သတ္တိခဲအမျိုးသမီးကြီး နော်အုန်းလှ

 

Sa Maung

[သတ္တိခဲအမျိုးသမီးကြီး နော်အုန်းလှ
(Tu Maung Nyo)]တူမောင်ညို (၂၀၁၃ ခုနှစ်၊ သြဂုတ်လ ၃၁ ရက်)

နော်အုန်းလှသည် ကင်မရာမီးရောင်တို့ ပြိုးပြက်သော စင်မြင့်ပေါ်က “ဒီမိုကရေစီကိုယ်ဟန်ပြမယ်” မဟုတ်။

နော်အုန်းလှသည် လက်ပံတောင်းတိုက်ပွဲခွင်မှ တိုက်ပွဲဝင် သတ္တိခဲအမျိုးသမီးကြီးတစ်ဦးဖြစ်သည်။ မတရားမှု၊ မမျှတမှုများရှိရာ သို့ ကိုယ်တိုင်ကိုယ်ကျသွားရောက်ကာ ပါဝင်တိုက်ပွဲဝင်သူလည်းဖြစ်သည်။ တမင်မေ့လျော့စွန့်ပယ်ထားခဲ့ကြသော “ မတရားတဲ့ အမိန့် အာဏာဟူသမျှ တာဝန်အရ ဖီဆန်ကြ”ဆိုသည့် ကြွေးကြော်သံကိုကိုင်စွဲကာ အပြောသက်သက်မဟုတ်၊ကိုယ်တိုင်လက်တွေ့တိုက်ပွဲဖြင့် အကောင်အထည်ဖော်နေသူလည်း ဖြစ်သည်။

နော်အုန်းလှသည် လက်ပံတောင်းဒေသခံမဟုတ်။ သို့သော်လည်း လက်ပံတောင်းဒေသခံများ လက်တွေ့ရင်ဆိုင်နေရသည့် မတရားမှု၊ နိုင်လိုမင်းထက်ပြုမူမှုများကို လက်ပံတောင်းဒေသခံများနှင့်အတူ အရေးကြီးလျှင်၊ သွေးနီးပြီး၊ သွေးစည်းသည်ဆိုသော မူဖြင့် တစ်စိတ်တည်း တစ်ဝမ်းထဲရပ်တည်တိုက်ပွဲဝင်ခဲ့သည်။ သို့ဖြင့် “ဒေသခံမဟုတ်လျှင် ဝင်မပြောနဲ့” ဆိုသောစကားကို နော်အုန်းလှ က လက်ပံတောင်းတွင် လက်တွေ့ကိုယ်တိုင်ပါဝင်လှုပ်ရှားမှုဖြင့် ချေပလိုက်သည်။

သမ္မတ(ဗိုလ်)ဦးသိန်းစိန်ကြံ့ဖွံ့အစိုးရ၏ မတရားမှု၊ ဖိနှိပ်အနိုင်ကျင့်မှုများသည် တပြည်လုံးနေရာအနှံ့ဖြစ်ပွားနေသည်။ ထို့အပြင် ဘာသာရေးလူမျိုးရေး အရေခြုံဗန်းပြပြီး၊ လူသတ်မီးရှို့အကြမ်းဖက်မှုများကို နေရာအနှံ့လုပ်ကြံဖန်တီးလျက်ရှိ၏။ ကုလသမဂ္ဂ၏ မြန်မာ နိုင်ငံဆိုင်ရာလူ့အခွင့်ရေး ကိုယ်စားလှယ်မစ္စတာကင်တားနား၏ ယာဉ်တန်းကိုအကြမ်းဖက်ရန်ပြုနိုင်စေရန် ကာဖျူးထုတ်ထားသည့်အကြား မှပင် အုပ်ချုပ်ရေးပိုင်းက ရည်ရွယ်ချက်ရှိရှိ ရှူးတိုက်ပေးခဲ့၏။

သမ္မတ(ဗိုလ်) ဦးသိန်းစိန်ကြံ့ဖွံ့အစိုးရသည် (နဝတ-နအဖ) စစ်အစိုးရ စိတ်ကြိုက်ရေးဆွဲ၊ အဓမ္မအတည်ပြုခဲ့သော “၂၀၀၈ အခြေခံဥပဒေ” ဖြင့် ဖိနှိပ်အုပ်စိုးနေသောအစိုးရဖြစ်သည်။ မတရားတဲ့အမိန့်အာဏာ၊ ဥပဒေများအနက် “၂၀၀၈ အခြေခံဥပဒေ” သည် မတရားဆုံးသော ဥပဒေတစ်ခုဖြစ်ပါသည်။

နော်အုန်းလှ သည် “၂၀၀၈ ဖွဲ့စည်းပုံ အခြေခံဥပဒေ ပြင်ဆင်ရေး၊ လက်ပံတောင်းတောင် စီမံကိန်း လုံးဝဖျက်သိမ်းရေး၊ လက်ပံတောင်းတောင်အစီရင်ခံစာလုပ်ငန်းဖော်ဆောင်ရေးကော်မတီဥက္ကဋ္ဌဦးလှထွန်း အလိုမရှိ၊ ပြည်သူကို ညှဉ်းပန်း နှိပ်စက်သောရဲများ အရေးယူပေးရေး” စသည့် အချက်လေးချက်ဖြင့် ဆန္ဒပြခွင့်ရရန် ဥပဒေဘောင်အတွင်းမှအကြိမ်ကြိမ်ခွင့်ပြုမိန့်တောင်းခံခဲ့၏။ အုပ်ချုပ်ရေး အာဏာပိုင်များဘက်မှ နော်အုန်းလှ၏ တောင်းဆိုချက်ကို အလေးမမူလျစ်လျူရှုခဲ့၏။

နော်အုန်းလှနှင့်အဖွဲ့သည် မုံရွာမြို့အတွင်း ဆန္ဒပြခြင်း၊ ကြွေးကြော်သံတိုင်ခြင်း၊ ပိုစတာကိုင်ဆောင်ထားခြင်းမရှိဘဲ၊ ငြိမ်းချမ်း စွာလမ်းလျာက်ခဲ့ကြခြင်းသာဖြစ်သည်။ သို့သော်လည်း အာဏာပိုင်များဘက်မှအကြမ်းဖက်ဖမ်းဆီးကာ ပုဒ်မ၅၀၅(ခ)ဖြင့်အမှုဖွင့်ပြီးတရား စွဲ ဆိုပြီး ထောင်ချပစ်ခဲ့၏။

နော်အုန်းလှ၏ကိစ္စတွင်မူ သမ္မတ(ဗိုလ်) ဦးသိန်းစိန်ကြံ့ဖွံ့အစိုးရ၏ အညှိုးနှင့်အာဃာတသည် ကွင်းကွင်းကွက်ကွက်ပေါ်လွင်လှ ပေ၏။ ဘာသာရေးလူမျိုးရေး အရေခြုံဗန်းပြပြီး၊ လူသတ်မီးရှို့ အကြမ်းဖက်သူများအပေါ်သက်ညှာစွာဖြင့် ပြစ်ဒဏ်စီရင်ချက်များချမှတ် နေသော်လည်း နော်အုန်းလှတို့ကဲ့သို့ နိုင်ငံရေးလှုပ်ရှားသူများအပေါ်တွင် အကြမ်းဖက်ဖမ်းဆီးပြီး အမြင့်ဆုံး ပြစ်ဒဏ်ချမှတ်ခဲ့၏။

သမ္မတ(ဗိုလ်) ဦးသိန်းစိန်ကြံ့ဖွံ့အစိုးရ သည် ဘာသာရေးအဆောက်အအုံ (ဗလီ) ဖျက်ဆီးမီးရှို့သူအကြမ်းဖက်သမားများထက် နိုင်ငံရေးလှုပ်ရှားတောင်းဆိုသူ၊ ငြိမ်းချမ်းစွာဆန္ဒပြသူများအပေါ် အညှိုးအတေးဖြင့် ဖိနှိပ်နေသည်မှာပို၍ထင်ရှားပေ၏။

သို့ဖြင့် ယခုအခါတွင် အင်္ဂါနေ့၊ အင်္ဂါဒေါင့် ဆန္ဒပြသူ နော်အုန်းလှသည် မြန်မာနိုင်ငံအနှံ့အပြားရှိ မတရားမှု၊ မမျှတမှုမျိုးစုံကို ရဲရင့်စွာ တိုက်ပွဲဝင်နေသောသူများ၏ ရှေ့ဆုံးတန်းမှ အလံကိုင်အမျိုးသမီးကြီး ဖြစ်လာခဲ့လေပြီ။

ကျနော်တို့သည် မတရားမှုနှင့်မမျှတမှုအပေါ် ခေါင်းငုံ့မခံ၊ တွန်းလှန်သော နော်အုန်းလှ၏ စိတ်ဓါတ်၊ သတ္တိနှင့်ရဲရင့်သော လုပ် ဟန်ကိုအတုယူကြရမည်။ လေးစားဂုဏ်ပြုရမည်။ နော်အုန်းလှ လက်တွေ့တိုက်ပွဲဝင်ခဲ့သော တိုက်ပွဲဝင်လမ်းကြောင်းအတိုင်း ဆက်လက် လျှောက်လှမ်း တိုက်ပွဲဝင်ကြရမည်။ ဤနည်းလမ်းကသာလျှင် နော်အုန်းလှကို ဂုဏ်ပြုခြင်း၊ လေးစားခြင်းမည်ပေလိမ့်မည်။

နော်အုန်းလှ၏ စိတ်ဓါတ်၊ သတ္တိနှင့်လုပ်ဟန်သည် ယနေ့ မြန်မာအမျိုးသား၊ အမျိုးသမီးများအတွက် စံထား ဂုဏ်ပြုစရာဖြစ် သည်။ ကျနော်တို့၏ အမျိုးသားအပေါင်းတို့သည်လည်း ခင်ဝင့်ဝါ ၏ “ရင်- ခါး- တင်” အတိုင်းအထွာနှင့်ဘီကီနီအပေါ်တွင်သာ အာရုံတွေ ထား၊ အာရုံတွေများပြီး ၊ အမျိုးသားရေး မုန်တိုင်းထန်မနေသင့်ချေ။

လွှတ်တော်အတွင်း ဒီမိုကရေစီပါဝါစုံချနိုင်သော အမျိုးသမီးအမတ်များသည်လည်း အနိမ့်ဆုံးအားဖြင့် အမျိုးသမီးချင်းဟူသော စာနာစိတ်ထားဖြင့်ပင် နော်အုန်းလှနှင့် မကွေမကွာအတူရှိနေကြောင်း ဆန္ဒသဘောထားတစ်ခုခုထုတ်ဖော်ပြောဆိုသင့်ပေသည်။

နော်အုန်းလှအတွက် တစ်စုံ တစ်ရာမျှထုတ်မပြောဘဲ၊ ပုဝါစုံချပြီး အသာမြုံနေကြမည်ဆိုလျှင် သမ္မတ(ဗိုလ်) ဦးသိန်းစိန်ကြံ့ဖွံ့ အစိုးရ၏ ဖိနှိပ်အကြမ်းဖက်မှုများကို သွယ် ဝိုက်သောနည်းဖြင့် လက်ခုပ်သြဘာပေးနေခြင်းဟု မှတ်ယူရပါလိမ့်မည်။

နော်အုန်းလှသည် ကင်မရာမီးရောင်တို့ ပြိုးပြက်သော စင်မြင့်ပေါ်က “ဒီမိုကရေစီကိုယ်ဟန်ပြမယ်” မဟုတ်။မြန်မာနိုင်ငံ အနှံ့ အပြားရှိ မတရားမှု၊ မမျှတမှုမျိုးစုံကို ရဲရင့်စွာ တိုက်ပွဲဝင်နေသောသူများ၏ ရှေ့ဆုံးတန်းမှ အလံကိုင် အမျိုးသမီးကြီးဖြစ်လာခဲ့လေပြီ။

(Photo – Facebook, Naw Ohn Hla waving from window of prison van, 2013)

- See more at: http://moemaka.com/archives/37723#sthash.OdhMZREi.dpuf