စိုးထိတ်ခဲ့ရသောခရစ္စမတ် သုံးကြိမ်တိုင်ခဲ့ပြီ

 

7Day News Journal

စိုးထိတ်ခဲ့ရသောခရစ္စမတ် သုံးကြိမ်တိုင်ခဲ့ပြီ
--------------
ရေးသားသူ- အောင်ခိုင်၊ မရန်

ဒေါ်နန်အောင်တစ်ယောက် ခရစ္စမတ်ကို တိတ်ဆိတ်ငြိမ်သက်စွာ ဖြတ်သန်းခဲ့သည်မှာ သုံးနှစ်တိုင်ခဲ့ပြီဖြစ်သည်။

ကိုယ့်ရပ်ကိုယ့်ရွာမဟုတ်ဘဲ အသားမကျသည့်ပတ်ဝန်းကျင်တွင် သူတို့ခရစ်ယာန်ဘာသာဝင်များ အထွတ်အမြတ်ထားရာ ခရစ်တော်မွေးသည့်နေ့ကို ကြိုဆိုဂုဏ်ပြုသည့် ခရစ္စမတ်ကာလများကို ယခင်ကကဲ့သို့ ဒေါ်နန်အောင်တစ်ယောက် လွတ်လပ်ပျော်ရွှင်စွာ မဖြတ်သန်းနိုင်ခဲ့သည်မှာလည်း သုံးနှစ်တိုင်ခဲ့ပြီ။

တိုင်းရင်းသားချင်း မပြီးနိုင်၊ မစီးနိုင်ဖြစ်နေသော တိုက်ပွဲများကြောင့် တာလောကြီးကျေးရွာမှ မြစ်ကြီးနားမြို့နယ်ရှိ ရွှေစက်စစ်ဘေးဒုက္ခသည်စခန်းတွင် ဒေါ်နန်အောင် လာရောက်ခိုလှုံခဲ့ရသည်မှာ ၂၀၁၁ ခုနှစ်ကတည်းကပင် ဖြစ်ပါသည်။

“အခု ကိုယ့်ဟာကိုယ်သနားတယ်။ ရွာမှာဆို စည်းစည်းလုံးလုံး စည်စည်ကားကားလုပ်နိုင်တယ်”ဟု ဒေါ်နန်အောင်က သူ့မွေးရပ်ဇာတိမြေတွင် ခရစ္စမတ်ပွဲတော်ကို ပျော်ရွှင်စွာဆင်နွှဲခဲ့သည့်ကာလများကို ပြန်ပြောင်းသတိရရင်းကဆိုပါသည်။

ဒေါ်နန်အောင်ကဲ့သို့ နေ့ရပ်စွန့်ခွာနေကြရသော စစ်ဘေးဒုက္ခသည်များအတွက်တော့ ယခုလိုအခြေအနေတွင် ခရစ္စမတ်ကို ကိုယ့်အိမ်ကိုယ့်ရာတွင် လွတ်လပ်ပေါ့ပါးစွာ ပါဝင်ဆင်နွှဲနိုင်ဖို့ ခဲယဉ်းလွန်းနေပါသေးသည်။

တိုက်ပွဲများကြောင့် ၄င်းတို့တန်ဖိုးထားမြတ်နိုးသည့် ဇာတိချက်မြှုပ်ဒေသများကို စွန့်ခွာလာရပြီး အသားမကျသော ပတ်ဝန်းကျင်သစ်တွင် အခက်အခဲများစွာဖြင့် နေထိုင်နေရသည့် စစ်ဘေးဒုက္ခသည်များအတွက်တော့ ခရစ္စမတ်နေ့ရက်များမှာ အေးချမ်းခဲ့စဉ်ကကာလကို ပိုမိုလွမ်းဆွတ်နေရသောနေ့ရက်များဖြစ်နေသည်။
မန်စီမြို့နယ် မိုင်းခေါင်နှစ်ခြင်း စစ်ရှောင်စခန်း အဆောင်ဘေးကွက်လပ်မြေကြီးပေါ်တွင် ၀ါးကတ်အပိုင်းငယ်တစ်ခုခင်းရင်းက စစ်ဘေးဒုက္ခသည် ဒေါ်ရွယ်နူးတစ်ယောက် တစ်နှစ်သားအရွယ်ကလေးငယ်ကို ကျောတွင်ပိုးရင်း ထမင်းစားနေပါသည်။ သူ့ဘေးတွင်လည်း (၃)နှစ်အရွယ် ရင်သွေးဖြစ်သူ မရန်ဘရန်ဆိုင်းမှာ ထမင်းဇလုံအနီးတွင် ဖိနပ်ကိုချွတ်ကာ ထိုင်ရင်းက ထမင်းစား၍နေသည်။

သူတို့မိသားစုမှာ အောက်တိုဘာလလယ်ခန့်မှ စတင်ပြီး မန်စီမြို့နယ်အတွင်း ဖြစ်ပွားခဲ့သော တိုက်ပွဲများကြောင့် ဇာတိမုန်းဒိန်ပါကျေးရွာမှ အ၀တ်တစ်ထည်ကိုယ်တစ်ခုဖြင့် ခြေလျင်ထွက်ပြေးလာခဲ့ကြရခြင်းဖြစ်သည်။

“၀ုန်းဆိုပြီးတော့မြည်ပြီးမှ ၀င်လာတာ”ဟု သုံးနှစ်အရွယ် မရန်ဘရန်ဆိုင်းက မုန်းဒိန်ပါကျေးရွာတွင် ဖြစ်ပွားခဲ့သော တိုက်ပွဲအခြေအနေကို မိခင်ဖြစ်သူအား မေးမြန်းနေမှုကို ကြားမှဝင်၍ဖြေဆိုခဲ့ပါသည်။

၎င်းတို့ကျေးရွာထဲသို့ အစိုးရတပ်မှ လက်နက်ကြီးများပစ်ခတ်ပြီး ၀င်ရောက်လာသည့်မြင်ကွင်းကို သုံးနှစ်အရွယ်ကလေးငယ်လေး၏ စိတ်ဝယ်စွဲမြဲနေပြီး ယင်းကဲ့သို့ သူ့ကိုမမေးမြန်းဘဲ ၀င်ရောက်ပြောပြခဲ့ခြင်းဖြစ်သည်။

ကချင်စကားဖြင့် ဗလုံးဗထွေးပြောပြီးသည့်အခါတွင် ခေါင်းငုံ့ရင်းတိတ်ဆိတ်စွာဖြင့် ထမင်းအိုးကို ယောက်မဖြင့်မွှေနေပါသည်။

လတ်တလောဖြစ်ပွားခဲ့သော တိုက်ပွဲများကြောင့် နေရပ်ဇာတိများမှ နောက်ဆုံးထွက်ပြေးတိမ်းရှောင်လာခဲ့ကြရသော ဒေါ်ရွယ်နူးတို့ကဲ့သို့ စစ်ဘေးဒုက္ခသည်များအတွက်တော့ လတ်ဆတ်နေဆဲ စိတ်အမာရွတ်များကြောင့် ခရစ္စမတ်ပွဲတော်ကို မည်သို့ဖြတ်သန်းရမည်မသိသေးပါ။

၁၇ နှစ်ကြာ အပစ်အခတ်ရပ်စဲထားသော အစိုးရနှင့် ကေအိုင်အေတို့ကြား ၂၀၁၁ ခုနှစ်၊ ဇွန်လ ၉ ရက်မှစတင်၍ တိုက်ပွဲများ တစ်ကျော့ပြန်ဖြစ်ပွားခဲ့သည်။ ၂ နှစ်ကျော်ကာလအတွင်း ငြိမ်းချမ်းရေးဆွေးနွေးပွဲများတွင် တိုက်ပွဲများထပ်မံမဖြစ်ပွားရေး၊ စစ်ရှိန်လျှော့ချရေးတို့ကို နှစ်ဖက်သဘောတူညီခဲ့ကြသော်လည်း တိုက်ပွဲများ ဆက်လက်ဖြစ်ပွားလျက်ရှိသည်။

အောက်တိုဘာ မြစ်ကြီးနားငြိမ်းချမ်းရေးဆွေးနွေးပွဲအပြီး နှစ်ပတ်ကျော်ခန့်အကြာတွင် အစိုးရတပ်နှင့် ကေအိုင်အေတို့ကြား မန်စီမြို့နယ်တွင် တိုက်ပွဲများစတင်ဖြစ်ပွားခဲ့သည်။

ငြိမ်းချမ်းရေးတွင် အပေါင်းလက္ခဏာဆန်သည့်ဖြစ်စဉ်ဟု သတ်မှတ်ခဲ့ကြသည့် ကေအိုင်အေဒုတိယစစ်ဦးစီးချုပ် ဗိုလ်ချုပ်ဂွန်မော်၏ ပထမဆုံးရန်ကုန်ခရီးစဉ်ကာလအတွင်းမှာပင် မန်စီမြို့နယ်၌ တိုက်ပွဲဖြစ်ပွားလျက်ရှိသည်။

တစ်သိန်းကျော်သည့် စစ်ဘေးဒုက္ခသည်များအရေးကို မဖြေရှင်းမီမှာပင် ဘုရားကျောင်းများ၊ တရုတ်နယ်စပ်စခန်းများတွင် ဒုက္ခသည်ဦးရေမှာ ထပ်မံ၍တိုးပွားနေဆဲဖြစ်သည်။

စစ်ဘေးရှောင်ပြည်သူများ နေရပ်များသို့ ပြန်လည်အခြေချနိုင်အောင် ညှိနှိုင်းဆောင်ရွက်သွားမည်ဟု ဆွေးနွေးပွဲများတွင် နှစ်ဖက်သဘောတူညီခဲ့ကြသော်လည်း ၂ နှစ်ကျော်ကာလအတွင်း နေရပ်ပြန်နိုင်သော စစ်ဘေးဒုက္ခသည်ဦးရေမှာ တစ်ရာပင်မပြည့်သေးပါ။ ထပ်မံတိုးပွားနေသော စစ်ဘေးဒုက္ခသည်ဦးရေမှာမူ ထောင်ဂဏန်း၊ သောင်းဂဏန်း ရှိနေပြီဖြစ်သည်။

လတ်တလော တိုက်ပွဲများဖြစ်ပွားနေသည့် မန်စီမြို့နယ်တွင်လည်း တိုက်ပွဲများ ဆက်လက်ပြင်းထန်လာပါက စစ်ဘေးဒုက္ခသည်ဦးရေမှာ ထပ်မံတိုးပွားလာနိုင်သည်ဟု ဒေသတွင်းအဖွဲ့အစည်းများကဆိုပါသည်။

ကမ္ဘာပေါ်တွင် ပြည်တွင်းစစ် အရှည်ကြာဆုံးတိုင်းပြည်ဖြစ်သည့် မြန်မာနိုင်ငံတွင် ကချင်စစ်ပွဲတစ်ကျော့ပြန်၍ ပြန်လည်ဖြစ်ပွားခဲ့သည်မှာ ယခုအကြိမ်ပါဆိုလျှင် ခရစ္စမတ်သုံးကြိမ်တိုင်ခဲ့ပြီဖြစ်ပါသည်။

နှစ်ဖက်စလုံးမှ စစ်သည်များအပါအ၀င် မြေစာပင်များဖြစ်ကြသည့် အပြစ်မဲ့ပြည်သူများစွာလည်း ထိခိုက်သေကျေဆုံးရှုံးမှုများ ခံစားခဲ့ကြရပြီးဖြစ်ပါသည်။ သိန်းနှင့်ချီသည့် စစ်ဘေးဒုက္ခသည်များအပါအ၀င် ပြည်သူအားလုံးအတွက် ဆွေးနွေးပွဲသဘောတူညီချက်များကို နှစ်ဖက်စလုံးက အမှန်တကယ် လိုက်နာအကောင်အထည်ဖော်သင့်ကြောင်း ကချင်အရေးစောင့်ကြည့်သူများက သုံးသပ်ကြသည်။

အခြားသော စစ်ဘေးဒုက္ခသည်များကဲ့သို့ပင် တိုက်ပွဲများကြောင့် တာလောကြီးကျေးရွာမှ ရွှေစက်စစ်ရှောင်စခန်းတွင် ၂၀၁၁ ခုနှစ်ကတည်းက ခိုလှုံနေခဲ့သော ကိုလဖရီသည်လည်း ခရစ္စမတ်နေ့ကို တိတ်ဆိတ်စွာဖြင့် တတိယအကြိမ် ဖြတ်သန်းရဦးမည်ဖြစ်သည်။

ခရစ်ယာန်ဘာသာဝင်တို့သည် ၄င်းတို့ အထွတ်အမြတ်ထားရာ ခရစ္စမတ်နေ့တွင် နေရပ်ဇာတိများသို့ပြန်၍ ကွဲကွာနေသောဆွေမျိုး၊ မိတ်ဆွေ၊ သူငယ်ချင်းများနှင့် ဆုံတွေ့လေ့ရှိကြသည်။ နိုင်ငံတစ်ဝန်းရှိ ခရစ်ယာန်ဘာသာဝင်များ၊ အခြားဘာသာဝင်များ အေးချမ်းစွာ ဒီဇင်ဘာ ၂၅ ရက်ကို ဖြတ်သန်းနေချိန်တွင် မြန်မာနိုင်ငံမြောက်ပိုင်း ကချင်ပြည်နယ်ရှိ စစ်ဘေးဒုက္ခသည်များတွင်တော့ ဒီဇင်ဘာနှင်းများကြား ပျော်ရွှင်မှုတွေ ခြောက်ကပ်နေပါသည်။

နေရပ်ဇာတိကျေးရွာများတွင် ၀ါးနှင့်မဏ္ဍပ်ထိုး၊ ကောက်ရိုးခင်းပြီးပြုလုပ်သော ခရစ္စမတ်ပွဲတော်ဖြစ်ပါစေ သူတို့ပျော်ရွှင်စွာ ပါဝင်ဆင်နွှဲလေ့ရှိကြသည်။

စစ်ရှောင်စခန်းအများစုတွင်မူ ခရစ္စမတ်ပွဲတော်ကို သီးသန့်ပြုလုပ်မှုမရှိဘဲ အသင်းတော်များတွင်ပြုလုပ်သော ပွဲတော်တွင်သာ စုပေါင်းပါဝင်ရလေ့ရှိသည်။

ကိုလဖရီကဲ့သို့ နေရပ်စွန့်ခွာ စစ်ဘေးဒုက္ခသည်များအတွက်တော့ ဇာတိများတွင်ကျင်းပသော ခရစ္စမတ်ပွဲတော်က ပို၍အနှစ်သာရရှိပြီး ပို၍လွတ်လပ်ပျော်ရွှင်မှုကို ခံစားရပါသည်။

ကမ္ဘာပေါ်တွင် အရှည်ကြာဆုံး ပြည်တွင်းလက်နက်ကိုင်ပဋိပက္ခ၏ မြေစာပင်တစ်ဦးဖြစ်သော ကိုလဖရီတစ်ယောက် အလိုလားဆုံးဆန္ဒမှာ...

“အမြန်ဆုံးရွာပြန်ပြီး ခရစ္စမတ်လုပ်နိုင်မယ်လို့ မျှော်လင့်ပါတယ်”

ဓာတ်ပုံ- ဂျေမောင်မောင် (အမရပူရ)