Nine Nine Sanay @ နိုင်းနိုင်းစနေ
"နင် ရှုံးသွားလို့ရတယ်.. နင် သေသွားလို့လည်းရတယ်.. ဒါပေမယ့် ဒီကိစ္စကို ငါလက်လျော့အရှုံးပေးပါပြီလို့ နင့်မှာပြောပိုင်ခွင့်မရှိဘူး"
ပျူမင်းသားသုနန္ဒရဲ့ တရုတ်ပြည်ချန်အန်ထိသွားရောက်ပြီး ယဉ်ကျေးမှုဖလှယ်တဲ့လမ်းခရီးဟာ ခက်ခဲကြမ်းတမ်းလှတယ်၊ အသက်အန္တရာယ်နဲ့ အကြိမ်ကြိမ်တွေ့ဆုံခဲ့ရသလို ငယ်ပေါင်းကြီးဖော်ညီအစ်ကိုရဲ့သစ္စာဖောက်တာကိုလည်း ခံခဲ့ရတယ်။ အဲဒီအခက်အခဲတွေကြောင့် ချန်အန်ကိုမရောက်ခင် ဒီကြီးလေးလှတဲ့တာဝန်ကို သူဆက်မထမ်းတော့ဘူး ပျူကိုလှည့်ပြန်မယ်လို့ လက်လျော့စကားပြောချိန်မှာ ကချေသည် လာမာစန္ဒီက သုနန္ဒာရဲ့ပါးကို ဖြန်းခနဲရိုက်ပြီး အထက်ပါစကားကိုပြောလိုက်တယ်။
တခြားတရုတ်ကား၊ ကိုးရီးယားကားပိုင်းရှည်တွေကြည့်ရင် ကျွန်မကျော်ကြည့်တတ်တယ်။ ဒီကားကိုတော့ မြန်မာပြည်အကြောင်းပါတာမို့ အစကနေအဆုံးအထိ မကျော်တမ်းထိုင်ကြည့်ဖြစ်တယ်။ ဒီကားကိုရိုက်ဖြစ်တဲ့ အင်တာဗျူးတွေကအစ အကုန်ရှာကြည့်ဖြစ်တယ်။ ဒီကားထဲမှာ တချို့အခန်းဆိုရင် ဒိုင်ယာလော့တွေအရမ်းကောင်းပါတယ်။ ပြန်ရစ်ကြည့်ရတဲ့နေရာတွေလည်း ရှိခဲ့တယ်။ အင်တာဗျူးတစ်ခုမှ ကြည့်ရတာက ဒီသံတမန်ခရီးစဉ်ကြောင့် တရုတ်နဲ့မြန်မာစစ်ပွဲမဖြစ်ပွားခဲ့တာ နှစ်ပေါင်း ၂ဝဝရှိခဲ့ပါပြီလို့ ဆိုပါတယ်။ ဒီကားကိုရိုက်ဖို့ အဝတ်အစားကအစ အဲဒီခေတ်ရဲ့ဆင်ယင်ထုံးဖွဲ့မှုအဆုံး သေချာလေ့လာခဲ့တယ်လို့လည်း ဒီကားရဲ့ဒါရိုက်တာကပြောပါတယ်။
ဒီကားမှာ အဓိကသရုပ်ဆောင်တွေဖြစ်ကြတဲ့ ပျူမင်းသားဆိုရင် အဖြူရောင်နဲ့ အဝါဖျော့ကို အဓိကထားဝတ်ဆင်ခဲ့ပါတယ်။ သူ့ရဲ့ ဖြူစင်ရိုးသားဖြောင့်မတ်ပြီး ဘာသာတရားကိုင်းရှိုင်းမှုကို ပိုပေါ်လွင်အောင်လို့ပါ။ မင်းသမီး ငတက်ဖျားမကတော့ တစ်ကားလုံး ခရမ်းရောင် ခရမ်းနုရောင်ကိုပဲ ဝတ်ဆင်ခဲ့တယ်။ ဉာဏ်နီဉာဏ်နက်များပြီး လျှို့ဝှက်ချက်ဆန်တဲ့အတွက်ကြောင့်ပါ။ စစ်သူကြီးက ရဲရင့်ခြင်းဆိုတာကို ပိုပေါ်လွင်အောင် အနီရောင်၊ ကြက်သွေးရောင်ကိုပဲ ဝတ်ဆင်ခဲ့ပါတယ်။ မင်းသားရဲ့သူငယ်ချင်း စူကြယ်က အစိမ်းနုရောင်ပါ။ သူ့ကတော့ ငယ်ရွယ်ပျိုမျစ်တယ်ပေါ့။
နောက်ပြီး ဇာတ်ကားစစချင်းမှာ ပျူမင်းသားဝတ်ထားတဲ့ ဝတ်စုံဖြူကို ခါးမှာ အဝတ်စနီညိုရောင်နဲ့စည်းထားတယ်။ ဒါဟာလည်း လှအောင်စည်းထားတာ မဟုတ်ပါဘူး။ ဘာသာတရားအပေါ် ကိုယ်ကျင့်ကြံအားထုတ်တဲ့အဆင့်ကို ဖော်ပြတာလို့ ဒါရိုက်တာကဆိုပါတယ်။ သမိုင်းတွေကို သူတို့လေ့လာခဲ့တယ်လို့ဆိုတယ်။ ကျွန်မထင်တယ် တိုက်ကွမ်ဒိုကစားသလို အဆင့်တစ်ခုရောက်ရင် ခါးပတ်ပြောင်းသွားသလိုပဲလို့ထင်တယ်။
ဒီကားမှာပါဝင်ခဲ့တဲ့ ကိုးရီးယားမင်းသမီးက တရုတ်စကားအနည်းငယ်သာတတ်တဲ့သူပါ။ အပြင်မှာ အချင်းချင်းစကားပြောရင် တရုတ်စကားနဲ့ပြောဆိုလို့ရပေမယ့် ရုပ်ရှင်ကားထဲမှာ ပြောရင် ကိုးရီးယားလိုပဲ သူကပြောပါတယ်။ တရုတ်ပြည်မှာ သွားရောက်အခြေချနေတာ ငါးနှစ်ရှိပြီ၊ အိမ်ပါဝယ်ထားပြီလို့ အင်တာဗျူးတစ်ခုမှာ သူဖြေခဲ့ပါတယ်။ ပါးရိုက်တာနဲ့ပတ်သက်ပြီး ကိုးရီးယားရုပ်ရှင်ကားတွေရိုက်တဲ့အခါ ပါးကိုတကယ်ရိုက်ရတယ်၊ ဟန်ဆောင်ပြီးမလုပ်ကြဘူး... ရုပ်ရှင်ရိုက်ပြီးရင် အချင်းချင်းပြန်တောင်းပန်ကြတယ်လို့ သူက ပြောပါတယ်။ မြန်မာပြည်မှာ ပြခါနီးလောက်ပြီ ထင်ပါရဲ့... ဇာတ်ဝင်ခန်းစကားပြောတွေ ဘာသာပြန်တာ ကောင်းရင်ကောင်းသလို ပရိသတ်ရဲ့နှစ်သက်မှုကို ရလိမ့်မယ်လို့ထင်ပါတယ်။ ဘာပဲဖြစ်ဖြစ် အဲဒီခေတ်အနေအထားနဲ့ ပျူမင်းသား ချန်အန်ကို တကယ်အရောက်သွားခဲ့ဖူးသည်ပေါ့...
ဘာရယ်မဟုတ်ပါဘူး... ပျူမင်းသား ချန်အန်ကိုသွားခဲ့ဖူးတယ်ဆိုတဲ့ သမိုင်းကျောရိုးလေးကိုပဲယူခဲ့ပေမယ့် ဇာတ်ကားကို ဖြစ်ကတတ်ဆန်းရိုက်မပြခဲ့ဘူးဆိုတာလေးကို အပျင်းပြေချရေးလိုက်တာပါ မြန်မာဗွီဒီယိုမှာလည်း ဇာတ်လမ်းတွဲတွေရိုက်ပါတော့မယ်... ကိုးရီးယားကားတွေလို၊ တရုတ်ကားတွေလို ကမ္ဘာကိုထိုးဖောက်နိုင်ပါစေလို့..
No comments:
Post a Comment
မိတ်ဆွေ...အချိန်လေးရရင် blogg မှာစာလာဖတ်ပါနော်
ဗဟုသုတ ရနိုင်တယ်။