ဖွဲ့စည်းပုံ အခြေခံဥပဒေ စာအုပ်သုံးအုပ်ပေါ်က သမ္မတ အရည်ချင်းကို လေ့လာကြည့်ခြင်း

Andrew Myo Aung

 

***ဖွဲ့စည်းပုံ အခြေခံဥပဒေ စာအုပ်သုံးအုပ်ပေါ်က
သမ္မတ အရည်ချင်းကို လေ့လာကြည့်ခြင်း***

ဒီရက်ပိုင်းမှာ ၅၉(စ)ကိစ္စနဲ့ပတ်သက်ပြီး ဆန္ဒပြတဲ့လူတွေကပြ... ဗိုလ်ချုပ်အောင်ဆန်းခေတ်ကတည်းက ရေးခဲ့တယ်လို့ ပေါက်ကရပြောတဲ့လူတွေက ပြောပေ့ါ...

ကျွန်တော်တို့ နိုင်ငံမှာ ဖွဲ့စည်းပုံအခြေခံဥပဒေ စာအုပ်သုံးအုပ်ရှိခဲ့ဖူးပါတယ်...
၁၉၄၇ ခုနှစ်မှာ အတည်ပြုခဲ့တဲ့ စာအုပ်ရယ်...
၁၉၇၄ မှာ အတည်ပြုခဲ့တဲ့ စာအုပ်ရယ်...
၂၀၀၈ မှာ အတည်ပြုခဲ့တဲ့ စာအုပ်ရယ်...
စုစုပေါင်း သုံးအုပ်ရှိပါတယ်...

တော်တော်များများကတော့ သိပြီးသားပါ... မသိသေးတဲ့လူတွေကို အနည်းငယ်ရှင်းပြချင်ပါတယ်...
၁၉၄၇ ဖွဲ့စည်းပုံက ပါလီမန် ဒီမိုကရေစီစနစ် (Parliamentary Democracy)ကို ကျင့်သုံးထားတာ ဖြစ်ပြီး ၂၀၀၈ ကတော့ သမ္မတစနစ် (Presidential Democracy) ကျင့်သုံးထားတာ ဖြစ်ပါတယ်...

အဲဒီနှစ်ခုက ဘာတွေကွာလဲ လို့ပြောရင်...
အခြေခံအားဖြင့် ပါလီမန်ဒီမိုကရေစီ စနစ်မှာ...
Head of State လို့ခေါ်တဲ့ နိုင်ငံတော် အကြီးအကဲနဲ့
Head of Government လို့ခေါ်တဲ့ အစိုးရအဖွဲ့ အကြီးအကဲဟာ တစ်ယောက်စီပါ။ ဥပမာ.. အင်္ဂလန်မှာ နိုင်ငံတော်ရဲ့ အကြီးအကဲဟာ ဘုရင်မကြီး ဖြစ်ပြီး
အစိုးရဖွဲ့ရဲ့ အကြီးအကဲဟာ ဝန်ကြီးချုပ် ဖြစ်ပါတယ်။

မြန်မာနိုင်ငံမှာလည်း ၁၉၄၇ ဖွဲ့စည်းပုံအရ နိုင်ငံတော်အကြီးအကဲဟာ သမ္မတကြီး စဝ်ရွှေသိုက်ဖြစ်ခဲ့ပြီး အစိုးရဖွဲ့အကြီးအကဲဟာ ဝန်ကြီးချုပ် ဦးနု ဖြစ်ခဲ့ပါတယ်...

Presidential Democracy မှာတော့ နိုင်ငံတော်အကြီးအကဲရော အစိုးရဖွဲ့အကြီးအကဲရော တစ်ယောက်တည်းဖြစ်ပါတယ်။ ဥပမာ- အမေရိကန်လို နိုင်ငံမျိုးပေ့ါ။ ၂၀၀၈ ဖွဲ့စည်းပုံဟာလည်း အဲဒီစနစ်အတိုင်းဖြစ်ပြီး လက်ရှိ မြန်မာနိုင်ငံရဲ့ နိုင်ငံတော် အကြီးကဲရော..
အစိုးရအဖွဲ့ အကြီးအကဲရောဟာ သမ္မတကြီး ဦးသိန်းစိန်ပါ...

အဲဒီတော့... ၁၉၄၇ ရဲ့ သမ္မတ အရည်အချင်းကို ပြန်သွားကြည့်ရအောင်..

ဖွဲ့စည်းပုံရဲ့ အခန်းငါး မှာ နိုင်ငံတော် သမတ
(သူတို့ခေတ်က စာလုံးပေါင်း) ဆိုတဲ့ ခေါင်းစဉ်အောက်မှာ

ပုဒ်မ ၄၉ (က)

မိမိကိုယ်တိုင်သော်လည်း
မိမိ မိဘ နှစ်ပါးသော်၎င်း ပြည်ထောင်စုနိုင်ငံရဲ့အာဏာ ပိုင်နက်အတွင်း၌ မွေးဖွား၍ ပြည်ထောင်စုနိုင်ငံသားလည်း ဖြစ်သော၊ ထို့ပြင်
(ခ)
"ပါလီမန်အမတ်အဖြစ် ရွေးကောက်တင်မြှောက်ခြင်းခံနိုင်သည့် အရည်အချင်းနှင့် ပြည့်စုံသည်လည်းဖြစ်သော ပုဂ္ဂိုလ်မျိုး မဟုတ်လျှင် မည်သူမျှ နိုင်ငံတော်သမတ ရာထူးအတွက် ရွေးကောက်ခံနိုင်ခွင့် မရှိစေရ" လို့ပဲ ပါ,ပါတယ်...

*လူတစ်ချို့ ပြောနေသလို နိုင်ငံခြားသားနဲ့ လက်ထပ်သူ မဖြစ်စေရ ဆိုတာမျိုး ၁၉၄၇ ဥပဒေမှာ ပါဝင်ခြင်းမရှိပါဘူး...*

၁၉၇၄ ခုနှစ် ဖွဲ့စည်းပုံမှာကတော့…
အခန်း (၅)
နိုင်ငံတော်ကောင်စီ ဆိုတဲ့ ခေါင်းစဉ်အောက်မှာ နိုင်ငံတော် ကောင်စီ ဥက္ကဌသည် နိုင်ငံတော် သမ္မတဖြစ်သည်။ ဆိုတာကလွဲပြီး အရည်အချင်းကို သီးခြား ပြဌန်းထားတာမျိုး မရှိပါဘူး....

၂၀၀၈ ဖွဲ့စည်းပုံမှာတော့

အခန်း (၃) မှာ
နိုင်ငံတော်သမ္မတနှင့် ဒုတိယသမ္မတများ ဆိုတဲ့ ခေါင်းစဉ်အောက်မှာ..
ပုဒ်မ ၅၉ (က) ကနေ (ဆ) အထိ အချက် ခုနှစ်ချက်နဲ့ ပြဌန်းထားတာကိုတွေ့ရှိရပါတယ်..

အဲဒါတွေကတော့…
(က)
နိုင်ငံတော်နှင့် နိုင်ငံသားအများအပေါ် သစ္စာရှိသူဖြစ်ရမည်။
(ခ)
မိမိနှင့်မိမိ၏ မိဘနှစ်ပါးလုံး နိုင်ငံတော်အာဏာ ပိုင်နက်အတွင်း၌ မွေးဖွားသော တိုင်းရင်းသားမှဖြစ်သည့် မြန်မာနိုင်ငံသားဖြစ်ရမည်။
(ဂ)
ရွေးချယ်တင်မြှောက်ခြင်းခံရသူသည် အနည်းဆုံး
အသက်(၄၅)နှစ် ပြည့်ပြီးသူဖြစ်ရမည်။
(ဃ)
နိုင်ငံတော်အရေးအရာများဖြစ်သော နိုင်ငံရေး၊ အုပ်ချုပ်ရေး၊ စီးပွားရေး၊ စစ်ရေး စသည့်အမြင်များ ရှိရမည်။
(င)
သမ္မတအဖြစ် ရွေးချယ်တင်မြှောက်ခံရသည့် အချိန်နှင့် တစ်ဆက်တည်း အနည်းဆုံး အနှစ်(၂၀) နိုင်ငံတော်တွင် အခြေချ နေထိုင်ခဲ့သူဖြစ်ရမည်။
ခြွင်းချက်။ နိုင်ငံတော်၏ ခွင့်ပြုချက်ဖြင့် နိုင်ငံခြားသို့ တရားဝင်သွားရောက်သည့် ကာလများကိုလည်း နိုင်ငံတော်တွင် အခြေချနေထိုင်ခဲ့သည့်ကာလအဖြစ် ထည့်သွင်းရေတွက်ရမည်။
(စ)
မိမိကိုယ်တိုင်သော်လည်းကောင်း၊ မိမိ၏မိဘ တစ်ပါးပါးသော်လည်းကောင်း၊
မိမိ၏ဇနီး သို့မဟုတ် ခင်ပွန်းသော်လည်းကောင်း၊
မိမိ၏ တရားဝင်သားသမီးတစ်ဦးဦးသော်လည်းကောင်း၊ ထိုတရားဝင်သားသမီးတစ်ဦးဦး၏ ဇနီးသို့မဟုတ် ခင်ပွန်းသည်လည်းကောင်း နိုင်ငံခြားအစိုးရ၏ ကျေးဇူးသစ္စာတော်ကို ခံယူစောင့်ရှောက်ရိုသေသူ (သို့မဟုတ်) နိုင်ငံခြားအစိုးရ၏ လက်အောက်ခံ ဖြစ်သူ (သို့မဟုတ်) တိုင်းတစ်ပါး၏ နိုင်ငံသားဖြစ်သူများ မဖြစ်စေရ၊ ထိုသူများသည် နိုင်ငံခြားအစိုးရ၏ လက်အောက်ခံဖြစ်သူသော်လည်းကောင်း တိုင်းတစ်ပါး၏ နိုင်ငံသားသော်လည်းကောင်း ခံစားရသော အခွင့်အရေးများနှင့် ကျေးဇူးခံစားခွင့်များကို ခံစားနိုင်ခွင့်ရှိသူများ မဖြစ်စေရ။
(ဆ)
လွှတ်တော်ရွေးကောက်ပွဲ၌ ရွေးကောက်တင်မြှောက် ခံပိုင်ခွင့်အတွက် သတ်မှတ်ထားသည့် အရည်အချင်းများအပြင် နိုင်ငံတော်သမ္မတအတွက် သီးခြားသတ်မှတ်ထားသော အရည်အချင်းများနှင့်လည်း ပြည့်စုံရမည်။

ဆိုပြီးရေးထားတာကို တွေ့ရပါတယ်...။

အခုခေတ်မှာ...
လူတစ်ချို့ စိုးရိမ်သလိုမျိုး ၅၉(စ) ကို ပြင်လိုက်ရင် (သို့မဟုတ်) ပယ်ဖျက်လိုက်ရင် မြန်မာနိုင်ငံကြီး လွတ်လပ်ရေး ဆုံးရှုံးသွားတော့မှာလား...??

၅၉ (စ)ကို ပြင်ရုံနဲ့တော့ နိုင်ငံတော်ဟာ သူများလက်အောက် ရောက်သွားနိုင်စရာမရှိပါဘူး။
တကယ်လို့ ပြည်ပသြဇာ သက်ရောက်လာနိုင်ခြေရှိတဲ့
အနေအထားရောက်လာခဲ့ရင်လည်း…
*ပုဒ်မ(၇၁)အရ...
နိုင်ငံတော်သမ္မတကို လွှတ်တော်တစ်ရပ်ရဲ့ ကိုယ်စားလှယ် ဆယ်ပုံတစ်ပုံက စွပ်စွဲ ပြစ်တင်နိုင်ပြီး... အဲဒီလွတ်တော်ရဲ့ အမတ် သုံးပုံ နှစ်ပုံက ထောက်ခံရင်... ကျန်လွှတ်တော်ကနေ ခုံရုံးဖွဲ့ပြီး သမ္မတကို စစ်ဆေးနိုင်ပါတယ်..*

ရာထူးကနေ ဆက်လက်တာဝန်ထမ်းရွက်ရန် မသင့်ကြောင်း စုံစမ်းဆေးရေးအဖွဲ့ရဲ့ သုံးပုံနှစ်ပုံက ဆုံးဖြတ်ခဲ့ရင် သမ္မတက ရာထူးကနေ ထွက်ပေးရမှာ ဖြစ်လို့ လူတစ်ချို့ စိုးရိမ်သလို
ပြည်ပ သြဇာအောက် ရောက်သွားစရာမရှိပါဘူး။

*အဲဒီ ၅၉(စ)အရည်အချင်းမပါလို့ သူများနိုင်ငံရဲ့ သြဇာခံဖြစ်ရမယ်ဆိုရင်... အမေရိကန်ဟာ အခုချိန်ဆို
သူများ သြဇာခံ ဖြစ်နေလောက်ပါပြီ..*

ဘာဖြစ်လို့လဲဆိုတော့ အမေရိကန် ဖွဲ့စည်းပုံရဲ့ ဥပဒေ (၂) ပုဒ်မခွဲ(၅)မှာ သမ္မတရည်အချင်းကို သတ်မှတ်ထားတာက အချက်သုံးချက်ပဲ ရှိပါတယ်..
(တစ်)
ပြည်ထောင်စု၏ တိုင်းရင်းသားမှမွေးသော ပြည်သားတစ်ဦး ။
(နှစ်)
အသက်သုံးဆယ့်ငါးနှစ်ထက် မနည်းသော ။
(သုံး)
အနည်းဆုံး ဆယ့်လေးနှစ်ကြာ ပြည်ထောင်စုအတွင်း အမြဲနေထိုင်သူ ။

ဆိုပြီးပဲ ရေးထားပါတယ်...

ကျွန်တော်တို့နိုင်ငံက ၂၀၀၈ ဥပဒေထဲက ၅၉(စ)လိုမျိုး အရည်ချင်း သတ်မှတ်ချက်မျိုး ထည့်သွင်းမထားပါဘူး။

*၂၀၀၈ စံနမူနာယူခဲ့တယ်ဆိုတဲ့ အင်ဒိုနီးရှား ဖွဲ့စည်းပုံမှာလည်း သမ္မတ အရည်အချင်းဟာ မွေးရာပါ နိုင်ငံသား ဖြစ်ရမယ်...
တစ်ခြားနိုင်ငံကနေ ပြောင်းရွှေ့လာပြီး နိုင်ငံသား ဖြစ်လာသူ မဟုတ်ရဘူးဆိုတာပဲ ပါပါတယ်...*
၅၉(စ)လုံးလို အချက်အလက်မျိုးတွေ ထည့်ထားတာ မတွေ့ရပါဘူး..!!

{မူလစာသားပိုင်ရှင်- ပထမဦးဆုံးရေးသားသူ}
==================================

နာဂစ်အခြေခံဥပဒေ(၂၀၀၈)ထဲက ၅၉ (စ) လုံးဟာ
အနာဂတ် မြန်မာပြည် အတွက်မဖြစ်မနေလိုအပ်တယ်ဆိုတာမျိုး အနာဂတ်လူငယ်စာဖတ်သူအများစုကို အဆိပ်ခတ်ထားတာမြင်မိလို့ ဥာဏ်ကြီးသူများစဉ်းစားဆင်ခြင်ဆုံးဖြတ်နိုင်အောင် ထပ်ဆင့်မျှဝေပေးတာပါ။

လေးစားစွာဖြင့်
အမှန်ဘက်သား
အညတရခွပ်ဒေါင်း

Cartoon Credit : ဖြူဖွေး

Aung Aung Shwe
===============