတူတူ ထိုင်ရွေးရသည်။
ဆရာမက ကိုသျှပ်ကိုပဲ အဆုံးအဖြတ်တာဝန်ပေးသည်။ စင်ပေါ်တက်ခွင့်ရဖို့ မရဖို့က ကိုသျှပ်၏ အဆုံးအဖြတ်သာလျှင် အဓိကဖြစ်သည်။ အစမ်းဆိုပြပြီးလျှင် ဆရာမက -
"သျှပ်ရေ ၊ ဘယ်လိုလဲ ၊ ကြိုက်လား" ဟုလှမ်းမေးသည်။
သူက မျက်မှန်ထူထူလေးကို အပေါ်သို့ အသာတွန်းတင်ပြီး တစ်ချက်မော့ကြည့်လိုက်လျှင်ပြီးပြီ။
ကျောင်းသူတွေက ထိုအချိန်မှာ ခေတ်စားနေသော ဖြူသီသီချင်းတွေပဲ ရွေးဆိုကြတာများသည်။ တစ်ယောက်လာလည်း -
"လွမ်းငွေ့ဝေေ၀၊ ချစ်သူခင်သူ တစ်ဦးမှာ ရုပ်သွင်မူရာ ခံ့ညားနေ"
နောက်တစ်ယောက်လာလည်း "လွမ်းငွေ့ဝေေ၀၊ ချစ်သူခင်သူ တစ်ဦးမှာ …" ဖြစ်နေကြ၍ ကိုသျှပ်က "ဆရာမ၊ ပထမနှစ်ကနေ ဖိုင်နယ်အထိဆိုမယ့် ကျောင်းသူအားလုံး ဒီသီချင်း တစ်ပုဒ်နဲ့ စင်ပေါ်တစ်ပြုံတည်း တင်ပေးလိုက်ရင် ကောင်းမယ်။ ဒီသီချင်းတစ်ပုဒ်ကိုပဲ သူတို့ဝိုင်းဆိုကြ။ ကျွန်တော်တို့လည်း တစ်ခါတည်းတီးပေးရတာပေါ့" ဟု မှတ်ချက်ချ၍ ဆရာမလန့်ပြီး "အမလေးဟယ်" ဖြစ်ရသည်။
သာထူးက ထိုအကြောင်း..မသိ။ ကိုသျှပ် စိတ်တိုင်းကျမည့် ကီးနှင့် နုတ်စ်ဝင်အောင် ယောကျာ်းလေးတွေကို တစ်ဖက်လှည့်နှင့် ကြိုတင်စီစဉ်၊ဇာတ်တိုက်ပေးပြီးမှ ကိုသျှပ်တို့ အသံစစ်ဆေးရာဆီသို့ ပို့ပို့ပေးသည်။
တစ်ယောက်လာလည်း "မိန်းကလေး။ လာပါကွာ၊ ဒီကောင်မလေး၊ နင်ဒီလို ငိုမနေပါနဲ့"
နောက်တစ်ယောက်လည်း "လာပါကွာ၊ ဒီကောင်မလေး"
သို့ဖြင့် ကိုသျှပ်၏ လေအေးအေးနှင့် ဆူပူကြိမ်းမောင်းတာ ခံကြရပြန်သည်။
(၉)
တကယ်တော့ ဇူလိုင်၊ သြဂုတ်၏ ဟိုမှာဘက်တွင် စာမေးပွဲက လက်တစ်ကမ်းမျှသာ ဝေးတော့သည်။ အောင်ကျော်ဦးတို့ တီးဝိုင်းသမား တစ်သိုက်ကား တစ်နှစ်လုံးလည်း အတန်းတက်မမှန်။ စာတွေက ခေါင်းထဲမှာ ကောင်းကောင်းမရှိ။ ဆရာ၊ ဆရာမတွေက စာမတတ်၍ ဆူ။ သို့သော် သူတို့ စိတ်မပူ။ သူတို့ စိတ်ကူးအာရုံအထဲမှာ တစ်ခုပဲရှိသည်။ အားသွန်ခွန်စိုက် လုပ်နေကြတာ ရည်ရွယ်ချက် တစ်ခုပဲရှိမည်။ သူတို့၏ အိပ်မက်က တီးဝိုင်းလေး တစ်ဝိုင်းသာဖြစ်သည်။ စနစ်တကျ၊ လှလှပပ၊ သပ်သပ်ရပ်ရပ် တီးခတ်နေသော တီးဝိုင်းလေး။
သူတို့အထဲမှာမှ ကိုသျှပ်က အန္တရာယ်အများဆုံး။ အပြင်ဖြေ External ကျောင်းသား။ စာမေးပွဲနှစ်ခါ ကျထားပြီးသားဖြစ်၍ နောက်ထပ်တစ်ခါများ စာမေးပွဲမအောင်လျှင် ကောလိပ်ပရိဝုဏ်ကို အပြီးအပိုင် စွန့်ခွာရတော့မည်။ သို့သော် သူ့ခေါင်းထဲမှာ စာမေးပွဲမရှိ။ ဌာနက ခဏထုတ်ပေးထားသော only ကက်ဆက်အစုတ်ကလေးတစ်လုံး၊ ဂီတာတစ်လက်တို့ကို ပွေ့ပိုက်လျက် ကြွက်နီတို့အိမ်၊ သာထူးတို့ အဆောင်၊ ဦးမြင့်တို့ လှမိုးတို့ အဆောင်တွေမှာ ကြုံသလို လိုက်နေနေရင်း သီချင်းဂီတနှင့်သာ လုံးလုံးလျားလျား မွေ့လျော်နေတတ်သည်။
(၁၀)
ကိုသျှပ်က မနက်မိုးလင်းသည်နှင့် သီချင်းနားထောင်၊ နုတ်စ်ထုတ်။
သူ့ရည်ရွယ်ချက်က ကိုယ်ပိုင်တီးဝိုင်းလေး တစ်ခုဖြစ်ဖြစ်မြောက်မြောက် ပေါ်လာစေချင်သည်။ ဒါကိုပဲ တစ်ချိန်လုံး စိတ်ကူးအိပ်မက်မက်နေခဲ့သည်။
"၁၉၈၇ ခုနှစ်ကျရင် ငါတို့ Band တစ်ခု ပီပီပြင်ပြင်ဖြစ်ရမယ်။ အဲဒီနှစ်ကျ ရွှေတိဂုံဘုရားတပေါင်းပွဲတော်မှာ ငါတို့ တက်တီးနိုင်ဖို့ လုပ်ကြမယ်" ဟု ကိုသျှပ်က သူ့ရည်မှန်းချက်ကို ဖွင့်ဟ ကြွေးကြော်နှိုးဆော်ထားခဲ့သည်။
ထိုအချိန်မှာ နိုင်ငံသိအဆိုတော် မောင်ဂဠုန်က ဟင်္သာတမှ လာတက်သော ပုသိမ်ကောလိပ်ကျောင်းသား။ LPJ တီးဝိုငးနှင့် အခွေထွက်ထားပြီးပြီ။ မောင်ဂဠုန်တို့ ဟင်္သာတသားတွေ၏ တီးဝိုင်းက မဉ္ဇူဆောင်မှာ တီးကြသည်။ Shore of Peace က ယုဇနဟောလ် ဒင်နာမှာ တီးကြမည်။ သူတို့ ကျောင်းတွင်းဝိုင်းလေးတွေက လူငယ်ပီပီ အပြိုင်အဆိုင်။
"မင်းတို့ မှတ်ထား။ အနုပညာမှာ များများကြီး လေ့ကျင့်ထားဖို့ လိုတယ်။ ချွေးထွက်များမှ သေးထွက် နည်းမယ်" ဟု ကိုသျှပ်က ပြောတတ်သည်။
"ဟာဗျာ၊ ကိုသျှပ်ကလည်း တောက်တီးတောက်တဲ့။ ချွေးထွက် များမှ သွေးထွက် နည်းမယ်ပဲ ကြားဖူးပါတယ်" ဟု ဆိုလျှင် -
"မင်းတို့ နားမလည်သေးဘူး။ ဘာပဲပြောပြော အပြိုင်အဆိုင်ကတော့ ရှိတာပဲ။ သူတို့က စင်အောက်မှာ လာကြည့်ရင်း ဝေဖန်ကြမှာပဲ။ ငါတို့ အသားကျအောင် လေ့ကျင့် ထားတော့ စင်ပေါ်ကျရင် ငြိမ်နေမယ်။ ထူးပြီး စိတ်တုန်လှုပ်စရာ မရှိဘူး။ တစ်မျိုး ပြောရင် ကြောက်သေး ပါစရာ မရှိတော့ဘူး။ အဲဒါကြောင့် ချွေးထွက် များရင် သေးထွက်နည်းမယ် ပြောတာ၊ သဘောပေါက်လား" ဟု ဆိုသည်။
နောက်ပိုင်းတော့ သူတို့တစ်တွေ မောင်ဂဠုန်နှင့်လည်း ခင်မင် သွားကြသည်။ LPJ နှင့် မတီးရသေးသော သီချင်းသစ်လေးတွေ သူတို့ အဖွဲ့ကို တီးပေးဖို့ပင် လာပြောသည်။
(၁၁)
ထိုစဉ်တုန်းက ကိုသျှပ်သည် သီချင်းစီးရီး ထုတ်ဖို့ စိတ်ကူး စိတ်သန်း ရှိသည်ဟူ၍ တစ်ကြိမ် တစ်ခါမျှ မပြောခဲ့စဖူး။ သီချင်းတွေတော့ သူ ရေးသည်။ သူ၏ အပြင်းပြဆုံး အာသီသက လက်ငှားဖို့သာ ဖြစ်သည်။ တီးဝိုင်း၏ ဂီတပိုင်းကို အကောင်းဆုံး အရိန့်ခ်ျ လုပ်ဖို့သာ ဖြစ်သည်။
"မသပ်မရပ်တာတွေ လုပ်ဖို့အတွက် သပ်သပ်ရပ်ရပ် ကြိုတင် ပြင်ဆင် ထားရတယ်" ဟု ကိုသျှပ် အစဉ်တစိုက် ပြောခဲ့တာကို အောင်ကျော်ဦးတို့တစ်တွေ လက်ခံခဲ့ရသည်။
(၁၂)
ကိုသျှပ်၏ စိတ်ကူးအိပ်မက် ရည်မှန်းချက်က ရောင်းတမ်း တီးဝိုင်း၊ အငှားလိုက် တီးဝိုင်း ဆိုသော်လည်း "ငုဝါ"၊ "ဖြူနီညိုပြာ" တို့လို ပုသိမ်ဒေသန္တရ တီးဝိုင်း အဆင့် မဟုတ်။ နိုင်ငံအနှံ့ လက်သင့်ခံနိုင်သည့် တီးဝိုင်းကြီးမျိုး ဖြစ်သည်။
အသက် ၁၉-၂၀ အရွယ် လူငယ်လေး ကိုသျှပ်၏ စိတ်က ဘုံဖျား ရောက်နေသော်လည်း သူတို့ လူတွေကတော့ ချုံကြားမှာပဲ ရှိသေးသည်။ လူ၊ ပစ္စည်း၊ အတတ်ပညာ အစစအရာရာ ချို့တဲ့နေသေးသည်။
"ငုဝါ"၊ "ဖြူနီညိုပြာ" တို့လို ရောင်းတမ်း တီးဝိုင်းကြီးတွေမှာ သူတို့ကိုယ်ပိုင် တူရိယာ၊ စက်ပစ္စည်းတွေ ကိုယ်စီကိုယ်င အစုံအလင် ရှိကြသော်လည်း ကိုသျှပ်တို့လို ကျောင်းတွင်း အပျော်တမ်း တီးဝိုင်း လေးတွေမှာတော့ဖြင့် စက်နှင့် ပစ္စည်း အားလုံး ငှားရမ်းပြီး တီးခတ်ရသည်။
ထိုအချိန်တုန်းက ပုသိမ်မြို့မှာ တီးဝိုင်းစက်တွေ ငှားရမ်းသော ဌာန တစ်ခု ရှိသည်။ ဦးမြသွင် စက်နှင့် ဦးကြီးမြင့် စက် ဖြစ်၏။
ဒီတစ်ခါ ဦးမြသွင်နှင့် အဆင်မပြေ ဦးကြီးမြင့်။ နောက်တစ်ခါ ဦးကြီးမြင့်နှင့် ထစ်ငေါ့ခဲ့သော် ဦးမြသွင်။ ပြောင်းပြောင်းပြီး ငှားကြသည်။ နေရာ ပြောင်း၍သာ ငှားရသည်။ ဦးကြီးမြင့်နှင့် ဦးမြသွင်တို့ နေရာတွေက ဘေးချင်း ကပ်ရက်သား။ ပိုင်ရှင်တွေကတော့ ဘယ်လို နေကြမည်။ မသိ။ သူတို့တစ်တွေကတော့ ရူးချင် ယောင်ဆောင်ပြီး မျက်နှာပြောင်တိုက် ကိုယ် ငှားချင်ရာဘက် ၀င်ငှားတတ်ကြသည်။ မျက်လုံးချင်း တည့်တည့် ဆုံမိကြတော့လည်း ပြုံးဖြဲဖြဲ လုပ်နေလိုက်ကြသည်သာ။
(၁၃)
ထိုနှစ် ဖဲဝဲလ်ပွဲတွင် ဦးမြသွင်၏ စက်များကို ငှားဖို့ ပစ္စည်း တာဝန်ခံ အောင်ကျော်ဦး ဆုံးဖြတ်လိုက်သည်။ ကိုသျှပ်ကတော့ ချက်ဆို နားခွက်က မီးတောက်ပြီးသား။ "ဒီကရင်၊ ဦးမြသွင်စက် ဘာလို့ ငှားလဲ ဆိုတာ ငါ သိတယ်" ဟု ဆိုသည်။
အောင်ကျော်ဦး (ကြွက်နီ) ကတော့ ထိုစကားကို မကြားချင် ဟန်ဆောင်ပြီး မျက်လုံးကလေး ပေကလပ် ပေကလပ် လုပ်နေလိုက်သည်။ ဦးမြသွင်၏ ဂီတာတွေက သိပ်ကြီး မကောင်းလှ။ ရမ်ဆက်ကတော့ ကောင်းသည်။ အောင်ကျော်ဦးက ဒရမ်မာဆိုတော့ ဒရမ်ဆက် ပိုကောင်းသည့်ဘက် အသာလေး ပါအောင် ယက်လိုက်ခြင်း ဖြစ်သည်။ ဒါတင်မက သည်တစ်ချီမှာတော့ ဒရမ်ဆက် ကောင်းကောင်းတစ်စုံ မြောင်းမြကနေ ရအောင် ဆွဲပေးမည်ဟု ဦးမြသွင်က အောင်ကျော်ဦးအား တိုးတိုးတိတ်တိတ် လက်တို့ သတင်း ပေးထားပြီးနေပြီ။ အဲသည်တော့ ဦးမြသွင်တို့ စက်ကို ငှားဖို့ ကြွက်နီ ဆုံးဖြတ်လိုက်တာ ဘာမျှ မဆန်း။
ဦးမြသွင် အသစ် ၀ယ်လိုက်သော Revert စက်က အဆိုအတွက်ကော၊ ဂီတာတွေအတွက်ပါ အသုံးတည့်တာကလည်း အကြောင်းပြချက်ကောင်း တစ်ခု ဖြစ်နေတော့သည်။
(၁၄)
ဘာပဲပြောပြော ဦးမြသွင်၏ ဂီတာတွေက ပြဿနာ ရှိသည်။ အဖွဲ့သားတွေ စိတ်တိုင်းမကျလျှင် ပူညံပွက်ညံ ဖြစ်လာနိုင်သည်။ စောဒကတွေ တက်ကြတော့မည်။ အောင်ကျော်ဦး (ကြွက်နီ) ဥာဏ်တွေ ထုတ်ရပြီ။ အဆက်အသွယ် အပေါင်းအသင်းတွေကို လှည့်ပတ် စဉ်းစားသည်။ ဟုတ်ပြီ။ လိဒ်ဂီတာကို မျိုးအောင်ဆီက ဆွဲလိုက်မည်။ မျိုးအောင်က ပုသိမ်နှင့် ၁၆ မိုင်ခန့် ဝေးသော ကန်ကြီးထောင့်မှာ နေသည့် သူဌေး။ ဂီတာ အတီး ကျင့်ချင်၍ ကိုယ်ပိုင် ဆောလစ် ဂီတာ တစ်လက် ၀ယ်ထားသူ။ သူ့ဂီတာက စင်ကာပူလုပ် ဂစ်ဘဆင်ပုံ အသစ်ကျပ်ချွတ်။ ဟုတ်ပြီ။ ပထန်အတွက် ရအောင် ဆွဲပေးမည်။
ကိုသျှပ်အတွက် ဘေ့စ်ဂီတာပဲ ကျန်သည်။ စဉ်းစား၊ စဉ်းစားစမ်း။ ဘယ်က ရမလဲ။ ဘေ့စ်ဂီတာ ကောင်းကောင်း တစ်လက် ဘယ်က ရမလဲ။ ဟုတ်ပြီ။ စောဆင်မြူရယ် (စမ်းမြယ်) မှာ ကိုယ်ပိုင် ဘေ့စ်ဂီတာ တစ်လက် ရှိသည်ပဲ။ ပေါ်ပြူလာ ဦးမန်းချစ်ရွှေ၏ လက်ထွက်။ Pick up နှင့် ကြိုးတွေက Fender။
ပုသိမ်မြို့ပေါ်မှာတော့ဖြင့် အကောင်းဆုံးသော ဘေ့စ်ဂီတာဟုပင် ဆိုရမည်။ ကိုသျှပ် လက်နှင့် စမ်းမြယ်၏ ဘေ့စ် ဂီတာ။ မတွေ့တွေ့အောင် စက်ပစ္စည်း တာဝန်ခံ အောင်ကျော်ဦး စီစဉ်ရတော့မည်။
(၁၅)
ပွဲ နီးကပ်လာသည့် တစ်နေ့မှာ ဌာနမှူးက တီးဝိုင်းတာဝန်ခံ ဆရာမဒေါ်စန်းစန်းကြူ အပါအ၀င် သူတို့ အဖွဲ့ကို ခေါ်တွေ့သည်။
"ကဲ ဆရာတို့ မေဂျာ ဖဲဝဲလ်အတွက် မင်းတို့ တီးဝိုင်းက ကုန်ကျမယ့် စက်ငှားခကို တင်ပြကြ။ ဆရာတို့ ဌာနက ခွင့်ပြုနိုင်တဲ့ ပိုက်ဆံနဲ့ လောက်သလား ကြည့်ရမယ်" ဟု ဆိုသည်။
အပြင် ရောက်တော့ ဆရာမ မေးရပြီ။
"ဟေ့. . . သျှပ်၊ မင်းအတွက် ဘေ့စ်ဂီတာ သပ်သပ်ငှားပေးဖို့ ကြွက်နီကို ပြောထားတယ်ဆို၊ အဲဒါ ဘယ်လောက် ကျမလဲ"
"ဒီကောင် ပြောတာ သုံးရာလောက် ကျမယ်တဲ့၊ ဆရာမ"
"အမလေး . . .သျှပ်ရယ်"
ဆရာမက သူ့ရင်ဘတ် သူလက်နှင့် ထောက်နေရပြီ။ ထိုခေတ် ထိုအခါက ကျပ်သုံးရာ ဆိုတာ မနည်းမနောကြီး။
"ဟယ် . . . သျှပ်ရယ်၊ ဦးမြသွင် ဂီတာနဲ့ပဲ တီးလို့ကော မရဘူးလား"
"ရတော့ ရပါတယ် ဆရာမ။ ကျွန်တော်တို့က ပိုကောင်းချင်လို့ ဂီတာ ကောင်းကောင်းနဲ့ စီစဉ် ရတာပါ"
ကိုသျှပ်က လေအေးအေးနှင့် ပြောသည်။ သို့သော် တစ်စက်မျှ လျှော့မည့်ပုံ မရှိသဖြင့် ဆရာမက အောင်ကျော်ဦးဘက် လှည့်လာသည်။
"မောင်ကြွက်နီ၊ ဆရာမ ပြောမယ်၊ ဂီတာဖိုးကို နည်းနည်း လျှော့ရင် ကောင်းမယ် "
ဟုတ်ကဲ့။ အောင်ကျော်ဦးကလည်း အစွမ်းကုန် ညှိနှိုင်းပေးဖို့ ဆုံးဖြတ် ပြီးပါပြီ။ ဌာနက ခွင့်ပြုနိုင်သော ငွေပမာဏလည်း အကန့်အသတ် ရှိနေသည်။ ကိုသျှပ်ကလည်း ဒီဂီတာ မှ ဒီဂီတာ။ မရလျှင် လုံးဝ မဖြစ်သည့် အချိုး။
အောင်ကျော်ဦးကတော့ ဗျာများပြီ။
ဘာပဲဖြစ်ဖြစ် စမ်းမြယ်ဆီသို့ အပြေးသွားကာ ရင်ဘတ်စည်တီး အမျိုးမျိုး လှည့်ပတ်ဖွဲ့နွဲ့ ပြောရဦးတော့မည်။ တစ်ကြိမ်နှင့် မရလျှင် အကြိမ်ကြိမ် သွားမည်။ တွေ့တိုင်း အပူကပ်ပြီး ပြောမည်။နောက်တော့မှာ အသနား လွန်သွားပြီး အလကားပဲ ဖြစ်ဖြစ် မရရအောင် တောင်းပန်ရတော့မည်။
(၁၆)
နောက်ဆုံးတော့ စမ်းမြယ်နှင့် ညှိနှိုင်းပြောဆို အဆင်ပြေ သွားသည်။
အဲသည်လို သဘောတူညီမှုရထားပြီးသော်ငြားလည်း တစ်ဘက်မှ ကိုသျှပ်က တပူပူတစာစာ။ အင်မတန်စကားနည်းခဲ့ရာမှ ယခုတော့ဖြင့် ဘေ့စ်ဂီတာအတွက် စကားလုံးတွေ သွန်ချသည်။
တကယ်ဆိုမျိုးအောင်၏ လိဒ်ဂီတာလည်း ပွဲနေ့ကျမှပဲယူရမည်။ ဒရမ်ဆက်လည်း ထိုနေ့မနက်ကျမှ မြောင်းမြက ရောက်လာမည်ဖြစ်သည်။ ဒီကြားထဲမှာ ရီဟာဇယ်ကိုတော့ ရှိတာတွေနဲ့ပဲထိန်းပြီး တီးထားရမည်။ သို့သော် ကိုသျှပ်က တားမနိုင်၊ ဆီးမရ။ စက်တွေပြင်ဆင်ပြီး သီချင်းစတိုက်မည်အပြုမှာ ဂြိုလ်ကျပြီ။
"ဟေ့ကောင် ကြွက်။ မင်းပြောထားတဲ့ စမ်းမြယ် ဂီတာကော"
"ပွဲနေ့ကျ ရမယ်လေဗျာ"
"ဟာကွာ၊ မဟုတ်သေးဘူးလေ။ ငါအခုကတည်းက အဲဒီဂီတာနဲ့ တီးကြည့်ထားချင်တာကွ။ ဒါမှ သူ့ဂီတာရဲ့ အထာကို သိရမှာပေါ့"
ထိုသို့ ဂျီတိုက်တော့သည်။
"ကိုသျှပ်"
အောင်ကျော်ဦးက မေတ္တာရပ်ခံဖို့ ကြိုးစားသည်။ ချစ်ရိုသေရသော ကိုသျှပ်ကို သူလွန်ဆန်ဖို့ အခက်တွေ့နေဆဲ။ ဆရာမ ဒေါ်စန်းစန်းကြူကလည်း ၀င့်တဲ့၍ -
"အေးလေ၊ မောင်ကြွက်နီရယ်။သျှပ်ပြောတာဟုတ်တာပဲ။ မင်းပဲ ယူပေးမယ်ဆို"
ထိုအချိန်မှာတော့ အောင်ကျော်ဦး ဘာမျှမတတ်နိုင်တော့ပြီ။ အားလုံးကို လက်မြှောက်အရှုံးပေးရပြီ။ ရေချမ်းကို လက်တို့ပြီး နှစ်ယောက်သား စက်ဘီးနှင့် ထပြေးရတော့သည်။
(၁၇)
စမ်းမြယ်ကို မတွေ့တွေ့အောင်ရှာ။ မရရအောင် ရှင်းပြ တောင်းပန်ပြောဆိုလိုက်တော့ ဘေ့စ်ဂီတာရလာသည်။
ဝါဆို ၀ါခေါင်ကာလ။ မိုးက စိတ်မချရ။ အပွန်းအရှလည်း ခံ၍မဖြစ်။ သို့ဖြစ်၍ ဘေ့စ်ဂီတာကြီးကို ကရင်ပုဆိုး တစ်ထည်နှင့်ပက်ပြီး သယ်လာခဲ့ရတော့သည်။
"ရော့ ဗျာ၊ ကိုသျှပ်"
ဘေ့စ်ဂီတာကို လက်ထဲအပ်လိုက်သောအခါကျမှ တီးဝိုင်းတိုက်ဖို့ကိစ္စ၊ ဘာဆိုဘာမျှ မလုပ်သေးဘဲ ငုတ်တုတ်ကလေး ထိုင်စောင့်နေခဲ့သည့် ကိုသျှပ်က သူ၏ မျက်မှန်ထူထူလေးကို တစ်ချက်ပင့်ကာ -
"ဆရာမ၊ ကျွန်တော်တို့ စလို့ရပါပြီ" ဟု လုပ်တော့သည်။
(၁၈)
ဇူလိုင်လ၏ နေ့တစ်နေ့။
ဓာတုဗေဒဌာန၊ မေဂျာဖဲဝဲလ်အတွက် တစ်နေကုန်သီချင်းတိုက်အပြီး။ သူတို့သူငယ်ချင်းတစ်စု ဦးပြုံး(မိုးပြာ)ဆိုင်တွင် စကားဝိုင်းဖွဲ့ပြောဆိုနေကြရာမှ အောင်ကျော်ဦး (ကြွက်နီ)က -
"သာထူးရေ၊ တို့ဒီည Serenade လုပ်ရအောင်ကွာ" ဟု မသိမသာ စကားစလိုက်သည်။
"ခွေးသား၊ သီတဂူမှာ ဆိုချင်တာ မဟုတ်လား"
အကြောင်းသိ သာထူးက အတပ်ပြောလိုက်သည်။ သီတဂူသည် အဆောင်မရသောနယ်က ကျောင်းသူတွေကို လက်ခံပေးထားသည့် အပြင်ဆောင်ကလေး။ အောင်ကျော်ဦး စိတ်ဝင်စားသော ကောလိပ်ကျောင်းသူကလေးက သီတဂူဆောင်မှာနေသည်။
"အေးပါကွာ၊ ညနေကတည်းက မင်းနေရာဦးထားပေး"
အောင်ကျော်ဦးက ဘာဆိုဘာမျှ မသိသလိုမျိုး မျက်တောင်ကလေး တစ်ချက်နှစ်ချက် ပုတ်ခတ် ပုတ်ခတ်နှင့် နေရာဦးထားဖို့ ပြောရင်း အတည်ပြုပေးလိုက်သည်။
ထိုစဉ်တုန်းက ကိုသျှပ်သည် သီတဂူဆောင်နံဘေးနားက သီတာဦးဆောင်မှာ တစ်လှည့်။ ခေတ္တရာဆောင်မှာ တစ်လှည့်။ သူ့မိတ်ဆွေ အပေါင်းအသင်းများနှင့် ကြုံသလို နေနေခဲ့သည်။ ကိုသျှပ်က -
"ဟေ့ကောင် ကရင်။ မင်းရယ်။ ပထန်ရယ်။ ရေချမ်းရယ် လာမယ်ပေါ့"
"ဟုတ်တယ်၊ ကိုသျှပ်။ မြင့်သန်းက ပုန်းညက်မြိုင်မှာ တင်နေတာ"ဟု အောင်ကျော်ဦးက အားတက်သရော ဖြေလိုက်သည်။ ကိုသျှပ်ပါလာလျှင်တော့ ပွဲမြိုင်ပြီဖြစ်သည်။
"အေး ဟုတ်ပြီလေ။ ပထန်၊ မင်းနုတ်စ်တွေ အားလုံးယူခဲ့။ ဘုတ်ထောင်ဖို့ ကတ်ပါယူခဲ့။ ဖယောင်းတိုင်လည်း မမေ့စေနဲ့"
(၁၉)
ဤသို့ဖြင့် သူတို့တစ်တွေ ညချမ်းချိန်ခါ တေးသံသာဖို့ သီတဂူဆောင်ကို တပျော်တပါးကြီး ချီတက်ခဲ့ကြသည်။
သူတို့ရောက်သွားတော့ သာထူးရောက်နှင့်နေပြီ။ သီတဂူဆောင်ရှေ့နားလေးမှာ ဖျာစုတ်တစ်ချပ်နှင့် နေရာဦးထားပြီးခဲ့ပြီ။ သူတို့အုပ်စုထဲက တစ်လုံးတည်းသာ ဂစ်တာအသစ်ဖြစ်သည့် "ဂစ်တာ မြို့တော်"နှင့် သီချင်းဟဲနေပြီ။
"ထာဝစဉ်သာ …ချစ်တဲ့သူရဲ့အနားမှာနေလိုက်ချင်…။လည်တိုင်မှာ….၀တ်ဆင်လာတဲ့ဆွဲကြိုးလေး…ဖြစ်ချင်….။ ချစ်တဲ့သူ…မင်းကြည်ဖြူရင်…ပြောပြမယ်နားဆင်….။ မင်းရင်ထဲအသည်းထဲက …နှလုံးသားလေး…ဖြစ်ချင်…"
"သံသာသာတေးလေးတွေကို …မင်းနားဆင်ရင်အမြဲပင်…ကော်ရစ်ဒါခန်းမ….အလယ်က ပြတင်းပေါက်လေး…ဖြစ်ချင်။ ချစ်တဲ့သူ … မင်းကြည်ဖြူရင် …ပြောပြပါမယ်…နားဆင်။ မင်းငုံထားတဲ့ (…)လေး…ဖြစ်ချင်…"
ထိုနေရာအရောက်မှာ သကြားလုံးလေးဟု ဆိုရမည့်အစား ချေးတုံးလေးဟု သာထူးက ဆိုထည့်လိုက်ရာ သီတဂူ တစ်ဆောင်လုံးဝါးခနဲ ပွဲကျသွားတော့သည်။
(၂၀)
ထိုအချိန်မှာပင် ကိုသျှပ် ဆိုက်ဆိုက်မြိုက်မြိုက် ရောက်လာသည်။
"ဟေ့ကောင် သာထူး။ အဲဒီသီချင်းပြန်ဆိုမယ်"
သာထူးက ရုတ်တရက် ဘာပြောရမှန်းမသိ။ ကြောင်အမ်းအမ်းဖြစ်သွားရသည်။
"ဗျာ … ကိုသျှပ်"
"အေး…ဟုတ်တယ်။ ပြန်ဆိုကြမယ်။ မင်းက soprano ဆို။ ကရင်က tenor နဲ့ ငါက Alto ဆိုမယ်။ ပထန် မင်းက Bass နော်။ အေး … ဒီက နုတ်စ်တွေအတိုင်း မလွဲစေနဲ့" ဆိုပြီး ဆိုရမည့် နုတ်စ်များကို ချပေးလိုက်ပါတော့သည်။
(၂၁)
ဟာမိုနီတွေ စီစဉ်နေဆဲ ကြားကာလမှာ အတန်ကြာမျှ အသံတိတ်နေသောကြောင့် သီတဂူတစ်ဆောင်လုံးက ကျောင်းသူတွေ နားတစွင့်စွင့်။ ပြတင်းပေါက်က ပြူတစ်ပြူတစ်။ ဘာတွေများဖြစ်နေကြသလဲဟု စူးစမ်းစပ်စုကြသည်။
ကိုသျှပ်ကတော့ ဘာဆိုဘာမျှ ဂရုမစိုက်။ သီတဂူဆောင်ကို ယခုညမှာ သူလာတာက သီချင်းဆိုဖို့မဟုတ်။ ပထန်ကို နေ့လည်း နေ့အလျောက်၊ ညလည်း ညအလိုက်၊ ဂီတာ ဆက်သင်ပေးပြီး တစ်ဖွဲ့လုံးကို မောင်းဖို့သာဖြစ်သည်။
တကယ်တော့ဖြင့် သူတို့အဖွဲ့သားတွေ တစ်နေကုန် တစ်နေခန်း သီချင်းတိုက်ခဲ့ပြီးပြီ။ သီချင်းတိုက်တာမှ ရိုးရိုးမဟုတ်။ ကိုသျှပ်က အတိအကျမရလျှင် လက်သင့်မခံသူပီပီ နုတ်စ်တွေ အတိုင်း အတူတူအောင် တီးခဲ့ရသည်။
သို့သော် ကိုသျှပ်နှင့်ကဖြင့် ယခုလို မိန်းကလေးအဆောင်ရှေ့မှာ ညချမ်းချိန်ခါ တေးသံသာဖို့ကိုပင် လွတ်လပ်ခွင့်မရ။
"ကိုင်း …. ပြန်စမယ်"
ကိုသျှပ်၏ အမိန့်သံအောက်မှာ လေးယောက်သံပြိုင်တီးဝိုင်းစတော့သည်။ ဟာမိုနီအသံလေးသံကို နုတ်စ်အတိုင်း ထပ်တူမကျမချင်း ပြန်ဆိုရသည်။
"ချစ်တဲ့သူ မင်း…ကြည်ဖြူရင် ပြောပြပါမယ်၊ နားဆင်"
(၂၂)
သာထူး သီချင်းဆိုပြီးသွားသောအခါ
"ဟေ့ကောင် မြင့်သန်း။ ကိုင်ဇာ ဟိုသီချင်း ဆိုစမ်း" ဟု လုပ်ပြန်သည်။
သီချင်းက တေးရေးစာဆို စောဘွဲ့မှူးရေးဖွဲ့သည့် "အိမ်အပြန် ကျောင်းအဆင်းမှာ သီချင်းလေး..ဆို"
Banana Boats song ဖြစ်သည်။ ထိုသီချင်း အဆိုပိုဒ်ကိုလည်း ဟာမိုနီ မကျမချင်း အကြိမ်ကြိမ် ဆိုစေပြန်သည်။
"ကရင် မင်းက ငါ့အသံဘက် လာမရောနဲ့ကွ။ ဟိုကောင် ပထန်၊ မင်းက ဘေ့စ်ဆိုရမှာ။ တန်နာသံ မပါစေနဲ့။ ကဲဟုတ်ပြီ။ တစ်ခေါက်ပြန်စကြမယ်"
(၂၃)
ဆိုရလျှင် ယခုလို ကွိုင်ယာ Choir ဆိုတာ အောင်ကျော်ဦးအတွက် ဘာမျှမထူးဆန်း။ သူ၏ မိခင် ဒေါ်မာစီက ခရစ်ယာန်ဘာသာဝင်ဖြစ်သည်။ ငယ်စဉ်ကလေးဘ၀ကတည်းက ဘုရားရှိခိုးကျောင်း ဓမ္မတေးသီချင်း သီဆိုရာမှာ နားယဉ်ပါးပြီးသား။ အထိအတွေ့ရှိပြီးသား။
ထို့အပြင် သူကိုယ်တိုင်က ဘိုကနောင်ရပ်ကွက်သား။ ကရင် တိုင်းရင်းသားတွေနှင့်ချည်း ဖွဲ့စည်းထားခဲ့သည့် "မဟူရာ" အပျော်တမ်းတီးဝိုင်းမှာ ဒရမ်တီးခတ်နေသူ။ သူတို့ "မဟူရာ" အတွက် ဟာမိုနီက အခက်အခဲမရှိ။ အထူးအဆန်းမဟုတ်။ အမိုး၊ ဒေါ်ချယ်ရီ၊ မနိုး၊ ကိုပိုက်၊ ကိုဖရယ်ဒီ၊ ပိုးပိုး၊ အားကိုးတို့က ဟာမိုနီ လိုက်ပေးနေကျ။
ထို့သို့ လက်ပွန်းတသီး နီးစပ်နေသော်လည်း ဟာမိုနီ ဘာသာရပ်ကို သူမတတ်ကျွမ်း။ သီးခြားလေ့လာလိုက်စား ထားရကောင်းမှန်း သတိမပြုမိ။
ဒီညတော့ဖြင့် သူခံရပြီ။
မွန် ဗမာကပြား ကိုသျှပ်က ဟာမိုနီမှာ သူ့ဆရာ လုပ်နေခဲ့ချေပြီ။ သည်လိုနှင့် ကိုသျှပ်တစ်ယောက် ဟာမိုနီကို ကျကျနန ဆည်းပူးနေပြီဆိုတာကိုလည်း သိလိုက်ရသည်။ အောင်ကျော်ဦးစိတ်ထဲ နည်းနည်း မခံချင်သော်လည်း မနာလိုရုံမှအပ ဘာမျှမတတ်နိုင်။
(၂၄)
သီတဂူ အဆောင်သူတွေလည်း ထိုညတုန်းက အကြီးအကျယ် သည်းခံနားဆင်ခဲ့ရသည်။ အမျိုးသမီးအဆောင်ရှေ့ကို ကောင်လေးတစ်သိုက်လာပြီး ဂီတာတွေနှင့် တေးချင်းဖွဲ့ဆိုကြမှာကို တိတ်တခိုး အသာလေး နားအရသာ ခံချင်ကြတာ။ အခုတော့ဖြင့် လုပ်လိုက်ပုံက တစ်ခြားစီ။ ၀ါဆိုဖယောင်းတိုင်တွေ ထွန်းပြီး နုတ်စ်စတင်းတွေ ထောင်ကာ နုတ်စ်မကိုက် ကိုက်အောင်အကြိမ်ကြိမ် အထပ်ထပ် သီချင်းတိုက်နေကြသည့် အဖွဲ့နှင့်မှ လာတိုးရချေသည်။
ကိုသျှပ် အစီအစဉ်ဖြင့် သီချင်းလေ့ကျင့်နေကြရင်း ကြားဖြတ်ထဲမှာ ရေချမ်းတို့၊ ပထန်ကြီးတို့က ဆိုလိုသီချင်းလေးတွေ တစ်ပုဒ်စီလောက် ၀င်ဖျော်ဖြေပေးလိုက်၍သာ တော်တော့သည်။ ဘာပဲဖြစ်ဖြစ် အဆောင်နေ သူငယ်ချင်း မိန်းကလေးတွေ အတွက်က အတင်းအဖျင်းပြောစရာ၊ မချင့်မရဲနှင့် ရယ်စရာဖြစ်ကြသလို အံ့သြဘနန်း ဖြစ်ကြသည်။ ပြောစမှတ်ကြီး တွင်ကျန်ရစ်ခဲ့သည်။
အချို့ကတော့ဖြင့် စားစရာလေးတွေ ခိုးပေးပို့ရင်း အားပေးကြပါသေးသည်။
(၂၅)
သီတဂူအဆောင်ရှေ့မှာ သူတို့၏ ဆင်ဖိုနီဝိုင်းလေး ခေတ္တအားလပ်ချိန် ပေးထားသော အခိုက်အတန့် တစ်ချက်မှာ အောင်ကျော်ဦးက ကိုသျှပ် အနီးနားအသာကပ်ပြီး -
"ကိုသျှပ်၊ ယုဇနဆောင် ဒင်နာကျရင် အဖွင့်ကို အဆောင်သူတွေရဲ့ ကွိုင်ယာနဲ့ ဖွင့်ချင်တယ်လို့ ဆရာမ ဒေါ်နော်မာအေးက ပြောနေတယ်။ ဟို… ရေဒီယို သီချင်းတစ်ပုဒ် ရှိတယ်လေ။ သာယာသော ညနေခင်းချိန်ခါ… သာယာသောညနေခင်းချိန်မှာ …. ညှင်းလေပြေ ဆော့မြူကာ …။ အဲဒီမယ်လိုဒီကို အဆောင်နဲ့ လိုက်မယ့် စာသားသွင်းပေးပါတဲ့"
ကိုသျှပ်အတန်ငယ် တွေသွားသည်။ နည်းနည်းစဉ်းစားပြီး ခဏနေတော့မှ -
"အဲဒီလိုတော့ ရှိပြီးသားကြီး အပေါ်မှာ ငါမရေးချင်ဘူးကွာ။ ရေးမယ်ဆိုလည်း အသစ်တစ်ပုဒ်ရေးပေးမယ်" ဟုဆိုသည်။ အောင်ကျော်ဦး ထခုန်ချင်မတတ် ၀မ်းသာသွားသည်။ သူလိုချင်တာကလည်း ဒါပဲလေ။
(၂၆)
ထိုညက သူတို့၏ သီတဂူဆောင် ညချမ်းချိန်ခါ တေးသံသာဝိုင်းကို သိမ်းအပြီး အားလုံး လူစုခွဲ၍ အသီးသီး အသကပြန်ကုန်ကြပြီ။
ကိုသျှပ်၊ အောင်ကျော်ဦးနှင့် သာထူးတို့ သုံးယောက်သာ သီဟဆောင်လမ်းကွေ့က ကံ့ကော်တောအုပ်ထဲမှာ ထိုင်ရင်း ကျန်နေခဲ့ကြသည်။ တစ္ဆေခြောက်သည်ဟု နာမည်ကြီးလှသော ကံ့ကော်တောအုပ်။
သာထူးက မဟန်နိုင်တော့သည့်အဆုံး ခင်းထားသည့် ဖျာပေါ်တွင် အိပ်ပျော်သွားခဲ့သည်။ အောင်ကျော်ဦးနှင့် ကိုသျှပ်တို့သာ ညကိုအဖော်ပြုရင်း ကျန်ရစ်ကြတော့သည်။
"ကိုသျှပ်"
အောင်ကျော်ဦးက ထိုသို့ စကားအစ။ တစ်ခုခု ပူဆာတော့မည်ဆိုတာကြိုတင် သိနှင့်နေသလိုမျိုး ကိုသျှပ်က ငဲ့စောင်းကြည့်သည်။
"ကျွန်တော့်ကို “Dust in the wind” တီးတာလေး သင်ပေးပါလားဗျာ"ဟု မရဲတရဲ ဆိုမိသည်။
"မင်းက ဒရမ်သမားပဲကွ"
"မဟုတ်ဘူးဗျာ။ အဲဒီသီချင်းကို ကျွန်တော် ဆိုတတ်ချင်တယ်။ ကျော်ဟိန်း ဆိုထားတာလည်း ရှိတယ်လေ။ အမေ့ရင်မှာ ကြီးပြင်းခဲ့ဖို့ သားလေးတစ်ယောက်ကို ဖန်ဆင်းထား…"
ထိုစာသားကို ရွတ်ပြရင်း အောင်ကျော်ဦး၏ အသံက မသိမသာလေး တုန်ရီလှုပ်ခါသွားခဲ့သည်။
(၂၇)
ကိုသျှပ်က အောင်ကျော်ဦး၏ စိတ်ကို ချက်ချင်းဖတ်၍ ရသွားသည်။ ခံစားချက်ချင်း ကူးစက်ကြည့်၍ ရခဲ့သည်။
အောင်ကျော်ဦးမှာ အမေဆုံးထားတာ တစ်နှစ်ပင်မပြည့်သေး။ သူကိုယ်တိုင်ကကော။ အမေ့ရင်ခွင်က ရေခြားမြေခြား မော်လမြိုင်မှာ။ သူကသာ ခြေကန်ပြီး ခေါင်းမာစွာနှင့် ပုသိမ်မှာ ကျန်နေခဲ့တာ။ အမေဝေးသည့် သားတစ်ယောက်ပါပဲ။
"အေး၊ ငါပြပေးမယ်"
ထိုသို့လှိုက်လှိုက်လှဲလှဲဆိုပြီး ဆရာစား မထား။ မခြွင်းမချန် ကော့ဒ်ကွန်စထရပ်ရှင်းဆိုတာ ဘယ်လို၊ Tonic, Major 3rd, Perfect 5th အစရှိသဖြင့် စနစ်တကျ ပီပီပြင်ပြင် သင်ပေးခဲ့သည်။
ထိုတစ်ည၏ သင်ခန်းစာနှင့်ပင် အောင်ကျော်ဦးလည်း “Dust in the wind” သီချင်းကို ယနေ့အထိ အလွတ်တီးတတ်သွားခဲ့ပါတော့သည်။
(၂၈)
၁၉၈၃ ခုနှစ်။ ဇူလိုင်လ ၂၇ရက်။
ယုဇနဟောလ် ဒင်နာ။ ကန်သာယာခန်းမကြီးထဲမှာ သူတို့ တီးဝိုင်းက စင်မြင့်ပေါ်တွင် အဆင်သင့်ဖြစ်နေကြပြီ။ အဖွင့်တီးလုံး သွေးပူလည်း တီးပြ ပြီးကြပြီ။ ငြိမ်သက်နေသည့် တဒင်္ဂအပြီးတွင် အဆောင်ကျောင်သူများ ကိုယ်စား စတုတ္တနှစ်ကျောင်းသူ၊ အစ်မကြီး မမြတ်မွန်(နောင် ဓာတုဗေဒဌာန၊ ရန်ကုန်တက္ကသိုလ်) က အခမ်းအနားမှူးအဖြစ်နှင့်-
"ကျွန်မတို့ ယုဇနဆောင်ရဲ့ နှုတ်ဆက်ညစာစားပွဲမှာ တက်ရောက်ချီးမြှင့်ကြတဲ့ ဆရာကြီး၊ ဆရာမကြီးများနှင့်တကွ ဖိတ်ကြားထားတဲ့ အထူးဧသည့်သည်တော်ကြီးများ သူငယ်ချင်းများကို ယုဇနအဆောင်သူလေးများက နှုတ်ဆက်သီချင်းနဲ့ ပထမဆုံးစတင်သီဆို ဖွင့်လှစ်ပါ့မယ်ရှင်။ အဲဒီ "နှုတ်ဆက်ပါတယ်" ဆိုတဲ့ သီချင်းလေးကို Shore of Peace တီးဝိုင်းမှာ ဘေ့စ်ဂစ်တာ တီးပြီး၊ အရိန်းခ်ျမင့် လုပ်ပေးတဲ့ ဒုတိယနှစ် သိပ္ပံဇီဝကျောင်းသား သျှပ်မှူးကျော်က ရေးဖွဲ့ပေးထားတာ ဖြစ်ပါတယ်ရှင်" ဟု ကြေညာပေးလိုက်သည်။
(၂၉)
အစွမ်းကုန် ဖြီးလိမ်းခြယ်သထားသော ယုဇနအဆောင်သူလေးများ စင်ပေါ်မှာ စီစီရီရီနေရာယူခဲ့ကြပြီ။ မီးရောင်အောက်မှာ အားလုံးပဲ လှပနေကြသည်။ ဂီတနှင့်အတူ ချိုလွင်နုပျိုသော အသံလေးများနှင့် -
"နှုတ်ဆက်ပါတယ် မိတ်ဆွေတို့ …ခေါင်းလောင်းသံလည်း …တိတ်ပြီမို့။
နှုတ်ဆက်ပါတယ် ချစ်ဆွေတို့… ယုဇနရင်ခွင်ချစ်တဲ့သူတွေမို့။
ကန်ရေပြာလည်း မျက်ရည်စို့…။ မာစေသာစေတောင်းဆုချွေပါစို့" ဟု စတင်လိုက်ကြသည်။
"ပြန်ဆုံနိုင်ဖို့ရာ ရင်မှာတောင်းဆုပြုလျက်သာ။
ရေကြည်ချမ်းမြကြည်လင်လန်းစေဖို့ရာ…
နောင်တစ်ချိန်ပြန်တွေ့ရင်ခေါ်ပါပြောဦး …နှုတ်ဆက်ဦးမလား။
ပျော်ရွှင်စရာအချိန်တွေကို…ကိုယ်မမေ့ပါ"
အဆိုပါ ဇူလိုင် အနှောင်းပိုင်း ညတုန်းက မိုးတွေသည်းလှသည်။
သြော်….။
"ပျော်ရွှင်စရာ အချိန်တွေကို ကိုယ်မမေ့ပါ"
ပုသိမ်ကောလိပ်၊ ယုဇနအဆောင်နှင့် ပက်သက်ခဲ့သည့် ထိုသီချင်းသည် ယခုအချိန်ထိ ကောင်းနေဆဲ။ ယခုအချိန်ထိ သက်ဆိုင်သူတို့ ရင်ထဲမှာ ရှိနေဆဲ။ တေးဂီတနှင့် ထုံမွှန်းထားခဲ့သည့် မမေ့နိုင်စရာ ကောလိပ်ညတစ်ည၏ သီချင်းတစ်ပုဒ်။
(၃၀)
တီးဝိုင်းစင်ပေါ် စတက်ချိန်မှာ အဖွင့်မိတ်ဆက် သွေးပူ သဘောမျိုး တီးခတ်ဖို့အတွက် Instrumental တစ်ပုဒ်လည်း ကိုသျှပ် လုပ်ထားခဲ့သည်။ အဆိုပါ Roman Guitar တီးလုံးကို ယခုအချိန်ထိ ပုသိမ်မြို့မှာ တီးနေကြဆဲ ဖြစ်သည်။ ဒါကို မတီးလိုက်ရလျှင် ၀ိုင်းက လမိုင်းမကပ်ဟု ယူဆကြသည်။
အခန်း(၉) ရေမျောကမ်းတင် ခြေဦးတည့်ရာ
(၁)
၁၉၈၃ ခုနှစ်အကုန်။
စာမေးပွဲလည်း ဖြေပြီးပြီ။ အမေ့ရင်ခွင်နှင့်ဝေးနေခဲ့တာလည်း အတော်ကြာသွားပြီ။ သို့ဖြင့်နောက်ဆုံးတော့ မော်လမြိုင်ကို လိုက်သွားဖို့ ကိုသျှပ်ဆုံးဖြတ်လိုက်သည်။
ပုသိမ်မြေမှာ ကုတ်ကတ်ဖက်တွယ်ပြီး ကိုသျှပ်သောင်တင်နေခဲ့တာ။ အခုတော့ အချိန်တန်ပြီ။ အမေ့အိမ်သို့ သူပြန်သွားတော့မည်။
ဂီတအပေါင်းအသင်း သူငယ်ချင်းတွေအားလုံးကတော့ ကိုသျှပ်ကို မသွားစေချင်။ ကိုသျှပ်ထွက်ခွာသွားလျှင် သူတို့မှာ အစားထိုး၍ မရနိုင်သော ကွက်လပ်ကြီး တစ်ခုကျန်ရစ်လိမ့်မည်ဆိုတာ သိကြသည်။ သို့သော် တားမြစ်၍လည်း မဖြစ်စကောင်းသောအရာ။
မော်လမြိုင်အိမ်ပြန်ခရီးမှာ အောင်ကျော်ဦး (ကြွက်နီ)လိုက်ပါသွားသေးသည်။ သူတို့နှစ်ယောက်၏ သံယောဇဉ်အနှောင်အဖွဲ့က ကြီးမားလှချေသည်။ အောင်ကျော်ဦးကို ကိုသျှပ်က ညီအရင်းတစ်ယောက်လိုချစ်သည်။ အောင်ကျော်ဦးကို သူအမြဲထိန်းသိမ်းပေးခဲ့သည်။
"ကြွက်နီဟာ အင်မတန်အတဲ့ နုံတဲ့ကောင်။ ဒီကောင်နဲ့ ဆက်ဆံဖူးတဲ့လူတိုင်း သူ့အကြောင်းသိတယ်။ မင်းလည်း သိတာပဲ။ သူနုံလို့ အလို့သာ မင်းတို့ လှည့်တိုင်း ခံခဲ့ရတာပဲ" ဟု သူငယ်ချင်းတစ်ယောက်ကို ကိုသျှပ်ပြောဖူးသည်။
(၂)
ပုသိမ်ကို အောင်ကျော်ဦးပြန်မည်ဆိုတော့ ကိုသျှပ်ကစိတ်မချ။ ချစ်ခင်လှစွာ ကတိတွေအမျိုးမျိုးတောင်းသည်။ တီးဝိုင်းကို ဖျက်မပစ်ဖို့။ နုတ်စ်နှင့် ဂီတာတီးတာ
မှန်မှန်လေ့ကျင့်ကြဖို့ အထပ်ထပ်အခါခါမှာသည်။
"ဟေ့ကောင် ကရင်။ ပုသိမ်ပြန်ရောက်ရင် မင်းလည်းစာရေး။ ဟိုကောင်တွေကိုလည်း ရေးခိုင်း။ ငါလည်းဒီကနေ စာရေးမယ်။ သီချင်းအသစ်တွေ ရေးဖြစ်ရင်လည်း လှမ်းပို့ပေးလိုက်မယ်" ဟုဆိုသည်။
"ပုသိမ်ကို ငါလာခဲ့ဦးမှာပါကွာ" ဆိုသော စကားသံမှာတော့ဖြင့် တုန်ခါ လှိုက်မောနေခဲ့သည်။
(၃)
အချိန်တန်၍ အောင်ကျော်ဦး ပုသိမ်ပြန်သွားသောအခါ ကိုသျှပ်တစ်ယောက် မော်လမြိုင်မှာ ငေါင်တောင်တောင်နှင့် ကျန်ရစ်ခဲ့ရချေတော့သည်။
အောင်ကျော်ဦးကို ကိုသျှပ်သံယောဇဉ်တွယ်ခဲ့သလို ကိုသျှပ်တို့ တစ်အိမ်လုံးကလည်း မိသားစုအရင်းအချာ တစ်ယောက်သဖွယ်ချစ်ခင်ခဲ့ကြသည်။ ကိုသျှပ်၏ ညီငယ်တွေနှင့်ဆိုလျှင်လည်း တစ်သားတည်းကျအောင်ပင် လုံးထွေးနေခဲ့ကြသည်။
ယခုတော့ဖြင့် အောင်ကျော်ဦးလည်း ငြိမ်းချမ်းရေးကမ်းခြေ Shore of Peace တီးဝိုင်းလေးရှိရာ ပုသိမ်မြေသို့ ပြန်သွားခဲ့ချေပြီ။ အောင်အောင်၊ ရေချမ်း၊ သာထူး၊ သူတို့ ဂီတညီအစ်ကိုတွေနှင့် ကိုသျှပ် ဘယ်အချိန် ဘယ်အခါ ပြန်ဆုံနိုင်မည် ဆိုတာ ဘာမျှမရေရာ။
မော်လမြိုင်မှာ မိသားစုနှင့်အတူတူ နေသာ နေနေရသော်လည်း ကိုသျှပ်စိတ်ထဲမှာ အာသာမပြေ။ ဟာတာတာကြီး ဖြစ်နေသည်။
(၄)
မော်လမြိုင်ကို သူပြန်ရောက်လာသည့်အတွက် ၀မ်းအသာဆုံးကတော့ အမေပဲဖြစ်လိမ့်မည်။ အဖေလည်း စိတ်ထဲ ပျော်ရွှင်ကျေနပ်လိမ့်မည်သာဖြစ်သည်။ ယခင်တုန်းက ပုသိမ်မှာ စာမေးပွဲကျ၊ အိမ်ကို ချက်ချင်းပြန်မလာ၊ သောင်မတင် ရေမကျ ဖြစ်နေခဲ့တာတွေအတွက် အဖေ စိတ်ဆိုးခဲ့ဖူးသော်လည်း ယခု ဘာဆိုဘာမျှ မပြော။ သားကြီးတစ်ယောက် အိမ်ပေါ် ဆိုက်ဆိုက်မြိုက်မြိုက် ပြန်ရောက်လာသည့် အချက် တစ်ခုတည်း အတွက်နှင့်ပင် အဖေ ကျေနပ်နေပုံ ရသည်။
ပုသိမ်မြို့မှ မော်လမြိုင် ဒီဂရီကောလိပ်သို့ Marine Biology အဏ္ဏ၀ါ ဇီဝဗေဒ မေဂျာ လာတက်ကြသည့် ကိုကျင်အောင်၊ ကိုအောင်သူတို့က ကျောင်းပိတ်ရက်တွေ ကျလျှင် ကိုသျှပ်တို့ အိမ်သို့ လာလာလည်ကြသည်။ ထိုအခါမျိုးကျလျှင် ပုသိမ်ကို အလွမ်း ပြေရသည်လား၊ ပုသိမ်ကို အလွမ်း ပိုရသည်လား ဆိုသည်ကိုပင် ခွဲခြား ပြောပြ မတတ်နိုင်တော့ပြီ။
သူ့စိတ်တွေက ပုသိမ်မှာပဲ သူငယ်ချင်းတွေဆီမှာပဲ ကျန်နေသည့်နှယ်။
(၅)
မော်လမြိုင်မှာ မပျော်ပိုက်သလို နေဖြစ်တာလည်း ရက်ပိုင်း၊ လပိုင်း စွန်းရုံလေးပဲ ကြာလိုက်သည်။
ထိုအတောအတွင်းမှာ အမေ့ လုပ်သက် ၂၄ နှစ်စာအတွက် လုပ်သက် ပင်စင် ထုတ်ယူဖို့ ရန်ကုန် သွားစရာ ကိစ္စ ပေါ်ပေါက်လာသည်။ ကိုသျှပ်က အမေ့ကို အဖော် ပြုပေးဖို့ ရန်ကုန်သို့ လိုက်လာခဲ့သည်။ အဖေ့ ဦးကြီး၏ ရန်ကင်း အိမ်မှာ သားအမိ နှစ်ယောက် တည်းခို။ အမေ့ ပင်စင်ကိစ္စအတွက် ရုံးတွေသွား။ စာရွက်စာတမ်းတွေ ဆောင်ရွက်။
တစ်ဘက်မှာ ရန်ကုန်ရောက် ပုသိမ်သားတွေဆီ ကိုသျှပ် သွားသွား လည်သည်။ တည်းအိမ်သို့ ပန်းချီ ကိုအောင်မင်းက ကိုသျှပ်နှင့် လိုက်လိုက်လာသည်။
တစ်ပတ် ဆယ်ရက်ခန့် အကြာတွင် အမေ့ ပင်စင် ကိစ္စ၀ိစ္စတွေလည်း လက်စသတ်ပြီ။ မော်လမြိုင် ပြန်ရတော့မည်။ ကိုသျှပ် ရန်ကုန်မှာ အဖော်သစ်တွေ တွေ့တော့ အိမ်ကို ပြန်မလိုက်ချင်။ အစကတည်းက လမ်းတရှာတည်း ရှာနေခဲ့သည်။
သို့ဖြင့် ပြန်ခါနီးမှာ အမေ့ကို ကပ်၍
"အမေရယ်၊ သား သူငယ်ချင်းတွေနဲ့ ဒီမှာ ခဏ နေခဲ့ဦးမယ်" ဟု အသာ ချွဲကာ ပူဆာသည်။
"အဖေ . . .ပြောနေဦးမယ်" ဆိုလည်း မရ။
"အမေပဲ ကြည့်ရှင်းပြလိုက်ပါ" ဟု ဆိုသည်။
ဤသားကြီးက ပူဆာပြီးဆို အမေ အလို မလိုက်ဘဲ မနေနိုင်။ အမေသည် အမေပဲလေ။ သည်လိုနှင့် မော်လမြိုင်ကို အမေ တစ်ယောက်တည်း ပြန်လာခဲ့ရသည်။
(၆)
ကိုယ့်မှာ ရှိထားသမျှ အခံနှင့် ရန်ကုန်ဆိုသော ထုကို ၀င်တိုးဖို့ ဆိုတာ နယ်မှ လူငယ် တစ်ယောက် အနေနှင့် ရင်ခုန်စရာ ကောင်းလှသည်။
ကျော်မြင့်လွင်မှာက ဂီတနှင့် စာပေ အနုပညာ ပါရမီအပြင် ကြံ့ခိုင်သော စိတ်ဓာတ်တော့ ရှိသည်။ သို့သော် သူ့ အသက်အရွယ်နှင့် အတွေ့အကြုံတွေက အတန်အသင့် နုငယ်သေးသည် ဆိုရမည်။ သူ့ လက်ချောင်းများမှာ အားမပြည့်သေး၍ တံခါးတွေကို သူမဖွင့်နိုင်။ ရေခင်းမြေခင်း အခွင့်သာသည့် အခြေအနေမျိုးကို သူ မဖန်တီးနိုင်။
စံရိပ်ငြိမ် အဆောင်ဘက်မှာကလည်း လူဟောင်းတွေ တစ်ယောက်မျှ မရှိကြတော့သည့်အတွက် အလွမ်း မပြေချင် စရာ။ တစ်ခေါက်တော့ သူ လျှောက်သွား ကြည့်ခဲ့သေးသည်။ အားလုံးက မျက်နှာစိမ်းတွေ။ ဤနေရာနှင့် တစ်ချိန် တစ်ခါတုန်းက ရင်းနှီး ကျွမ်းဝင် နေထိုင်ခဲ့ဖူးသည် ဆိုတာပင် မယုံချင်စရာ။ ပန်းပွင့်တွေ မြေပေါ်မှာ ဖွေးဖွေး လှုပ်အောင် ကြွေကျနေသည့် တရုတ် စကားပင်ကြီးသည်ပင် တစ်ချိန် တစ်ခါတုန်းက ပန်းကြွေတွေ ကောက်ခဲ့ဖူးသော သူ့ကို မမှတ်မိချင်ယောင်ဆောင် နေခဲ့သည်။
ရန်ကုန်က သူ့ကို လက်ကမ်း မကြိုဆို။ ကျောချစရာ တစ်နေရာ မဖြစ်ဖြစ်အောင် လုပ်၍ ရသော်လည်း သိုင်းဝိုင်းစရာ မရှိ။ သိုဖြင့် ခြေဦးတည့်ရာ သူ ထွက်လာခဲ့သည်။
(၇)
ပြည်မြို့ အရှေ့ဘက် ၀က်ထီးကန် ဒေသ။
စံရိပ်ငြိမ် ၆ လမ်း အဆောင်တုန်းက အစ်ကိုကြီး တစ်ယောက်သဖွယ် သူ ခင်တွယ်ခဲ့ဖူးသော ကိုသီဟန်သွင်က ၀က်ထီးကန်သို့ သိုက်မြုံ ပြောင်း၍ တွဲဖက် ကျောင်းဆရာ သွားလုပ်နေသည်။ သည်လိုနှင့် သူ့အပေါ် နွေးထွေးသော ကိုသီဟန်သွင် ဆီမှာ ယာယီ ကွန်းခို ဖြစ်ခဲ့သည်။
ဘာပဲပြောပြော ၀က်ထီးကန်မှာ သူ့ အမောတွေ ခေတ္တ ဖြေခွင့် ရခဲ့သည်။
သူ့မှာ လူငယ်တစ်ယောက်၏ အလျံတညီးညီး ဖြစ်ပြီး မပြည့်ဝနိုင်သော လိုအင်ဆန္ဒ ကွက်လပ်တွေက တင်းကြမ်း ထနေသည်။ ဒီအချိန်မှာ သူ ဖြစ်ချင်တာတွေက ရိုးရိုးစင်းစင်း နည်းနည်းကျဉ်းကျဉ်းလေးပဲ ဖြစ်စေ၊ မြင့်မား များပြားလွန်းသည် ဖြစ်စေ၊ သူ လုပ်နိုင်စွမ်းကတော့ သိပ်ကို နည်းလွန်းနေသည်။ အဘက်ဘက်မှ တုပ်နှောင် ထားခြင်း ခံရသလိုမျိုး ဖြစ်နေသည့် အပေါ် အပြစ် တင်စရာက သူ့ကိုယ်သူပဲမြင်သည်။ အဲသလို ဖြစ်နေတာကို သူ့ဘာသာပဲ အာသာ မပြေနိုင် ဖြစ်ရပြန်သည်။
တွဲဖက် ကျောင်းဆရာ ကိုသီဟန်သွင်က ကျောင်းသို့ စာသင်ဖို့ ထွက်သွားချိန်များတွင် သူက အိမ်ရှိ တပည့်အကူလေး တစ်ယောက်နှင့်အတူ ချက်ပြုတ်ပြီး ကျန်နေရစ်ခဲ့သည်။ စံရိပ်ငြိမ် ၆ လမ်း မှာတုန်းကလည်း အစ်ကိုကြီးတွေ အသီးသီး ထွက်သွားကြလျှင် သူတစ်ယောက်တည်း ချက်ပြုတ်ဖို့ ကျန်ရစ် နေတတ်သည်။ တစ်ခါတလေ ညစာ ဟင်းအတွက် ချက်စရာ မရှိလျှင် အဆောင်ရှေ့မှ တရုတ်စကားပွင့်တွေ ကောက်ပြီး စကားပွင့်ပြုတ်သုပ် တစ်ခွက်ကိုတော့ သူ ဖန်တီးတတ်သည် မှန်သော်လည်း အခုကျတော့ အခြေအနေက မတူ။
ရှေ့ကို လှမ်းမျှော်လိုက်လျှင် မှိန်မှိန်ရေးရေး မှုန်ပျပျလေးပဲ မြင်နေရပုံမှာ ဘာဆိုဘာမျှ မခန့်မှန်းနိုင်စရာ။ ဆောင်းနားသော ၀င်ရိုးစွန်း ၀က်ဝံ၊ နွေတွင်းခိုသော ဖား၊ ဂူအောင်း ကျင့်နေသည့် သိုင်းသမား အဖြစ် စိတ်ဖြေသိမ့်စရာ မရှိ။
(၈)
တီးခတ်စရာ ဂီတာ တစ်လက် ရှာဖို့။ သူ ရေးစပ်ထားသော သီချင်းတွေ အကြောင်း ပြောဆိုဖို့ ဤနေရာမှာ မဖြစ်။ သူများတွေ ဂီတာ တီးနေကြတာ တွေ့လျှင် သူ့ သွေးထဲမှာ မချိုမြိန်။ သူ့စိတ်ထဲမှာခံစားရသမျှ အရှိအတိုင်း ပြောလိုက်ရလျှင်လည်း ရှိစုမဲ့စု အမြစ်တွေပဲ ပြတ်ထွက်ကုန်လိမ့်မည်။ ပုသိမ် ကောလိပ်မြေက ငြိမ်းချမ်းသော ကမ်းခြေပေါ်ရှိ အောင်ကျော်ဦး၊ အောင်အောင်၊ ရေချမ်း၊ သာထူးတို့ကိုတော့ လွန်လွန်မင်မင်ကိုပဲ လွမ်းဆွတ် တမ်းတမိသည်။ သို့သော်လည်း သူတို့ကို လွမ်းလေလေ၊ ဂီတာကို ကောက်မကိုင်ချင်လေလေဟုပင် ဆိုရမလား မသိ။
(၉)
ဂီတနှင့် သူ့အကြားမှာ သံယောဇဉ်တော့ မပြတ်။
ထိုရစ်ပတ် နှောင်ဖွဲ့မှုမှာ ဘာကြားခံ တူရိယာပစ္စည်းမျှ မလို။
(၁၀)
ကိုသီဟန်သွင် နေ့ခင်း ကျောင်းသွားချိန်၌ အားလပ်တိုင်း ဗလာစာအုပ် တစ်အုပ်နှင့် ကျော်မြင့်လွင် သီချင်း ရေးသည်။
ညတိုင်း စာသင် ပြီးချိန်များတွင် အားနေသော ကျောက်သင်ပုန်း အပေါ်၌ ဂီတသင်္ကေတတွေ ချရေးသည်။
ဤနည်းဖြင့် သူရေးထားသော သီချင်းတွေကို သူ့ဘာသာ မျက်စိဖြင့် ကြားခွင့် ရ၍ နားဖြင့် မြင်ခွင့် ရလာသည်။
ဒို-ရေ-မီ-ဖာကို သူ့စိတ်တိုင်းကျ အော်ဟစ် ရွတ်ဆိုနေ၍ ရသည်။ ဤလေ့ကျင့်ခန်းများ လုပ်ဖြစ်လေလေ၊ သူ၏ ဂီတကြွက်သားများ သန်မာလာလေလေ ဖြစ်သည်။ အသံထွက်ပြီး ဂီတာတီးနေတာ မဟုတ်၍ အခြား သူများနှင့် ညှိနှိုင်းစရာ မလို။ သီချင်း ဆိုနေတာ မဟုတ်၍ သူတစ်ပါး၏ ဝေဖန်ခြင်းကို မခံရ။
သူကစားနေတာက အဆင့်မြင့် ဂီတသင်္ကေတများ ဖြစ်၍ တော်တန်ရုံ ဘယ်သူမျှ နားမလည်။ သူ လုပ်နေသမျှ အရူးတစ်ယောက်လိုသာ ထင်ကြလိမ့်မည်။ ဤသို့ဖြင့် သူ့ကိုယ်ပိုင် လွတ်လပ်သော အကန့်လေး တစ်ခုကို ကိုယ့်ဘာသာ တည်ဆောက်ထား လိုက်နိုင်ခဲ့သည်။
တစ်ခါတစ်လေ ညကြီး တအား နက်ရှိုင်းသွားသည်အထိ ဂီတသင်္ကေတတို့၏ စိတ်ကူး အသံများထဲမှာ စူးစူးနစ်နစ် အာရုံ ၀င်စားပြီး သူတစ်ယောက်တည်း ရွတ်ဖတ်သရဇ္ဈယ်ရင်း အချိန်ကုန်မှန်း မသိ ကုန်သွားတတ်သည်။ သူ့ဘာသာ ခြေကုန် လက်ပန်းကျပြီး အပျော်မော မောနေတတ်သည်။ မိုးလင်းကာနီးကျမှ ကစား၍ ၀သည့် ကလေးလေး တစ်ယောက်လို နှစ်ခြိုက် အိပ်မောကျ သွားတတ်သည်။
(၁၁)
ပွဲတော်ကာလ၊ စတိတ်ရှိုးချိန်နှင့် ကြုံလျှင်တော့ဖြင့် ကိုသီဟန်သွင်နှင့် အတူ သူ အဖော် လိုက်သွားပြီး နားထောင်ဖြစ်သည်။ သို့သော် သာမန် နားဆင်သူ ပရိသတ် တစ်ယောက်နှင့်သာ ဖြစ်သည်။
ပုသိမ်တုန်းက စတိတ်ရှိုး စင်မြင့်တွေပေါ်မှာ သူ အသက် ငယ်ငယ်အရွယ်နှင့်ပင် တီးခတ် သီဆို ဖျော်ဖြေခဲ့ဖူးတာတွေ၊ ပုသိမ် ကောလိပ်မြေမှာ တီးဝိုင်းကလေးတစ်ခုကို သူကိုယ်ပိုင် ဦးစီး ဦးဆောင် ဖွဲ့စည်းခဲ့ဖူးတာတွေ ဘယ်သူ့မျှမပြောပြ၍ ဘယ်သူမျှလည်း မသိကြ။
လူတိုင်းမှာ ကိုယ့်အတ္တ၊ ကိုယ့်မာန ကိုယ်စီနဲ့ပဲ ဖြစ်သည်။ သို့သော် ကျော်မြင့်လွင်က သူ့အတ္တမာနကို အချိန်အခါနှင့် နေရာ မှားယွင်းစွာ ဖော်ထုတ်ပြမည့် လူစားမျိုး မဟုတ်ချေ။ သူ့အကြာင်းကို သူ ပွင့်ပွင့်လင်းလင်း အိတ်သွန်ဖာမှောက် မပြောပြရုံသာမက ဖျော်ဖြေနေကြသည့် စတိတ်ရှိုးတို့၏ သီချင်း ဂီတနှင့် တီးဝိုင်း အကြောင်း အကောင်းအဆိုး ဘာမျှဝေဖန် မှတ်ချက်ချခြင်း မရှိ။ တိတ်တိတ်ကလေးကြည့်ပြီး တိတ်တိတ်ကလေး ပြန်လာတတ်သည်။ ပြောစရာဆို တစ်ခြား စကားပဲ ဆိုမည်။ ဂီတနှင့် ပတ်သက်လျှင် အစွမ်းကုန်အောင် နှုတ်ပိတ် ရေငုံနေခဲ့သည်။
(၁၂)
ရေမျောကမ်းတင် သစ်ကိုင်းသစ်ခက် တစ်ခုသဖွယ် ၀က်ထီးကန်မှာ သောင်တင်နေခဲ့တာ အချိန် အတော်ကြာသွားသည်။ သို့သော် ဤနေရာတွင် သူ့အတွက် အမြစ်တွယ်စရာ မရှိတာ သူ သိသည်။ အချိန် အကန့်အသတ်မဲ့ နေသွားဖို့ ဆိုတာ မဖြစ်နိုင်။ ကာလ အတိုင်းအတာ တစ်ခု ကျော်လွန် သွားသောအခါမှတော့ နှုတ်ဆက် ခွဲခွာဖို့ ဆုံ့းဖြတ်ရသည်။
ကိုသီဟန်သွင်၏ အရိပ်ကလေးကို ကျောခိုင်းပြီး သူထွက်ခွာ လာခဲ့ပြန်ပြီ။ သည်တစ်ခါ သူဦးတည် သွားတာက ပုသိမ်။
(၁၃)
ပုသိမ်ကို မရောက် ရောက်အောင် ပြန်သွားဖို့ သူ့ ကိုယ်ထဲက သွေးတောင်း နေခဲ့ရခြင်း အကြောင်းအရင်း တစ်ရပ်မှာ ပုသိမ်ကောလိပ်၏ စတိတ်ရှိုး ရာသီ တစ်ဖန် ပြန်လည် ကျရောက်လာသောကြောင့် ဖြစ်သည်။
ဤအချိန် ဤအခါ ရောက်လာလျှင် သူ့စိတ်က အပေါက် တစ်ပေါက်ကို ထိုးထွင်း သိနေပြီ။ မနှစ်တုန်းကဆိုလျှင် သူတို့တစ်တွေ၏ " ငြိမ်းချမ်းကမ်းခြေ " Shore of Peace အဖွဲ့ဝိုင်းက ပုသိမ်ကောလိပ်မှ ဂီတ လှုပ်ရှားမှု စင်မြင့် အားလုံးလိုလိုကို အပိုင် သိမ်းပိုက်ခဲ့သည်ပဲ။ ဒီနှစ် ဒီချိန် ရောက်ပြီိဆို သူတို့ အဖွဲ့သားတွေ တီးဝိုင်း တိုက်နေကြတော့မည်။ သူ ရောက်လာမှာကိုလည်း မျှော်လင့်နေကြလိမ့်မည် ဆိုတာ သူတပ်အပ် ပြောနိုင်သည်။
(၁၄)
တကယ်လည်း Shore of Peace အဖွဲ့သားများသည် ပုသိမ်ကောလိပ် အခန်း ၁၀၇ မှာသီချင်းကျင့် နေခဲ့ကြသည်။
Shore of Peace မှာ ကိုသျှပ် ထွက်သွားကတည်းက လူအများကြီး လျော့သွားခဲ့ သည်။
ကိုသျှပ်က " မင်းတို့ ကြိုက်တဲ့လူ ရှိရင် ခေါ်တီး " ဟု မှာထားခဲ့သည်။
ထိုအချိန်မှာ ကိုတူးက (၀င်းမြင့်ဦး) က ရန်ကုန် တက္ကသိုလ်မှ အင်္ဂလိပ်မေဂျာနှင့် ကျောင်းပြီး၍ ပုသိမ် ပြန်ရောက်နေသည်။ ကိုတူးနှင့် ကိုသျှပ်က အကြောင်းသိတွေ။ ဘိုတင်ယုတို့ ငုဝါ တီးဝိုင်းမှာကတည်းက အတူ တွဲလာခဲ့ဖူးသည်။ နောက်ပိုင်း နှင်းဆီဖြူမှာ တီးသည်။ နုတ်စ်နှင့် ကလပ်စီကယ် ဂီတာ ကျွမ်းကျင်သည်။ အောင်ကျော်ဦးတို့ တစ်တွေ ကိုတူးကို မေတ္တာရပ်ခံပြီး သူတို့အဖွဲ့ကို အားပြန်ဖြည့် ထားခဲ့ကြသည်။
ပုသိမ် သင်္ဘော ဆိုက်သည်နှင့် "ကိုသျှပ် ပါလာတယ်ဟေ့ " ဆိုသော သတင်းက လျှပ်စစ်စီးကြောင်း တစ်ခုသဖွယ် ဖျတ်ကနဲ အပြေးအလွှား ရောက်လာသည်။ သူတို့ တစ်ဖွဲ့လုံး ထခုန်မိမတတ် ၀မ်းသာအားရ ဖြစ်ကုန်ကြတော့သည်။
ကိုသျှပ်ကလည်း ဟိုဟိုဒီဒီ လမ်းများမနေ။ သူတို့သီချင်းလေ့ကျင့်နေသည့် ၁၀၇ အခန်းသို့ တန်းဆင်းချလာသည်။ ကိုသျှပ်ကို တွေ့တော့ သူတို့အားလုံး အူလှိုက်သည်းလှိုက် ပြေးဖက်ကြိုဆိုခဲ့ကြသည်။ ခွဲခွာချိန် ကြာမြင့်လှသည့် ချစ်သောညီအစ်ကိုများ ပြန်ဆုံကြသည့်နှယ်။ တကယ့်ကို ဆူဆူညံညံ။
(၁၅)
"ကိုသျှပ်ကို မျှော်နေတာဗျ၊ ကိုသျှပ်က ပုသိမ်ကို ပြန်လာဖို့တော့ သတိရသားပဲ" ဟု အောင်ကျော်ဦး (ကြွက်နီ) ကစကားနာထိုးသည်။
" ငါ့အိတ်ကပ်ထဲမှာ ဆယ့်ရှစ်ကျပ်ရှိရင် ပုသိမ်ကို ပြန်လာလို့ရတယ်ကွ၊ ငါက အိတ်ကပ်ထဲမှာ ဆယ့်ရှစ်ကျပ် ပြည့်ဖို့ စောင့်နေတာ" ဟုဆိုသည်။
ဂီတာကိုင်ထားသော ကိုတူးကိုလည်း အားနာရကောင်းမှန်းမသိ။ ပြောမနာ ဆိုမနာ အပေါင်းအသင်းတွေပီပီ စိတ်ထဲရှိသည့်အတိုင်း -
" ခဏဖယ်ပေးကွာ၊ ငါဝင်တီးလိုက်ဦးမယ်" ဆိုပြီး မဆိုင်းမတွ ၀င်တီးသည်။ ကိုတူးကလည်း စိတ်မကွက်၊ သူ့အပေါ် ဘဲဥဘယ်လို သဘောထားတာ သူသိသည်။
(၁၆)
ကိုသျှပ်ရောက်လာသည်နှင့် Shore of Peace အဖွဲ့၏ နဂိုပုံမှန် အနေအထားများ အားလုံးပြောင်းလဲသွားပြီး အရှိန်သွက်လက်မြန်ဆန်လာခဲ့သည်။ ထုံးစံအတိုင်း ကိုသျှပ်၏ ကိုယ်ပိုင်မူ၊ ကိုယ်ပိုင်ဟန်လေးတွေလည်း ပြန်ပေါ်လာကြသည်။ ကိုင်ဇာ၏ "အိမ်အပြန်ကျောင်းအဆင်းမှာ သီချင်းလေးဆို" ကို ဟာမိုနီခွဲပြီး -
"ကရင်၊ မင်းက Alton၊ ပထန်က ဘေ့စ်၊ ငါ tenor ဆိုမယ်၊ ဟုတ်ပြီလား" လုပ်သည်။
ကိုသျှပ်အကျင့်အတိုင်း ဟာမိုနီအ၀င်အထွက် မမှန်မချင်း ဤသီချင်းတစ်ပုဒ်ကိုပဲ ထပ်ကာတလဲလဲ အကျော့ကျော့အပြန်ပြန် လေ့ကျင့်နေ၍ အချိန်ကုန်လှပြီ။ သီချင်းဆိုမည့် ကျောင်းသူတွေက ဆူဆောင့်စ ပြုလာကြသည်။ သို့သော် ကိုသျှပ်ကို ဘယ်သူမျှ မပြောရဲ။
နောက်ဆုံးတော့ ဆရာမ ဒေါ်စန်းစန်းကြူရောက်လာပြီး သူ့ရင်ဘတ်သူ လက်ညှိုးနှင့်ထောက်ကာ -
"အောင်မယ်လေး …. ဟဲ့၊ သျှပ်ရယ်၊ တခြားသီချင်းတွေလည်း အများကြီး တိုက်စရာရှိသေးတယ်။ ရှေ့မဆက်သေးဘူးလား" ဟုပြောယူရသည်။
ဒါတောင်မှ ကိုသျှပ်ကဖြင့် "ခဏလေးပါ ဆရာမ၊ ကျွန်တော်တို့ဒီတစ်ပုဒ်ပုစံ ၀င်သွားချင်လို့ပါ"
ဆိုပြီး သူ့စိတ်တိုင်းကျ မရရအောင် အဖွဲ့သားတွေကို တွန်းတိုက်လိုက်သေးသည်။
(၁၇)
သူငယ်ချင်း အပေါင်းအသင်းတွေနှင့် ပြန်ဆုံရပြီး ဂီတနှင့် ဆုံတွေ့ရ၍ ကိုသျှပ်သည် ရေထိပန်းသဖွယ် လန်းဆန်းလာသည်။
တစ်နေကုန် သီချင်းတိုက်သည်။ မိုးလင်းပေါက်ဆိုင်များဖြစ်သော ရွှေလသာ၊ ကျော်ကြားတို့မှာ အဖွဲ့တွေနှင့် ထိုင်သည်။ ပုသိမ်မြေကို နင်းရတာ ခိုင်ခိုင်မြဲမြဲ ရဲရဲတင်းတင်းရှိလှသည်။ ဘယ်နေရာနှင့်မျှ မတူ။
ညဘက်ကြီး ဆိုင်မှာ ထိုင်နေရင်းက ၁၀နာရီခန့်ရှိပြီ။ ကိုသျှပ် ရုတ်တရက်ထသည်။
အောင်ကျော်ဦးက "ကိုသျှပ် ဘယ်သွားမလို့လဲ" ဟု မေးရာ -
"ကိုတူးဆီ သွားမလို့ကွ၊ သီချင်းတစ်ပုဒ် အရိန်းခ်ျမင့် လုပ်စရာရှိတာ သူ့ကို အပ်ချင်လို့"
ရာသီက အအေးမိချင်စရာစိမ့်နေသည်။ ကိုသျှပ်လက်ထဲမှာ ကိုတူးအတွက် ချွဲသလိပ်ပျော်ဆေးနှင့် အိပ်ချင်ပြေ ရှူးရှဲထုပ်ပါသည်။
အောင်ကျော်ဦးက စိတ်ထဲမှာ မကြည်လင်။ သီချင်း အရိန်းခ်ျမင့်များ၊ ကိုယ့်ဘာသာ ကိုယ်လုပ်လည်း ရရက်သားနှင့်။ ကိုတူးထံ အလုပ်ရှုပ်ခံ သွားသည်ဟု ယူဆသည်။ သို့သော် ကိုသျှပ်၏စိတ်နှင့် ဆုံးဖြတ်ချက် အကြောင်းသိထားပြီး ဖြစ်၍ ညည်းညည်းညူညူ တဖျစ်တောက်တောက်နှင့်ပင်လိုက်သွားခဲ့သည်။
ပုသိမ်ကမ်းနားကွင်းတန်းအိမ် ရောက်သွားတော့ ကိုတူးမအိပ်သေး။
ကိုသျှပ်က "ငါ့ကိုဒီသီချင်းလေး အရိန်းခ်ျမင့် လုပ်ပေးစမ်းပါကွာ" ဟုဆိုတော့ ကိုတူးက သူ့အမူအရာအတိုင်း သူ့ကိုပဲ ပြောမနေသလို အေးအေးလူလူ ဆေးလိပ်ကလေး တဖွာဖွာနှင့် -
"အေး၊ အေး၊ ထားခဲ့လေ ဘဲဥ" ဟုဆိုသည်။
"ဒီမှာ နွေ
နွေရောက်ပြီလေ
ပင်အိုထိပ်ဖျားမှာ
ဥသြငှက်ကလေး
ကြင်နာသူရှာ
သူငိုကြွေး" ဆိုသည့် "အဆုံးမဲ့နွေ" သီချင်း အရိန်းခ်ျမင့်ကို ကိုတူး လုပ်ပေးခဲ့သည်။
ထိုသီချင်းကို နောက်တော့ အောင်ရင် သီဆိုခဲ့သည်။
"အိပ်ပျော်နေချိန်လည်း၊ ကိုယ့်စိတ်ထဲမှာ၊ မှုန်ရီပြာဝေ၊ မင်းအကြောင်းတွေများ မြင်ယောင်နေဆဲ၊ လွမ်းတဲ့ည" ဆိုသည့် ရင်မှာ ပြာသောည သီချင်းကိုလည်း စာသားရေးပြီး ကိုတူးနှင့် တိုင်ပင်သည်။ ထိုသီချင်း၏ Chorus အပိုဒ်ကို ကိုတူးပဲ မယ်လိုဒီ ရှာပေးခဲ့သည်။
ထိုသီချင်းကို နောင်သောအခါ "ပြာသော ည" အမည်နှင့် ပင်းက သီဆိုခဲ့လေသည်။
(၁၈)
ကိုသျှပ်သည် ပုသိမ် ပြန်ရောက်တုန်း ရောက်ခိုက် ကျောင်းထဲမှာတင် အားမရ။
အောင်ကျော်ဦးတို့ ဘိုကနောင် ကရင် ရပ်ကွက်ဝိုင်း ဖြစ်သော "မဟူရာ" ဖျော်ဖြေပွဲမှာလည်း ကြုံ၍ ၀င်နွှဲသည်။ ကမ်းနားလမ်း နံဘေးမှာ စတိတ်ရှိုး ရှိစဉ် တစ်ကြိမ်တွင် -
"ကြွက်နီ၊ မင်းနဲ့ ငါဒရမ် တစ်ယောက် တစ်ခြမ်း တီးမယ်" ဆိုပြီး ကတ်ကတ်သတ်သတ်နှင့် မဖြစ်ဖြစ်အောင်ကိုပဲ လုပ်ခဲ့သေးသည်။ ဒစ္စကို ဒန်စာ ပါကပ်ရှင်းကို သူ တီးသည်။
အောင်ကျော်ဦးနှင့် နှစ်ယောက် တွဲပြီး သီချင်းလည်း ဆိုခဲ့သေးသည်။
စောဘွဲ့မှူး၏ "အဆောင် သူရဲ" သီချင်းကို "ကြွက်နီ မင်းက ဆိုပရာနို၊ ငါက တန်နာ ဆိုမယ်" ဆိုပြီး ဟာမိုနီခွဲကာ-
"မာလာဆောင်နဲ့
ပတ်သက်လို့
ပုံပြင်လေး တစ်ပုဒ်
ကြားဖူးတယ်၊
ဒီပုံပြင်ထဲက
ဇာတ်လိုက်ကြီး
ဘယ်သူလဲလို့
မမေးပါနဲ့" ဟု ယောကျာ်း စုံတွဲ သီချင်း စလိုက်ကတည်းက ပရိသတ်ထဲမှ ဝေါခနဲ အသံ ကြားရသည်။
သူတို့ နှစ်ယောက်ကတော့ ဂရုမစိုက်ဘဲ "ထမင်းမှစားရဲ့လား၊ ရေတစ်ခွက်မှသောက်ရဲ့လား၊ ဘာကိုမှလည်း စိတ်မ၀င်စား၊ အဆောင်ရှေ့မှာ ကျင့်တဲ့တရား" ဟု ဆက်ဆိုကြရာ ပရိသတ်က ကောင်းကောင်းကြီး သြဘာပေးကြသည်။
ဘာပဲဖြစ်ဖြစ် "မနက် မနက်ကြည့်ကြည့်ပါ၊ နေ့ခင်းဘက်ကြည့်ကြည့်ပါ၊ ညညကြည့်ကြည့်ပါ တွေ့လိမ့်မယ်၊အမြဲတမ်း ရှိလိမ့်မယ်" ဆိုပြီး မဆုံး ဆုံးအောင် အားပါးတရ ကြဲဖြစ်ခဲ့ကြလေသည်။
အခန်း (၁၀) သိုက်မြုံ ရင်ခွင် ရှိရာဆီ
(၁)
လောက မိုးကောင်းကင်ထဲမှာ နေရာအနှံ့ပျံသန်းချင်ရာ ပျံသန်း သွားလာခဲ့သော ငှက်ကလေး တစ်ကောင်။ အချိန်တန် အတောင်ပံ ညောင်းတော့ သိုက်မြုံ ရှိရာဆီသို့ တစ်ဖန် ပျံ၍ နားရသည်။
ကျော်မြင့်လွင်လည်း မော်လမြိုင်က မိဘရင်ခွင်ထဲသို့ တိုးဝင် ရောက်ရှိလာခဲ့ပြန်သည်။ မိသားစု အသိုင်းအ၀ိုင်းကတော့ အစဉ်သဖြင့် နွေးထွေး လုံခြုံသည်။ သူ ပြန်လာပြီဆိုသည်နှင့် အိမ်မှာ အားလုံး ပြီးပြည့်စုံ သွားသလိုမျိုး ပိုက်ပွေ့ကမ်းလင့် ကြိုဆိုလိုက်ကြသည်။ အမေက အထူး ဆိုဖွယ်ရာ မရှိ။ ၀မ်းသာအယ်လဲ။ အဖေနှင့် သူ၏ ဆက်ဆံရေးမှာလည်း ထင်သလောက် မဆိုး နားလည်မှု ရရှိပြီး အဆင်ပြေနေသည်။
ကျော်မြင့်လွင် ကျွမ်းကျွမ်းကျင်ကျင် ဂီတာ တီးနေတာ တွေ့ရကြားရသည့်အတွက် ရပ်ကွက်ထဲမှ လူငယ်လေးတွေ စုဝေး လာကြသည်။ သူကလည်း ပညာ လိုချင်သူဆိုလျှင် သေသေချာချာ သင်ပြပေးသည်။
သူ့တွင်လုပ်စရာမည်မည်ရရ ဘာမျှ မရှိ။ ပျင်း၍ ဂီတာချည်းသာ တီးတီးနေတာ တွေ့ရသဖြင့် တစ်နေ့မှာ အဖေက-
"မင်းဂီတာ တီးချင်တယ် ဆိုရင် ငါ့တပည့်တွေ တီးဝိုင်း ထောင်ထားတာ ရှိတယ်၊ မင်း ၀င်တီး ကြည့်ပါလား" ဟု ဆိုသည်။
ကျော်မြင့်လွင်က အဖေ့ စကား ကြားတော့ သူ့နားကိုပင် သူ မယုံချင်။
(၂)
အဖေတို့ မော်လမြိုင် ကျောင်းကျန်းမာရေး ဌာနတွင် ကိုစိုးညွန့်က ကုသမှုအကူ (Clinical Attendant) ဖြစ်သည်။
ကိုစိုးညွှန့်နှင့် ကိုဂျီကေတို့ ညီအစ်ကိုက The Excellent ဆိုပြီး တီးဝိုင်း တစ်ဝိုင်း ထောင်ထားသည်။ ကိုစိုးညွှန့်တို့ အမှတ် (၁) အ.ထ.က မှ ဓာတ်ခွဲလက်ထောက် ဖြစ်၍ အမှတ် (၁) အ.ထ.က ကျောင်းဝင်းထဲတွင် နေအိမ် ရရှိထားသည်။ ထိုအိမ်မှာပဲ သူတို့ တီးဝိုင်း လေ့ကျင့်လေ့ ရှိသည်။ လောလောဆယ် သူတို့မှာ ဂီတာသမား တစ်ယောက် လိုအပ်နေသည်ဟု ဆိုသည်။
ကျော်မြင့်လွင်က တီးဝိုင်းထဲ ၀င်ဖို့ သဘောတူလိုက်၍ အဖေက သူ့ တပည့်များအား "ငါ့သားကြီး ဂီတာ တီးတတ်တာ ရှိတယ်၊ မင်းတို့ ၀ိုင်းမှာ စမ်းသုံးကြည့်ပါလား" ဟု ပြောပြ အပ်နှံသည်။
သည်လိုနှင့် ကိုစိုးညွှန့်တို့ အိမ်ရောက် လာကြပြီ။
ကျော်မြင့်လွင်က ဂီတာ တီးပြရသည်။
ပလေးဘွိုင် သန်းနိုင်၏ "ဆု" ဆိုသော သီချင်းကို ဆိုလို တီးဆို ပြလိုက်သည်နှင့်ပင် ကိစ္စ ပြီးပြတ်လေတော့သည်။ The Excellent မှာ လူလိုနေသလို ဘာမျှ လုပ်စရာ မရှိသော ကျော်မြင့်လွင် အတွက်လည်း အာသာ ပြေသွားသည့် အတွက် ရေကန်အသင့်၊ ကြာအသင့်ပင် နှစ်ဦးနှစ်ဘက် အဆင်ပြေ သွားခဲ့ကြသည်။
မော်လမြိုင်မှာ ဂီတ မျိုးစေ့ မြေပေါ် ကျပြီး သစ်ပင် တစ်ပင် ဖြစ်ထွန်းပေဦးမည်။
(၃)
အသစ် ပြန်လည် ဖွဲ့စည်းသော Excellent မှာ ကိုဂျီကေ လိဒ်ဂီတာ၊ ကိုစိုးညွှန့် ရစ်သမ်ဂီတာ၊ ကိုဂုလု ဘေ့စ်ဂီတာနှင့် ကျော်မြင့်လွင် ဒရမ် တီးကြသည်။
ကိုဂျီကေက သီချင်းလည်း ရေးသည်။ သူ ရေးဖွဲ့သော "မျက်ရည်" သီချင်းကို နောင်သောအခါ ကိုဗလ သီဆိုခဲ့သည်။
(၄)
ကျော်မြင့်လွင်၏ မော်လမြိုင် ပထမဆုံး စင်မြင့်ပွဲမှာ အမှတ် (၅) တံတားရှေ့ ရွှေတောင်ရပ် ဆွမ်းကြီးလောင်းပွဲ ဖြစ်သည်။
The Excellent က အနောက်တိုင်း ၀တ်စုံ အပြည့်အစုံနှင့် တီးဝိုင်း ထွက်သည်။ ထိုညမှာ ကျော်မြင့်လွင်က L-O-V-E love နှင့် Give Me Your Heart အင်္ဂလိပ် သီချင်း နှစ်ပုဒ် သီဆိုခဲ့သည်။
The Excellent အဖွဲ့တွင် ကျော်မြင့်လွင် တီးခတ်နေဆဲ အချိန်။
တစ်ခါတော့ သူတို့အဖွဲ့ မြန်မာ့အသံ အင်္ဂလိပ်ပိုင်း အသံလွှင့် အစီအစဉ် Local talent ကဏ္ဍတွင် အသံ သွားသွင်းကြသည်။ ကိုဂျီကေနှင့် ကိုစိုးညွှန့်တို့ ညီအစ်ကိုက သီချင်း ဆိုကြသည်။ မြန်မာ့အသံမှ ထုတ်လွှင့် ပေးခဲ့သော The Excellent ၏ ထိုအစီအစဉ်တွင် မှတ်မှတ်ရရ Devil Woman သီချင်း ပါဝင်ခဲ့သည်။
(၅)
The Excellent မှာ အချိန်အတန်ကြာ တီးခတ်နေခဲ့ပြီးသည့် နောက်ပိုင်းတွင် သူတို့ တီးဝိုင်းမှာ အပြောင်းအလဲ အချို့ ဖြစ်သွားခဲ့သည်။
အဓိက အကြောင်း အရင်း အခြေခံက မော်လမြိုင် မြို့လယ်နှင့် ယမင်း ပုံနှိပ်တိုက်များမှ ကိုညီညီ၊ ကိုဇော်ဇော်တို့က စတင်ခဲ့သည် ဆိုရမည်။ သူ့တို့ဆီမှာ တီးဝိုင်း တိုက်ကြ၊ သီချင်း ဆိုကြရင်း ကျော်မြင့်လွင်ကို သူတို့ မျက်စိကျ လာကြသည်။
သည်လိုနှင့် ကျော်မြင့်လွင်ကို မဏ္ဍိုင် ထား၍ တီးဝိုင်းသစ် တစ်ခု ဖွဲ့ဖို့ ဖြစ်လာသည်။
The Excellent မှာ ကိုဂျီကေတို့ ကျန်ရစ်ခဲ့ပြီး မော်လမြိုင်မှာ Sharp အမည် ရှိသည့် တီးဝိုင်းသစ် တစ်ဝိုင်း ပေါ်ပေါက် လာခဲ့လေတော့သည်။
Sharp မှာ ကျော်မြင့်လွင်က လိဒ်ဂီတာ တီးသည်။ ပဲခူးသား ကိုနိုင်ဝင်းက ဘေ့စ်။
ညနေတိုင်း အိမ်ရှေ့မှာ ဂီတာ သင်ပေးနေကျ ရပ်ကွက်ထဲမှ သူ့ လက်ရင်း တပည့် စိုးငယ်ကို စိတ်ချ ရလောက်ပြီး ဖြစ်၍ ရစ်သမ်ဂီတာ ခေါ်တီးခိုင်းသည်။
(၆)
The Excellent မှာတုန်းက ကျော်မြင့်လွင်သည် ဧည့်သည်ဝိုင်းသား တစ်ယောက်သဖွယ် စီစဉ်သမျှ အတိအကျ နာခံကာ အပိုစကား ဘာတစ်ခွန်းမျှ ၀င်မပြောခဲ့။
Sharp တီးဝိုင်းမှာကျတော့ သူ့လက်သူ့ခြေ။ သူ့စကားသာ သူ့အာဏာ တည်သည်။ သို့ဖြစ်၍ ပြောစရာ၊ ဆိုစရာ ရှိလျှင် ဘယ်သူ့ကိုမျှ အားမနာ။ သူက သီချင်း တီးရာ ဆိုရာမှာ ကောင်းဖို့သာ ပဓါန ထားသူ ဖြစ်သည်။ မျက်နှာကို ကြည့်မည် မဟုတ်ချေ။ ထို့ကြောင့် ပြောစရာရှိ ပြော၊ ဆူပူစရာ ရှိလျှင် ဆူပူသည်။ သီချင်း သီဆိုသည့် မိန်းကလေး၊ ယောကျာ်းလေး မရှောင်။ အကြီးအငယ် အရွယ်မရွေး။ မှားလျှင် ဆူပူ ပြောဆို ခံရသည်။
ပုသိမ်မှာတုန်းကလိုပင် သီချင်း တစ်ပုဒ်ချင်းကို အပင်ပန်းခံ နုတ်စ် ခွဲ၊ တီးဝိုင်းသမား တစ်ယောက်လျှင် တစ်ရွက် ပေးပြီး စနစ်တကျ မောင်းသည်။
ဤသို့ဖြင့် Sharp တီးဝိုင်းသစ်မှာ အချို့အတွက် ကျော်မြင့်လွင်နှင့် နည်းနည်းလေးတော့ ထောင့်မတည့်သလို ဖြစ်ရသည်။ သူက သိပ်ကို တိကျလွန်း အားကြီးသည်။ အတီးသမား တီးတာ မဟုတ်လျှင် အတီး မှားပြန်ပြီ။ အဆိုသမားဆိုတာ မဟုတ်လျှင် အဆို မှားပြန်ပြီနှင့် ဘာဆိုဘာမျှ သည်းမခံ။ ကီးမကိုက်လျှင် မကိုက်၊ တိုင်ပင် မှားလျှင် အမှား။
တစ်ချိန်လုံးလိုလို မောင်းမဲနေ၍ "တော်ရိရော်ရိနှင့်လည်း ဖြစ်နိုင်တာပဲ" ဟု သဘောထားသူတွေ အားလုံး ဒုက္ခရောက်ကြသည်။ ဒါပေမဲ့ သူ့ဘက်က သီအိုရီ အခြေခံမှအစ ခိုင်မာနေ၍ ဘယ်သူမျှ သူ့ကို မလှန်နိုင်။ တီးဝိုင်း ပိုင်ရှင်အထိ တက်ပြီး ပြောဆိုကြသော်လည်း မဖြေရှင်းနိုင်။ ကျော်မြင့်လွင်က ခိုင်လွန်းနေသည်။ သူ့ကို ယိုင်သွားစေဖို့ ဆိုလျှင် တော်တန်ရုံ မဖြစ်နိုင်။
သို့ဖြင့် စဉ်းစားရင်း စဉ်းစားရင်း နောက်ဆုံးတော့ ကိုဝင်းဦးကို ပြေးပြီး သတိရလိုက်ကြတော့သည်။
(၇)
ကိုဝင်းဦးက ပဲခူးသား။ ပဲခူး ဒေသကောလိပ်မှ မော်လမြိုင် ဒီဂရီကောလိပ်သို့ သင်္ချာ မေဂျာ အဓိကဖြင့် ကျောင်းလာတက်ခဲ့သူ။
ပဲခူးမှာတုန်းက အသက်ငယ်ငယ်နှင့်ပင် "နုငယ်" တေးဂီတ၀ိုင်း ဦးထွေးမောင်မောင် (အဲလက်စ်ဖခင်)၊ ဦးဝင်းမောင်မောင်တို့က ဂီတာ သင်ပေးခဲ့သည်။ ၁၈ နှစ်သားတွင် ပဲခူး Paradise တီးဝိုင်း၌ တီးခဲ့ပြီး မော်လမြိုင် ရောက်တော့ ဖက်တန်း ရွက်စိမ်း တီးဝိုင်းမှာ တီးခတ်ခဲ့သည်။
ကိုဝင်းဦးက ဂီတမှာ ခြေခြေမြစ်မြစ် ခိုင်ခိုင်မာမာ ရှိသူဖြစ်၍ ကျော်မြင့်လွင်ကို ချိုးဖို့၊ ဟန့်ဖို့ ဆိုလျှင် သူမှပဲ တတ်နိုင်လိမ့်မည် ဆိုပြီး ပဲခူးအထိ လိုက်သွားကာ ဇာတ်ကြောင်းစုံ ခင်းပြ၍ ခေါ်ချလာကြသည်။
ကိုဝင်းဦးလည်း Sharp မှာ ဘေ့စ်ဂီတာ တီးဖို့ ဆိုပြီး မော်လမြိုင်သို့ ရောက်ရှိ လာခဲ့လေသည်။
(၈)
ဝင်းဦးနှင့် ကျော်မြင့်လွင်တို့ တွေ့ကြပြီ။
သီချင်းတိုက်ရင်း တစ်ယောက် အရိပ် တစ်ယောက် အကဲ ခတ်၍ နေကြသည်။ သီချင်း နားချိန်ကျတော့ တီးဝိုင်း တိုက်နေသည့် ယမင်း ပုံနှိပ်တိုက် အပြင်ဘက် နန်းတော် ရုပ်ရှင်ရုံ ရှေ့က မြက်ခင်းကလေးမှာ နှစ်ယောက်သား ထိုင်ပြီး ဟော်လို ဂီတာ တစ်လုံးစီနှင့် ရောက်တတ်ရာရာ ဟိုသီချင်း သည်သီချင်းကလေးတွေ တီးနေရင်း စကားစမြည်း ပြောနေလိုက်သည်။
တီးဝိုင်း တိုက်စဉ်ကပင် တစ်ယောက် အစွမ်း တစ်ယောက် သိသင့်သလောက် သိမြင်ခွင့်ရခဲ့ကြပြီ။ စကားတွေ ပြောရင်းဆိုရင်း တစ်ခဏချင်းအတွင်း တစ်ယောက် ဗီဇ တစ်ယောက် သိသွားကြ၍ ချက်ချင်း တည့်သွားကြသည်။
အတန်ငယ် ရေချိန် မှန်လာသောအခါ ကျော်မြင့်လွင်က-
"ကိုဝင်းဦး၊ ကျွန်တော့်မှာ သီချင်းလေးတွေ ရေးထားတာ ရှိတယ်ဗျ" ဟု ပွင့်အန်ကျလာသည်။ "ဆိုမယ့်သူ ရှိရင် ရောင်းချင်တာ" ဟုလည်း ဆိုသည်။
ကိုဝင်းဦးက ရက်ကောဒင်း လောကနှင့် မစိမ်း။ ၁၉၇၉-၈၀ တုန်းက ပဲခူးမှ သူငယ်ချင်း သုံးယောက် စုပြီး "လွမ်းတဲ့ လမ်း" အမည်နှင့် လင်းစတူဒီယို၌ အသံ သွင်းခဲ့ဖူးသည်။ Paradise တီးဝိုင်းမှာ ဦးတင်ဦးသောင်း ဖြည့်ထားသည့် သူတို့ အခွေ သွင်းခဲ့ချိန်မှာ ခိုင်ထူး၊ ရီဇော်တို့၏ "တေးမြုံငှက်" စီးရီး ထွက်ချိန်နှင့် မရှေးမနှောင်း။ သို့သော် "လွမ်းတဲ့လမ်း" သည် အခွေအဖြစ် ပီပီပြင်ပြင် မထွက်လိုက်။ လမ်းခုလတ်မှာပဲ နစ်မြုပ် သွားခဲ့ရသည်။
ဘာပဲဖြစ်ဖြစ် ထိုအတွေ့အကြုံထဲမှ သင်ကြား ရရှိလိုက်သမျှတွေက အဖိုးတန်လှသည်ဟုသာ ကိုဝင်ဦး မှတ်ယူထားသည်။ ဂီတ မှော်ရုံတောကို တိုးဝင်ဖို့ ဆိုတာ ပါရမီ အခြေခံနှင့် မလုံလောက်။ စန်း နက္ခတ်တွေ အစုံအလင် ယှဉ်ရမည်။ သို့မှသာ ထွန်းလင်း တောက်ပ လိုရာ ရောက်ရမည်။ ပါရမီနှင့် စန်းဆိုတာ ကြိုတင်မြင်နိုင်သည် မဟုတ်။ ကျော်မြင့်လွင်မှာလည်း ရှိနေနိုင်သည်သာ။
ထို့ကြောင့် ကျော်မြင့်လွင် ရေးထားသည်ဆိုသော သီချင်းတွေကို မကြားဖူးသေးသော်လည်း- "မင်းသီချင်းတွေ ကြိုက်တဲ့လူတွေ့ရင် ရောင်းလို့ ရမှာပေါ့ကွာ" ဟု ကိုဝင်းဦးက အားပေး လိုက်သည်။
ကျော်မြင့်လွင်က ဂီတာကို အသာ တီးခတ်ရင်း-
"နှုတ်ဆက်လိုက်ဖို့အားတင်းထားရင်းပါး ပြင်ပေါ်မှာမျက်ရည်တွေဟာ အချိန်နာရီတွေပေါ်ကို ကျော်လွန်ရေလိုဖြတ်ပြီး စီးဆင်းနေဆဲ ချစ်သူရေ . . " ဟု ဆိုပြသည်။
"နာရီပေါ်မှ မျက်ရည်စက်များ" သီချင်းကို နားထောင်ရင်း နားထောင်ရင်း ကျော်မြင့်လွင်၏ ပါရမီ၊ ကျော်မြင့်လွင်၏ အရည်အချင်းကို ကိုဝင်းဦး တန်းသိ သွားသည်။ ကိုယ်ပိုင်သံစဉ် လောကမှာ သူ့ သီချင်း ပုံစံက လုံးဝကြီးကို အသစ်အဆန်း ဖြစ်နေသည်။ သီးခြား ခွဲထွက်ထား၍ လမ်းကြောင်း မတူ။
အံ့အားသင့်ပြီး-
"ဟ၊ မင်းသီချင်းကောင်းလှ ချည်လား" ဟု မှတ်ချက်ချမိသည်။
"ဟကောင်၊ မင်း ဖြစ်တယ်။ မဖြစ်စရာ ဘာမှ မရှိဘူး။ အခွင့်ကြုံဖို့ပဲ လိုမှာ။ အဲသည့်အခါကျရင် သူ့ အလိုလို ဖြစ်သွားမှာပဲ" ဟု သူ့စိတ်ထဲက ပေါ်လာသည့် အရင်းခံအတိုင်းပဲ အားပါးတရ ပြောမိသည်။
(၉)
"မင်း ရေးထားတဲ့ သီချင်းတွေ ဘယ်နှပုဒ် ရှိသေးလဲ" ဆိုပြီး မေးကြည့်လိုက်တော့ ပို၍ပင် အံ့အားသင့်စရာ။ လယ်ဂျာစာအုပ်နှင့် နှစ်အုပ်။ အပုဒ် (၈၀) ခန့် ရှိကြောင်း ကိုဝင်းဦး သိလိုက်ရသည်။
ထိုအချိန်ကတည်းက နာရီပေါ်မှ မျက်ရည်စက်များ၊ မှော်ဆရာ အိပ်မက်၊ သက်ငြိမ် အစရှိသည့် အခွေများတွင် ပါဝင်မည့် သီချင်း အတော်များများကို ရေးသား ပြီးနေပြီ။ သို့သော် ထိုအချိန်ကတုန်းက ကျော်မြင့်လွင်၏ စိတ်ဆန္ဒမှာ အဆိုတော် လုပ်ဖို့ မဟုတ်။ သီချင်းလေးတွေ ရေးဖွဲ့ပြီး သူ့ သီချင်းတွေကို သီဆိုမည့်သူ ရှာတွေ့ဖို့သာ ဖြစ်သည်။ သီချင်း ဆိုမည့် အဆိုတော်ကို သူ ရောင်းမည်။ လူတွေ ကြားထဲ သူ့သီချင်းလေးတွေ ပျံ့နှံ့သွားလျှင် ကျေနပ်ပြီး ဆိုတာမျိုးသာ ဖြစ်သည်။
(၁၀)
ညတွင်းချင်းပင် သူတို့ နှစ်ယောက် အကြားမှာ ဘာအကာအကွယ်မျှ မရှိတော့ဘဲ ပွင့်လင်း ရင်းနှီး သွားကြသည်။ ညီရင်းအစ်ကိုတမျှ ဖြစ်သွားကြသည်။
ကျော်မြင့်လွင်ကို ချိုးပေး လှန်ပေးဖို့ ဆိုပြီး ကိုဝင်းဦးကို ပဲခူးအထိ တကူးတကန့် ပြေးခေါ် ခဲ့ကြသည်။ ယခုတော့ဖြင့် သူတို့ နှစ်ယောက်က ပလဲနံပ သင့်သွားခဲ့ကြပြီ။ ဘယ်သူတွေ ဘာများ တတ်နိုင်ကြဦးတော့မည်လဲ။
ကျော်မြင့်လွင်မှာ ပုသိမ်ကတည်းက သျှပ်ကလေး အမည် တွင်ပြီးသား။
ယခု မော်လမြိုင် တီးဝိုင်းကလည်း Sharp။
ဤသို့ဖြင့် ကိုဝင်းဦးက သျှပ်ကြီး ဖြစ်လာသည်။
Sharpတီးဝိုင်းမှ သျှပ်ကြီး၊ သျှပ်ကလေးတို့ နှစ်ယောက် သွားလေရာမှာ တတွဲတွဲ။ စင်ပေါ်မှာလည်း အပေးအယူမျှမျှ။ ကိုဝင်းဦးက ကျော်မြင့်လွင်တို့ အိမ်အထိ လိုက်လာပြီး တစ်ခါတလေ အိမ်မှာပဲ အိပ်တတ်သည်။
(၁၁)
မှောင်ခိုခေတ်လည်း မှောင်ခိုခေတ်မို့ လမ်းကြောင်းပေါ်မှာ ရှိသည့် မော်လမြိုင်မြို့က အရောင်းအ၀ယ်နှင့် စီးပွားရေး ကောင်းသည်။ အလှူအတန်း ပေါများ၍ တီးဝိုင်းတွေလည်း ဦးစားပေးခြင်း ခံရသည်။ အထူးသဖြင့် မော်လမြိုင်၏ ဆွမ်းကြီးလောင်းပွဲတွေက ထူးခြားသည်။ တော်သလင်းလဆန်းမှစပြီး မော်လမြိုင် ဖက်တန်း၊
ဒိုင်းဝန်းကွင်း၊ မောင်ငန် အစရှိသဖြင့် တစ်ရပ်ကွက်မှ ပြောင်းကာပြောင်းကာ မော်လမြိုင်-ရေး အထွက် ဘူတာရုံ ဈေးချိုရပ်ကွက်အထိ နှစ်ရက်စီ လုပ်သွားသည်။
ဤဆွမ်းကြီးလောင်းပွဲတွေက တစ်ရပ်ကွက်နှင့် တစ်ရပ်ကွက် အပြိုင်အဆိုင်။ တတ်နိုင်လျှင် တတ်နိုင်သလို ထည့်ဝင်ကြပြီး စည်စည်ကားကား ဖြစ်အောင် စီမံကြ၍ တီးဝိုင်းက အမြဲ ပါသည်။ အချို့ရပ်ကွက်ဆိုလျှင် ဇတ်သဘင် အဖွဲ့ကြီးတွေ အထိ ထည့်သွင်း တတ်ကြသည်။
သို့ဖြစ်၍ မော်လမြ်ိုင်မှာ တီးဝိုင်း အလုပ်က ရာသီချိန်ကျလျှင် တစ်လမှာ ဆယ်ပွဲလောက်ပင် ဖြစ်နေတော့သည်။ မင်္ဂလာဆောင်နှင့် အလှူအတန်းတွေကလည်း ငှားရမ်း တတ်ကြသေးသည်။
မောရ၀တီပန်းခြံမှာ တီးဝိုင်းတွေ အလှည့်ကျ ဖျော်ဖြေကြသလို တီးဝိုင်းတွေကလည်း အပြိုင်းအရိုင်း ပေါများသည်။ သီဆို တီးခတ်သူ များပြား၍ တီးဝိုင်း အပြောင်းအလဲလည်း များသည်။ တီးဝိုင်း တစ်ခုပြိုကွဲလျှင် တီးဝိုင်းအသစ် တစ်ခု ချက်ခြင်း ပေါ်လာသည်။
(၁၂)
မော်လမြိုင်မှာ ဟိုးအရင်ကတည်းက ကောက်ပဲသီးနှံ ၀န်ထမ်းများနှင့် စုဖွဲ့ ထားကြသော S-A-M-B တီးဝိုင်း ရှိသည်။ စည်ပင်မှ ကိုကြည်ချွန်းတို့ကလည်း စည်ပင်ဝိုင်း။ ကိုဇော်ဝင့်တို့ တီးဝိုင်းက စတား။ ဗိုလ်လှဖေ အိမ်မှ မောင်မောင်တို့က ကွန်ပျူတာ ကွန်ထရိုး။ နောက်ပြီး ပန်းနုရောင်ဆိုတာ ရှိသည်။ The Excellent တီးဝိုင်းက Sharp ခွဲထွက် လာသလို ရွက်စိမ်းက နောက်တော့ ရွက်သစ် ဖြစ်လာသည်။
ဂျက်မြသောင်းတို့က စက်တွေပါ ကိုယ်ပိုင် ထောင်းထား၍ မော်လမြိုင်မှာ အကြီးဆုံး တီးဝိုင်းဟုပင် ဆိုရမည်။ သူတို့ ၇၄၇ တီးဝိုင်းက နောက်တော့ "ရွှေ" အဖြစ် အမည် ပြောင်းသည်။
The King, LPJ, Playboys, New Wave, The Aces, Success အစရှိသည့် ၀ိုင်းကြီးတွေ ရန်ကုန်မှဆင်းလာတတ်သလို အပျော်တမ်းဝိုင်း သေးသေးလေးတွေကလည်း ရပ်ကွက်ထဲမှာ များစွား ရှိနေကြပြန်သေးသည်။
(၁၃)
ဂျက်မြသောင်းက နော်လီဇာနှင့် တွဲပြီး အခွေ တစ်ခွေ ထွက်ထားဖူးပြီးပြီ။ မော်လမြိုင်မှာ အသံ အားကောင်းသူအဖြစ် နာမည်ကြီးနေပြီ။ သူတို့ကိုယ်ပိုင် "ရွှေ" တီးဝိုင်းမှာ ပင်တိုင် သီဆို ဖျော်ဖြေသလို ယမင်းနှင့် မြို့လယ်ပုံနှိပ်တိုက်များက ကိုညီညီ၊ ကိုဇော်ဇော်တို့နှင့်လည်း ရင်းနှီးသည့်အတွက် Sharp ပွဲတွေမှာလည်း သီချင်းလာ ဆိုတတ်သည်။
ကိုညီညီတို့ အိမ်မှာပဲ " ဒါ Sharp မှာ လိဒ်တီးမယ့် ကျော်မြင့်လွင် " ဟု ဂျက်မြသောင်းနှင့် မိတ်ဆက် ပေးခဲ့သည်။
ကျော်မြင့်လွင်က ပလေးဘွိုင်း သန်းနိုင်၏ " ဆု " သီချင်းကို အင်ထရို၊ ဆိုလို၊ အစအဆုံး သေသေချာချာ ကျွမ်းကျင် ပိရိစွာ တီးပြလိုက်ရာ၊ သီချင်းမဆုံးခင်မှာပင် ဂျက်မြသောင်းလည်း ပက်လက် ကုလားထိုင်မှ ထလာသည်။ သီချင်းဆုံးတော့ လက်ချင်း ဆုပ်ကိုင်မိကြသည်။ ထိုအချိန်မှစ၍ သူတို့ နှစ်ယောက် သိပ်ခင်သွားခဲ့ကြလေသည်။
(၁၄)
Sharp အဖွဲ့မှာ ကိုဝင်းဦးနှင့် ကျော်မြင့်လွင်၊ သျှပ်ကြီး၊ သျှပ်ကလေးတို့က လိဒ်နှင့် ဘေ့စ်ခွတီးကြရာ ဂျက်မြသောင်းက ၀ိုင်းကူပြီး သီချင်းလာဆိုလျှင် သူကိုယ်တိုင်ပဲ ဒရမ် ၀င်တီးသည်။ မော်လမြိုင် ပရိတ်သတ်က ဂျက်မြသောင်းကို ကိုယ့် နယ်ထွက် အဆိုတော်အဖြစ် တစ်ခဲနက်ကြီး အားပေးတတ်ကြသည်။
ဂျက်မြသောင်းက သီချင်းတွေလည်း သူ့ဘာသာ ရေးထားသည်။ သူ ရေးထားသမျှ ကျော်မြင့်လွင်ကို ပြလေ့ ရှိသည်။ တစ်ကြိမ်မှာ ရန်ကုန်မှ The Rays တီးဝိုင်း မော်လမြိုင်သို့ လာရောက် ဖျော်ဖြေဖို့ စီစဉ်ထားဆဲ။ ကန်ထရိုက်တာက မြို့ခံ အဆိုတော်အဖြစ် ဂျက်မြသောင်းကို တက်ပြီး သီဆိုပေးစေချင်သည်။ ဂျက်မြသောင်းက ပလေးဘွိုင်းသန်းနိုင်၏ " အချစ်လှေ " ဆိုမည်။ နောက်ပြီးတော့ သူကိုယ်တိုင် ရေးထားသော " ဟုတ်တယ် ဟုတ် " သီချင်းလည်း ဆိုချင်သည်။
ဂျက်မြသောင်း၏ အသံအနေအထား၊ အဆိုအားအရ ရန်ကုန်တီးဝိုင်းမှာ ၀င်ဆိုဖို့အတွက် ဘာမျှ အခက်အခဲ မရှိ။ သို့သော် ရန်ကုန်တီးဝိုင်းမှာ သီချင်းအသစ် ဆိုဖို့ကျတော့ နုတ်စ်နှင့် အရိန်းခ်ျမင့် လုပ်ထားဖို့ လိုသည်။ ကျော်မြင့်လွင်က အဆိုင်းမတွပင်-
" နေဦး၊ စင်ပေါ် တီးလို့ ရအောင် ကျွန်တော် လုပ်ပေးမယ် " ဆိုပြီး ရမ်တွေ၊ဘေ့စ်တွေအတွက် နုတ်စ်နှင့် အရိန်းခ်ျမင့် သေသေချာချာ လုပ်ပေးလိုက်သည်။ The Rays နှင့် တီးတော့ ဂျက်မြသောင်း၏ ထိုသီချင်းက မော်လမြိုင်တွင် အကြီးအကျယ်ပေါက်သွားသည်။
နောက်ပိုင်းမှာ တစ်နိုင်ငံလုံး အတိုင်းအတာ ရောက်အောင် ပျံနှံ့သွားခဲ့ပြန်သည်။
(၁၅)
ကျော်မြင့်လွင်က သူ ရေးထားသော သီချင်းတွေ ကိုဝင်းဦး တစ်ယာက်ကိုပဲ ပြခဲ့သည်။ အခြားသူတွေကို ပြလေ့မရှိ။
စတိတ်ရှိုးတွေကျလျှင် သူ အဆိုများတာက ဆလိုင်းသွှအောင်၏ မြိုင်နန်းစံ၊ ဝေးလွင့်ခြင်းရဲ့ နောက်ဆုံး ခြေရာတွေ အစရှိသည့် သီချင်းများဖြစ်သည်။ တစ်ခါတစ်လေကျတော့
သူ့ ကိုယ်ပိုင် သီချင်းလေးတွေကို ကြားညှပ်ပြီး ထည့်ဆိုတတ်သည်။
မော်လမြိုင်ဒီဂရီကောလိပ် ကျောင်းထဲမှာ ကိုဝင်းဦး၏ သူငယ်ချင်း ပဲခူးသားတွေ ရှိကြသည်။ ပုသိမ်မှာ ကျောင်းလာတတ်သော ကျော်မြင့်လွင်၏ အသိတွေလည်း ရှိသည်။ သို့ဖြစ်၍ တီးဝိုင်းနားချိန် ကြားရက်များကျလျှင် ပရ၀ုဏ်ထဲက အဆောင်တွေမှာ ညပိုင်း သီချင်း သွားဆို တီးတတ်သည်။ ထိုအခါမျိုးတွင် စိတ်ကူကြုံလျှင် သူ့ကိုယ်ပိုင် သီချင်းတွေထည့်ဆိုသည်။
" သူ ပန်ထားတဲ့ပန်းနီနီ…..နေရာခဏ လဲချင်သည်၊ ကြင်နာသူလေး လှဖို့အစွမ်းကုန် ကြိုးစားမည်။ ရင်မှာ ဒီလောက်ချစ်ပါသည်။ သူပျော်တာ အမြဲတွေ့ချင်သည်။ သူ့အရိပ်အဖြစ် အမြဲရှိနေတတ်ပြီ။ ကျောင်းသွား ကျောင်းပြန် အချိန်မှန် အမြဲစောင့်ကြည့်သည်။ သူ့မျက်ဝန်းနှင့်ဆုံရင် ရင်ခုန်သည်။ သူ့အပြုံးလေးများ မြင်ရင် အပျော်လွန်ပြီး အိပ်မရတော့ပြီ၊ သိပ်ချစ်တဲ့…အကြောင်းကို ကဗျာတွေ….ရေးမည် "
(တစ်နေ့နေ့တော့ ချစ်လာလိမ့်မည်)
" အိမ်မက်လေးထဲ လာမှာလားကွယ်၊ လာနိုင်ပါတယ်၊ ပြန်လည်ထွက်မသွားနဲ့၊ ဒီရင်မှာ အမြဲတမ်း နေပါတော့ကွယ်၊ ဒီရင်ဟာ မင်းအတွက် အလုံခြုံဆုံးပဲ၊ အိုး……အချစ်ရေ….နိုးနိုး…၊ မုန်းမသွားနဲ့…နိုးနိုး၊ ခွင့်မပြုနိုင်ဘူး၊ ကိုယ်မငိုချင်လို့ပါ။ ကိုယ် မငိုချင်ဘူးကွယ် "
(ခွင့်မပြု)
ထိုသီချင်းတွေ အားလုံး မော်လမြိုင် ပရ၀ုဏ် အဆောင်ညများ၌ အကြိမ်ကြိမ် ပွဲတောင်းခံခဲ့ ရသည်။
ပဲခူးသား သူငယ်ချင်းတွေက အသံ သွင်းထားချင်သည် ဆို၍ ကက်ဆက်နှင့် သွင်းပေးထားခဲ့တာ တစ်ခွေစာပင် ရှိခဲ့သည်။ အချို့သီချင်းတွေက ယခုအချိန်အထိ ဘယ်သူမျှကို ပြန်မဆိုဖြစ်ကြသေး။ ကက်ဆက်ခွေ အဟောင်းလေးတွေထဲမှာ အိပ်စက်ဆဲပင် ရှိနေကြဦးမည်။
(၁၆)
တစ်ဖက်တွင် အပျော်သဘော သီချင်း ဆိုတီးတာ ဖြစ်သလို တစ်ဖက်ကလည်း သီချင်းတွေ ရောင်းဖို့ ဖြစ်နိုင်မလား ကြိုးစားကြည့်သည်။ နှစ်သက် သဘောကျ၍ ၀ယ်ချင်သူလည်း ပေါ်လာသည်။
Sharp လို တီးဝိုင်းကြီးမှာ တီးနေရင်းကပင် အံအားသင့်စရာ ကျော်မြင့်လွင်သည် သူ့ကိုယ်ပိုင် တီးဝိုင်းလေး တစ်ခုလောက် သီးသန့် လုပ်ဖို့ စိတ်ကူးအိမ်မက် မက်နေဆဲ ဖြစ်သည်။
ရပ်ကွက်ထJမှ လူငယ်များ ဖြစ်ကြသည့် စိုးငယ်၊ စိုးနိုင်၊ အ၀င်း၊ ယဉ်သိန်း၊ ကျော်ဆွေ စသည်တို့နှင့် ဂီတကို အကြောင်းပြုကာ ရင်းနှီး ခင်မင်နေခဲ့သည်။ ညစဉ် ညတိုင်း အိမ်ရှေ့မှာ ဂီတာ သင်ပေးနေကျ လူငယ်တွေထဲမှာ စိုးငယ်ကို ရစ်သမ်၊ စိုးနိုင်ကို ဘေ့စ်၊ ညီငယ် အောင်အောင်ကို ဒရမ် တီးနိုင်အောင် သင်ကြား လေ့ကျင့် ပေးခဲ့သည်။
တစ်ခါကျတော့ မောင်ငံ ရပ်ကွက်၊ သုံးထပ်တိုက် ဆွမ်းကြီးလောင်းပွဲမှာ အရေးပေါ် တီးဝိုင်း လိုသည်ဆို ၍ Rainbow Colour Eyes အမည်ဖြင့် တီးဝိုင်းလေး တစ်ဝိုင်း ကောက်ကာငင်ကာ ဖွဲ့လိုက်ကြသည်။
ဆွမ်းကြီးလောင်းပွဲအတွက် ပန်းနုရောင်ကိုငှားထားသည်။ သို့သော် ပန်းနုရောင်က အချိန်ပြည့် မတီးပေးနိုင်။ အခြား ရပ်ကွက် ပွဲတစ်ပွဲနှင့် တိုက်ဆိုင်နေခဲ့သည်။ သို့ဖြစ်၍ ပန်းနုရောင်နှင့် ပွဲစ။ Rainbow Colour Eyes က ကြားဖြတ်။ ပြီးမှ ပန်းနုရောင် နှင့် ပြန်သိမ်းဖို့ စီစဉ်ကြသည်။
(၁၇)
Rainbow Colour Eyes ၀ိုင်းကလေးမှာ လိဒ်ဂီတာသမား သံချောင်း ဆိုတာက ကျော်မြင့်လွင်ပဲ ဖြစ်သည်။
ဘေ့စ် စိုးနိုင်၊ ရစ်သမ် စိုးငယ်နှင့် ဒရမ် အောင်အောင် (အောင်မျိုးဟိန်း) တို့ တီးကြမည်။
ကျော်မြင့်လွင်၏ ညီငယ် အောင်အောင့်ကို ကြွက်နီ (အောင်ကျော်ဦး) က ပုသိမ်မှ လာလည်စဉ် ဒရမ်တီး သင်ပေးထားခဲ့သည်။ ကိုလေး (ကျော်မြင့်လွင်) ကလည်း သင်ပေးသည်။ ဂီတာဆိုတာ ကိုယ်ပိုင် ရှိကြသော်လည်း ဒရမ်ဆက်က အိမ်မှာ မရှိနိုင်။ အဲသည်တော့ အောင်အောင် ဒရမ်တီး ကျင့်တာ အိမ်မှ အိုးဖုံး၊ ခေါင်းအုံး ဘာမျှမကျန်။ ညနေတိုင်း အိမ်မှာ ဂီတာဝိုင်းဖွဲ့တီးကြလျှင် ခုံစားပွဲနှင့်သာ တီးရသည်။
Rainbow Colour Eyes တီးဝိုင်းကလေး အောင်မြင်စွာ ထွက်နိုင်ဖို့အတွက် ကန်သုံးကန်က အိမ်တစ်အိမ်၏ ကားဂိုထောင်ထဲမှာ သွားကျင့်ကြသည်။ ပုသိမ်မှာတုန်းကတုန်းကလိုပင် သီချင်း တစ်ပုဒ်ချင်း နုတ်စ်ထုတ်၊ ဟာမိုနီခွဲ အရိန်းခ်ျမင့် လုပ်ပြီး လေ့ကျင့်ပေးသည်။ သီချင်းများကို ကျော်မြင့်လွင် စိတ်ကြိုက် အရိန်းခ်ျမင့် ပြောင်းသည်။
ကျော်မြင့်လွင်နှင့် တီးဝိုင်း လေ့ကျင့်ရတာ မလွယ်။ အားလုံးက သူ့ လက်ရင်း တပည့်။ သူ့ ညီငယ် အရွယ်တွေမို့ အားမလို အားမရနှင့် အရမ်း ဆူပူသည်။
ကြွက်နီ (အောင်ကျော်ဦး) ပင် မော်လမြိုင် လာစဉ် ကျော်မြင့်လွင် ဆူပူကြိမ်းမောင်း ဆဲဆိုတာ တွေ့တော့ "မင်းအစ်ကိုကွာ၊ ပုသိမ်မှာတုန်းက စကားတစ်လုံးတောင် မထွက်ခဲ့တာ အခုနဲ့တော့ တခြားစီပဲ " ဟု ဆိုသည်။
(၁၈)
ညပိုင်းကျလျှင် တီးဝိုင်းက ထွက်ရတော့မည်။ တကယ် စက်တွေ ယူလာပြီ။ အောင်အောင်က ဒရမ်ဆက် ပေါ်မှာ နှစ်ခါပဲ ထိုင်ပြီး တီးဖူးသေးသည်။ ဒါလည်း ကိုလေး (ကျော်မြင့်လွင်) တို့ Sharp တီးဝိုင်း တိုက်စဉ် ထမင်းစားချိန် ခဏနားခိုက် ၀င်တီးကြည့်ထား ခိုင်း၍ တီးဖူးခဲ့ခြင်း ဖြစ်သည်။
ယခု တီးဝိုင်း ပစ္စည်းတွေ ဆင်၊ နဖူးတွေ့ဒူးတွေ့ဒရမ်ဆက်ပေါ် ရောက်ပြီ။ သူတို့ လူငယ်တွေ အားလုံး လျှပ်စစ်ဂီတာ၊ စက်တွေ အပြည့်အစုံနှင့် ပထမဆုံး ထိတွေ့ခြင်း ဖြစ်၍ ပျော်လည်း ပျော်၊ စိတ်လည်း လှုပ်ရှားစရာ။
ကိုလေး (ကျော်မြင့်လွင်) က Santanna အဖွဲ့၏ သီချင်း တစ်ပုဒ် ဆိုမည်။
ထိုသီချင်းက အရမ်းခက်သည့် သီချင်း။ အရင်ကတည်းကတော့ စားပွဲခုံနှင့် အောင်အောင် ကျင့်ထားပြီးသား။ သို့သော် အခုဟာက ဒရမ်ဆက် ပေါ်မှာ ထိုင်ရတာ။ ဖင်ထိုင်ခုံနှင့်ပင် နေသား မကျသေး။ လက်ခြေ မထားတတ်သေး။
ကိုလေး (ကျော်မြင့်လွင်) က-
" မင်း ဘိရလား " ဟု မေးသည်။
"ဟုတ်ကဲ့ " ဆိုတော့ တီး။
တီး၍ မရ။
ဆဲသည်။
မရလေ ဆဲလေ။ ဆဲလေ မရလေ။
သည်လိုနှင့် လုံးလည်ပတ်ချာ ရိုက်တော့သည်။ ပြန်ပြန်တီးတာ အကြိမ် နှစ်ဆယ်လောက် အထိ ဖြစ်သွားသည်။ ဒရမ်ဘိက မမှန်သေး။ အောင်အောင်ကား ချွေးတွေထွက်၊ ဒူးတုန်၊ ငိုလည်း ငိုချင်။ လူကလည်း ရှစ်တန်းကျောင်းသား ဘ၀ပဲ ရှိသေးသည်။
နောက်ဆုံးတော့ ကိုလေး (ကျော်မြင့်လွင်)က-
"ကဲ….ငါတို့ လက်ဖက်ရည်ဆိုင် သွားမယ်၊ မင်းဒီကနေ တီးထား၊ ငါတို့ ဟိုက နားထောင်နေမယ်၊ မှန်ပြီဆို လှမ်းရပ်ခိုင်းလိုက်မယ် " ဆိုပြီး ထွက်သွားသည်။
(၁၉)
အောင်အောင်က တီးဖို့ အဖေါ်မရှိ။ ရပ်လည်းမရပ်ရဲ။ တစ်ယောက်တည်း တီးပြီး ကျန်နေခဲ့သည်။ အတော်ကြာအောင် တီးနေပြီးမှ စိတ်ကလွတ်လပ်သွားသည်။ အဖေါ်မရှိဆိုတာထက် ဖိစီးမှု မရှိတော့ခြင်း ဖြစ်သည်။ ကိုယ့်ဈာန်နှင့် ကိုယ်ဝင်စားပြီး တီးနေခဲ့ရာခဏနေတော့ လက်ဖက်ရည်ဆိုင်က လူတစ်ယောက် ရောက်လာသည်။
မှန်ပြီးလား၊ မမှန်သေး။ သူစားဖို့စမူဆာ နှစ်ခု ပေးခိုင်း လိုက်၍ လာပေးခြင်းသာ ဖြစ်သည်။ သို့သော် အောင်အောင့်ခမျာ စမူဆာကိုပင် ယူမစားရဲ။ ဆက်၍သာ တီးနေခဲ့ရသည်။
ကိုလေး (ကျော်မြင့်လွင်) ပြန်လာတော့ ဆက်ဆူ ဆက်ဆဲ ခံရသည်။ သို့သော် များစွာ တိုးတက် နီးစပ်သွားခဲ့ပြီ။ မှန်ကန် တည့်မတ် လာအောင် နည်းလမ်းလည်း ပြပေးသည်။ သင်ပြသည့်ကြားမှ မရလျှင်တော့ ဆဲဆူခံရတော့သည်။ စိုးနိုင်၊ စိုးငယ်တို့ ဂီတာသမားတွေ၏ မျက်နှာလည်း သွေးတစ်စက်မျှ မရှိကြတော့ပြီ။ ဒရမ် အလှည့် ပြီးလျှင် သူတို့ အလှည့် ရောက်တော့မည်။
တကယ်ပဲ သူတို့လည်းစရော ဆူဆဲခံရတော့သည်။ နေ့တစ်ဝက်လောက်က ကျော်မြင့်လွင် ဆူဆဲတာနှင့်ပင် ကုန်ဆုံး သွားခဲ့သည်။ သို့သော် နေ့လည်ပိုင်းကျ တဖြည်းဖြည်းချင်း လက်မှန် သွားသည်။
ဤသို့ဖြင့် ညပိုင်း တီးဝိုင်း ဖျော်ဖြေပွဲမှာ အထစ်အငေါ့ မရှိ အဆင်ပြေသွားခဲ့ရလေသည်။
တစ်ခါတစ်လေကျတော့ အပြင်းအထန် လေ့ကျင့် မောင်းနှင်လိုက်မှ အတွင်းအားတွေ ထွက်လာတတ်တာ သူတို့ တစ်ဖွဲ့လုံး သိလိုက်ရလေသည်။
(၂၀)
ကျော်မြင့်လွင်တို့ ၀ိုင်းကလေးမှာ မိန်းကလေး အဆိုရှင် မရှိသေး။
ညီမ ခင်မိုးရီကို "မိုး၊ နင်သီချင်းဆိုပါလား " ဟု ဆိုသည်။ ခင်မိုးရီက ဘာသီချင်းမျှ မဆိုခဲ့ဖူး။ သို့သော် " နင် ဆိုမယ်ဆို ဖြစ်တယ်။ " လုပ်သေးသည်။ သို့သော် တကယ်တမ်းကျ မဆိုဖြစ်။
တီးဝိုင်း အဖွဲ့သားတွေကို ကျော်မြင့်လွင်က ဆူဆဲတာ ကရုဏာဒေါသနှင့်မှန်း သူတို့ နားလည်ကြသည်။ သူတို့လေးတွေ တူရိယာ စက်ပစ္စည်း အစုံအလင်နှင့် အထိအတွေ့ နည်းတာကိုလည်း ကျော်မြင့်လွင် သိသည်။
" မဖြစ်သေးပါဘူးကွာ၊ စက်အစုံနဲ့ ကျင့်ထားမှ ဖြစ်မှာပါ " ဆိုပြီး တစ်လ တစ်ခါလောက်တော့ ပိုက်ဆံ စု၍ တီးဝိုင်း ရှိရှိ၊ မရှိရှိ ပစ္စည်း ငှားပြီး ကျင့်ကြသည်။
ဤသို့ဖြင့် ကျော်မြင့်လွင်၏ Rainbow Colour Eyes ရပ်ကွက် တီးဝိုင်းကလေး အောင်မြင်စွာဖြင့် မွေးဖွား လာခဲ့တော့သည်။
(၂၁)
သက်တမ်း နှစ်နှစ်ခန့် ကြာအောင် အဆို၊ အတီးတွေ လေ့ကျင့်ခဲ့ကြသည့် အဆိုပါ တီးဝိုင်းကလေးသည် နောက်ပိုင်းကျတော့ " ပန်းသီး " ဟု အမည်ပြောင်း ဖြစ်သည်။
သူတို့ တီးဝိုင်းကလေးက စင်ပေါ်တက် ဖျော်ဖြေတာထက် ကျင့်တာ၊ တိုက်တာ သိပ်များသည်။ " ပန်းသီး " ကို သူတို့ ရပ်ကွက်ထဲတင်မက အခြား ရပ်ကွက်တွေကလည်း လာငှားကြသည်။ တစ်ခေါက်ဆိုလျှင် မုဒုံအထိကို သွားတီးရသေးသည်။ တီးဝိုင်း သက်တမ်း အတန် ရလာသောအခါ တီးဝိုင်းမှာ ကိုယ်ပိုင် သီချင်းလေး တစ်ပုဒ် ရှိသင့်သည် ဟု ၀ိုင်တော်သားတွေက ပူဆာကြသည်။
ထိုအခါ ကျော်မြင့်လွင်က-
" လာပြီ၊
ဂီတာ လွယ်ကာ တီးပါ၊
လာပြီ၊ လာပြီ၊ လာပြီ၊
ပန်းသီး တီးဝိုင်းလေး
လာပြီ " ဆိုသည့် ရော့ခ်အန်ရိုးလ်ပုံစံ သီချင်းလေး တစ်ပုဒ် ရေးဖွဲ့ ပေးခဲ့သည်။
(၂၂)
ကျော်မြင့်လွင်သည် " ပန်းသီး" နှင့် Sharp မှာ တီးနေသလို မော်လမြိုင်မြို့ထဲက အခြားသော အပေါင်းအသင်းများ၏ တီးဝိုင်းတွေမှာလည်း လိုလျှင်လိုသလို လိဒ်၊ ဘေ့စ်၊ ဒရမ်များ သွားရောက်ကူညီ တီးပေးလေ့ရှိသည်။
Sharp တီးဝိုင်း၏ သျှပ်ကြီး၊ သျှပ်ကလေးအဖြစ် ၀င်းဦးနှင့် ကျော်မြင့်လွင် တတွဲတွဲဖြစ်ကြသလို ဂျက်မြသောင်းနှင့်လည်း ကျော်မြင့်လွင် တွဲမိသည်။
ဂျက်မြသောင်းက ညနေ ညနေဆို နေ့တိုင်း နီးပါး ကျော်မြင့်လွင်ဆီ လာဖြစ်သည်။ ဂျက်မြသောင်းက သီချင်းကြမ်းလေးတွေ ယူလာသဖြင့် နှစ်ယောက် ပေါင်းပြီး အချောကိုင်ကြသည်။ ပြီးတော့ သူတို့ နှစ်ယောက် တီးဝိုင်းစုံ သွားပြီး ဂျက်မြသောင်းက သီချင်း ဆို၊ ကျော်မြင့်လွင်က ဒရမ် တီးလေ့ ရှိသည်။
(၂၃)
တစ်ခါကျတော့ ဂျက်မြသောင်း၏ တစ်ကိုယ်တော် ဖျော်ဖြေပွဲ တစ်ခု ဘားအံဘက်မှာ ရုံပွဲလုပ်ဖို့ စီစဉ်ကြသည်။ ရန်ကုန်က စောဘွဲ့မှူးကို ခေါ်ပြီး လိဒ်ဂီတာ တီးခိုင်းမည်။ ၀င်းဦးက စက္ကင်းလိဒ်။ ကျော်မြင့်လွင်က ဘေ့စ်တီးဖို့ စဉ်းစား ထားကြသည်။ သို့သော် ထိုပွဲရုံမှာ အကြောင်း မညီညွှတ်၍ မလုပ်ဖြစ်ခဲ့ချေ။
စောဘွဲ့မှူးကတော့ မော်လမြိုင် အီဘန်နီဇာ ဘုရားရှိခိုးကျောင်းမှာ ဓမ္မသီချင်းများ တီးဖို့ ရောက်လာသည်။ သူတို့ တလေးတစား သွားတွေ့ကြသည်။ စောဘွဲ့မှူးက ဟိတ်ဟန် အပို အပေါ်ယံ ဟန်ပန် အမူအရာ မရှိ။ ဖော်ဖော်ရွေရွေ ခင်ခင်မင်မင်။
ကျော်မြင့်လွင်က သူသိချင်သမျှ ဂီတအကြောင်းတွေ မေးသည်။ သီအိုရီပိုင်းတွေ၊ တက်ခနိတွေ အကြောင်း။ စောဘွဲ့မှူးကလည်း သူသိသမျှ စိတ်ရှည်လက်ရှည် ရှင်းပြသည်။ အော်ခက်စထရေးရှင်း လုပ်ပုံတွေကအစ အသေးစိတ် မေးတော့ စောဘွဲ့မှူးက ကျော်မြင့်လွင်ကို သိပ်သဘောကျ သွားသည်။
သူနှင့်အတူ သုံးနှစ် လိုက်နေဖို့ ခေါ်သည်။ သူ သိသမျှ တတ်သမျှ ဂီတာပညာ အားလုံး ကျော်မြင့်လွင်ကို ပုံအောပြီး သင်ပေးမည်ဟု ဆိုလေသည်။ ကျော်မြင့်လွင်က မလိုက်ဖြစ်သော်လည်း စောဘွဲ့မှူး ရင်ထဲက တကယ့်ကိုလှိုက်လှိုက်လှဲလှဲ ပြောခြင်း ဖြစ်ကြောင်း နားလည်နေခဲ့သည်။
ဆက်ရန်....
No comments:
Post a Comment
မိတ်ဆွေ...အချိန်လေးရရင် blogg မှာစာလာဖတ်ပါနော်
ဗဟုသုတ ရနိုင်တယ်။